日本的大企業
「 1980年代，日本有名有姓的大企業，真濟攏有家己的液晶面板佮半導體的製造部門。」
1945年日本戰敗，規个國家會用講是變做廢墟，戰爭的消磨國家是虛剺剺，淪落到予美國𤆬頭的同盟國軍事佔領，項項受管制。而且對國外的軍人、佇滿州（中國東北）、韓國、台灣的國民有幾百萬人攏遣送（引揚）轉來。干焦欲予全國的國民有飯通食是拚甲怦怦喘。就想盡辦法、各式各樣欲物仔霸的方法攏做透透。譬如為欲予人有工課做，就「坉湖、坉海造田」（𪜶叫做「干拓」），閣會當增加種作面積等等，真正是無所不至。
人講「天無絕人的路」，韓戰來發生，美國需要基地佮補給就共濟濟的管制敨放，加上盟軍佔領閣佇1952年解除。本成底蒂就真在的產業就工夫盡展，經過一二十年的拍拚，日本的經濟就恢復到佮細界會比並矣。1970-80年代日本的經濟是發展甲予歐美的媒體共號做「經濟動物」。
特別是家電𤆬頭的民生產業佮汽車業攏變做世界上強，世界無敵手是衝甲掠袂牢！這攏是遮的日本大企業——三菱，日立，富士通，豐田汽車，松下，Sony，三洋，Canon等等，逐家攏真熟似，應該攏嘛用過𪜶的產品——佮大大陣的中小企業拚出來的。產品需要啥物零件，市場若是買袂著抑是水準無夠就家己落去做。譬如產品需要顯示器（display）就是面板，就攏投入去研究開發，設廠生產。對烏白的發展到彩色的，這馬就是叫做液晶面板（LCD）。民生產品、汽車需要電子零件，對二極體（diode）彼款較簡單的各種固態半導體元件，沓沓仔就發展到積體電路——就攏是半導體的生產——逐間企業嘛仝款投入研究開發、設廠生產。佇彼時，遮的有名有姓的日本大企業，大部分攏有家己的液晶面板佮半導體的生產製造。
佇經濟高速發展的時陣，市面上買袂著合用的零件，家己落去研究開發、家己來生產，當然是合情合理。同時景氣好、毛利懸，家己生產的液晶面板佮半導體的成本就袂遐爾要意矣。不而過，等到新的生產者投入，就愈來愈競爭、毛利會愈來愈低的時陣，家己生產的方式煞變做「無競爭力」的代名詞。
產業的進步的真大部份是靠「競爭」佮「創新」。好死毋死半導體產業出現一个張忠謀先生的「創新」，就是「半導體的生產製造的專業化」。伊創立tsmc這間半導體製造的專業公司：「我替你做半導體產品，無欲做產品來佮你拚」。同時晶片製造後工程的封裝，測試的專業公司嘛一間仔一間出現，閣有台灣人拍拚，肯做、骨力的性質，就按呢創造出世界第一的tsmc，就佇細細的台灣建立世界上有競爭力的產業鍊（suply chian）拍遍天下無敵手。Tsmc的代誌逐家攏捌甲有賰矣，就毋免閣加了筆墨。
電子業佮半導體產業等等的產業，市場的高速變化佮傳統產業是完全無仝款，企業的經營就需要「速度」。遮的日本大企業的半導體廠抑是面板廠，攏只是大企業內底的一个事業部，較大的新決策攏著透過號做「稟議書」向上報告，往往著費真久的時間。這款的層層請示的現象就是號做「大企業病」的症頭之一。
台灣、韓國的同業就無仝款，攏是頭家直接扞盤。需要的決策會應講是當場就決，明仔載就開始做矣。咱遮的日本大企業家己的半導體生產製造廠，沓沓仔就佮人無拚矣，逐間攏是了甲規褲底。拂到尾仔就是大企業共半導體生產製造部門分割出來，予伊單獨經營抑是佮人合併，按呢嘛是拚人袂贏。落尾是政府出面合併做一間，毋過，聽講最近的經營狀况嘛是欲死動幌。
另外液晶面板（LCD）產業，自1990年代尾期，台灣、韓國的企業開始投入。無幾年，日本的液晶面板就予台灣、韓國的企業是拍甲哀爸叫母。後來中國閣加入來，中國彼款的競爭，人講：「產業見若中國用國家的力加入，無論你本底是偌強的企業，到尾仔攏是無死嘛重傷，甚至規个產業是規碗予in捀去！」液晶面板佮太陽能板兩項產業就是活躘躘的實例。
中國一加入液晶面板（LCD）產業，連咱台灣、韓國的企業就攏擋袂牢，就莫講日本大企業附屬的液晶面板製造廠矣。上蓋有名的就是日本的液晶面板技術𤆬頭的Panasonic佮Sharp，特別是電漿（plasma）面板閣是世界獨佔。到落尾攏是了甲塗塗塗，兩間攏放棄液晶面板的生產。Sharp閣較嚴重，是了甲強欲破產，後來是規个公司予台灣的鴻海買去。
猶毋過，遮的老牌大企業，本成就攏是有相當的本事佮堅實的底蒂。經過幾十年來的改革，真濟大企業攏恢復元氣，閣變做一尾活龍。想著台灣的產業人攏誠愛唱，嘛誠有感受的一首歌「愛拚才會贏」的歌詞：「----人生可比是海上的波浪， 有時起有時落，----」。企業佮人仝款，底蒂若在，一時輸去只要肯拍拚，就有機會閣贏轉來。
（250126Tong-îng）
文章定位：
