Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。

0愛的鼓勵 0訂閱站台

「請媽祖」「割香」鬧熱的將來

 

   台灣各地庄頭的「請媽祖」「割香」的鬧熱，攏有彼種「鬧熱相請」「相放伴」的生活傳統。彼時的鬧熱攏是囡仔上期待、思思念念的日仔！  二十一世紀的今仔日，囡仔對這款的鬧熱，敢猶有這種的期待佮思念？

  現代化的跤步是愈行愈大伐，尤其台灣的經濟發展一直無停睏，土地重劃是必然的，這是逐家自早看到今的。土地重劃了後就是起新厝宅、起大樓，攏佮傳統的庄頭無牽礙，也毋捌問過原本的庄頭半句話！濟濟外來人口搬入來，傳統庄頭的概念是愈來愈薄，「請媽祖」「割香」敢有法度閣繼續傳落去？

  我的故鄉大肚的「林仔頭庄」有較特別，無重劃，外來的毋是有親、就是有故攏佮原本的庄頭有牽連。隔壁烏日的「頂朥胥（lah-si）庄」（三和村）佮「下朥胥（lah-si）庄」（榮泉村）兩庄，攏夆劃入有名的「高鐵特定區」，就完全無仝款囉！這馬已經變做大都市款，齊是一棟一棟的懸樓佮大廈，傳統庄頭的活動，遮的外來的人敢會參加？

  頂一站仔有機會到這兩个庄頭踅踅看看咧，庄頭中心的廟猶佇咧，仝款是香煙蓬蓬衝，毋過傳統的庄頭只賰一屑屑仔爾，而且佇老庄頭看著濟濟無人蹛的老厝，較早的田庄模樣已經毋知走去佗位覕矣。

   150年歷史的「大肚下堡二十庄迎媽祖」，第四庄就是下朥胥（lah-si）庄，這个「請媽祖」的傳統鬧熱，毋知會當維持到當時？

  現代的社會，萬物的存在是靠「實力」抑就是靠「價值」，另外一个角度講就是「弱肉強食」，就是咱人講的：「拳頭母大的提去食！」就親像現代的企業，大間的愈大間、強的愈強。「請媽祖」「割香」的鬧熱嘛是仝款，超大型的親像「白沙屯媽割香」「大甲媽繞境割香」，佮各地的「幾庄幾庄的請媽祖」應該會繼續傳落去。

    猶毋過，各地庄頭單獨的「請媽祖」「割香」的鬧熱，若無創造新的價值，來吸引外來的、新來的住民參與，真可惜嘛真歹勢，會沓沓仔細去、甚至就按呢消失去，就親像中小企業，有特色的才會留落來。

     （寫我的故鄉10 Tong-îng240416）