爸母的照護＠Tong-îng 的台語人生記錄

2025-03-17 20:12:04| 人氣9| 回應0 | 上一篇

看著NHK這篇報導「為欲爸母的照護一年有10萬人離職，免離職、照護佮工課兩立的方法」（親の介護で年10万人離職仕事を辞めずに両立する方法），有真深的感慨。爸母的照護佇日本佮台灣的情形應該是無仝款，毋過，有誠濟問題應該是仝款！

看著這篇文，先莫講文的內容，我直接的反應是：

「佇日本為著爸母的照護，一年有10萬人共工課辭掉！敢是我脫離社會傷久矣？我罕得（毋捌）聽過：佇台灣，有人會為著爸母的照護共工課辭掉！極加是聽著倩外勞來照護！」

這敢是日本人較有孝（iú-hàu）？抑是講日本的照護制度比台灣較無完全？

爸母的照護是逐个人攏會拄著的！我嘛是仝款經過，嘛早慢會變做夆照護的！毋管按怎，我是強烈建議逐家就趁早思考這項代誌。

若是現此時猶毋免煩惱「爸母的照護」，建議各位做序細的人，閣較關心爸母咧！佇外口無佇爸母身邊的人，三不五時就敲電話問安，較捷轉去共看看咧！佇爸母身邊的人，就莫講「晨昏定省」，請你就較捷佮爸母做伙咧！

尤其是台灣人是一个「誠頇顢（hân-bān）表示愛意」的民族！少年一代應該有較好矣才著！親像阮一代的人，敢若是毋捌讀過「愛」這个字咧，有真濟人對至親，根本就毋捌講過「愛」這个字。

阮一代的名作家廖玉蕙女士，有一篇「示愛」（《不信溫柔喚不回》九歌，2006.05）的散文，描寫「表示愛意」是寫甲誠出色、活lìng-lìng，推薦予逐家。

（250315Tong-îng）

我要檢舉

台長： Tong-îng Lîm

人氣(9) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台