【全文】
各位
這陣我是佇大阪，就來講大阪的故事。
古早，有一位來到大阪的街市做工課的查埔人。毋知號做啥名姓，干焦聽講是來做煮飯工課的查埔人，人攏叫伊「權助」。
權助對紹介所的門簾行入去，向咬薰吹的頭家講欲揣工課：
「頭家，我想欲做仙，請你替我紹介會當掛（kuà）食蹛的行號。」
頭家聽一下就按呢愣去，有一逐久仔的時間是講袂出話。
「頭家，有聽著無？我想欲做仙，請你替我紹介會當掛食蹛的行號。」
「真正是誠可惜，毋過——」
頭家才回神，開始佮平常時仔仝款，大大喙欶薰。
「我這間店，到今就猶毋捌替人紹介過做仙的工課，請你到別間問看覓。」
權助一聽，敢若誠不服，那共伊穿淺綠色褲的雙腿徙進前，那講出這款的道理來。
「彼是無道理啊！恁店的門簾頂懸是寫啥物字hannh？敢毋是寫「本店推薦所有的行業（萬口入れ所）」？寫「所有的行業」就是無論啥物工課攏會ka̋ng介紹。或者是講，恁店的門簾頂懸寫的本成就是寫假的？」
按呢講嘛是有道理，莫怪權助會遐爾受氣。
「無彼个代誌，門簾頂懸寫的毋是假的。若準你欲叫阮紹介會變做仙、掛食蹛的行號，請你明仔載閣來，今仔日我會共適當的行號先揣好勢。」
頭家是想講著先脫離這个難關，就接受權助的委託。猶毋過，到底啥物行號才會當修練成仙，伊是一點仔摠頭就無。就按呢權助一離開，頭家隨就來到近圍仔的醫生館，共權助的委託講予醫生聽，
「你看按怎？先生，成做仙的修練，去佗一个行號較緊hannh？」伊是用真操煩的聲問的。
醫生應該嘛真頭疼。有一久仔的時間是人愣愣，共雙手尋咧那看對庭園的松樹去。猶毋過，聽著頭家的話，對邊仔來插喙的就是人共號「古狐」的偏名，彼个奸巧的先生娘。
「就叫伊來咱遮啊！若是來咱遮，二三年以內一定會予伊變做仙。」
「真正的？我聽著好代誌。曷就萬事拜託。我是一直感覺「仙」佮醫生的緣份誠相倚。」
毋知根由的頭家是一直說謝，誠歡喜就轉去矣。
醫生是面仔結結，共彼个頭家送出門，無偌久面就越向牽手：
「你是講啥戇代誌咧？若準彼个田庄囡仔幾若年嘛袂成仙，有不平的言語，咱是欲按怎咧？」誠不滿講遮的怨言。
不而過，𪜶牽手毋但是無會失禮，鼻仔是tshngh–tshngh叫那笑，
「啊，請你恬恬就好。親像你這款的人傷條直，佇這个艱難的世間，欲有一頓飯通食是誠僫咧。」顛倒共醫生phǹg倒轉去。
隔轉工田庄囡仔權助就佮紹介所的頭家，照約束做伙來到位。應該是想著第一擺見面，今仔日的權助是穿一領有家紋的外袍（羽織），毋過看起來猶是一个一
般般的做田人，顛倒是予人感覺怪怪。醫生親像是看著天竺來的麝香獸，掠伊个面金金看，誠袂理解那問講：
「聽講你想欲成做仙，這到底是對佗位、啥物緣由才來起這款的願望的？」
權助隨就答按呢：
「嘛毋是有啥物特別的理由，毋過，看著彼个大阪城，親像豐臣太閣彼款的偉大人物，到尾仔嘛著死！按呢看起來，人毋管是偌榮華富貴，到尾仔嘛只是空虛的幻影。」
「若按呢，若是成做仙，啥物代誌就攏會當做囉？」奸巧的先生娘隨插話講，
「是，若是會當成做仙，我是啥物代誌攏做！」
「按呢就對今仔日開始，佇我遮做二十年的工課。若按呢第二十年我就教你成仙的步數。」
「真正的honnh？無比這閣較好的代誌矣！」
「相對的，這二十年是無欲予你一角銀的工錢喔！」
「是，是，了解矣！」
紲落來的二十年的時間，權助佇醫生的厝裡做工課。擔水，破柴，煮飯，掃地拚內底，閣佇醫生出外的時，揹藥箱仔綴咧做伙出門。——而且伊是毋捌要求過半仙工錢。親像這款貴重的做工仔人，全日本是佗位嘛無當揣矣！
猶毋過，二十年的時間就到矣。權助佮拄來的時陣仝款是穿有家紋的外套（羽織）來到主人翁仔某的面頭前。頭起先伊是足誠懇的對𪜶二十年來的照顧說謝
。
「就按呢，咱就照早前的約束，請你共不老不死的成仙之術教予我。」
權助講了後，主人的醫生是大喙開開。因為替伊做二十年的工課是無付半仙錢，這陣才來講毋捌仙術是一點仔就講袂得過。醫生無辦法就講：
「捌成仙之術的是我的牽手，就來請伊來教你。」就共頭越對邊仔去。
不而過，𪜶牽手是真定著。
「按呢我來教你成仙之術，毋過，無論是啥物困難的代誌，著愛照我的話做喔！若無，毋但是仙做袂著，閣來的二十年，你著閣替阮做工課無通領工錢，若無，就會隨罰你「死」的處罰喔！」
「是！無論是啥物困難的代誌，我一定隨做予你看。」
權助心肝真歡喜，就那咧等待先生娘的指示。
「按呢，你𬦰起去庭園彼欉松樹頂懸。」
𪜶牽手隨按呢講，伊本成就毋捌仙人之術，汰有可能教權助咧？提出這款的困難代誌，應該是想講：若準伊做袂到，閣來的二十年替𪜶做工課就免付工錢。不而過，權助話聽了後，隨𬦰就起去庭園的松樹頂懸。
「閣較懸咧，𬦰予閣較懸咧！」
伊牽手徛佇iân-gâ-uà（緣側）邊仔，攑頭看松樹頂懸的權助。權助身軀彼領有家紋的外袍，佇庭園彼欉大大欉松樹上懸的樹椏頂是颺颺飛。
「紲落來，共正手放開。」
權助是倒手那共松樹的粗椏絚絚搦咧，慢慢仔共正手放開！
「紲落來，倒手嘛放開。」
「喂，喂，倒手若嘛共放開，彼个田庄囡仔會摔落來喔！若摔落來，下跤是全全石頭，是無可能會活的！」
醫生來到iân-gâ-uà（緣側）邊仔，現出煩惱的面腔。
「遮無你的代誌喔！嘛，就予我來處理。——啊，倒手共放開。」
權助佇伊的話猶未講完，就已經殘殘共倒手放開矣。人𬦰到樹仔頂懸，兩肢手攏共放開，一定是會摔落去的。就佇彼个一目𥍉，權助的身軀，權助身軀彼領有家紋的外匏就對松樹樹椏離開矣。猶毋過，想講離開矣，閣無摔落去，仙想就想袂到佇中晝時的半空中，權助的身軀就親像人操作的尪仔𫞼佇遐neh？
「萬分的感謝！傍你的福氣，我嘛變做真正的仙人矣！」
權助真誠懇咧說多謝，恬恬仔那踏佇青空，沓沓仔升到懸懸的雲尪內底去矣。
醫生翁仔某到底是變做按怎，彼就無人知矣。只不過醫生庭園的松樹是有留落來。聽講是淀屋辰五郎（よどやたつごろう）為著欲欣賞松樹的落雪景緻，共四个人尋粗的大樹徙到伊的庭園的。 （了）
