24h購物| | PChome| 登入
2025-01-14 12:51:58| 人氣3| 回應0 | 上一篇
推薦 0 收藏 0 轉貼0 訂閱站台

「阮公司是啥物汽車攏做」

「阮公司是啥物汽車攏做」

「日本所有的汽車廠內底，干焦阮三菱汽車對輕自動車，驕車做到thoo-lá-kuh （truck），bá-suh （bus），所有的汽車阮攏總有做。」這句話是1980年代訪問三菱汽車的時，做簡報的先生是真臭颺，特別強調講的。
1980年代有機會參與「10萬台汽車廠的國家計劃」，為欲選定引進的車廠。組團到日本的汽車廠考察，當然逐間汽車廠攏知影：這團的考察報告，對頂懸的決策是有誠大的影響，攏是開大門歡迎。拜訪豐田Toyota，日產Nissan，本田Honda，三菱Mitsubishi，日野Hino等等的日本大汽車廠。
當時聽著這句話是干焦感覺哪會遮爾guâ！一間公司有法度啥物車攏做，逐種車閣攏拚會贏人！
後來50歲的時，我嘛綴時行佮人轉去學校讀MBA，有機會加讀袂少經營管理的冊。讀3年得著的上大啟示就是：【企業經營就是「選擇佮集中」】。企業攏著選家己上在手的產品抑是服務，全力集中做落去。無產品的「創新」，猶會當靠經營管理的「創新」佇市場快速變化的環境繼續活落去。
親像三菱汽車彼款的「啥物汽車攏做」的經營（當然有伊的時代背景），佮現代經營的「選擇佮集中」正正是顛倒反。專精一種車型佇變化萬千的市場欲活落去就拚甲矣！逐間汽車廠攏嘛是下性命咧拚，競爭對手抑毋是食菜的。專精一種車型，競爭者就歹算濟矣，遐爾仔濟的車型，彼款的競爭程度，干焦想就毋敢想矣。咱先人早就講過：「十路全，透底軟。Tsa̍p-lōo tsn̂g, thàu-té nńg。」
後來三菱汽車公司了大錢，著靠增資才活會落去。本成是三菱汽車投資的中華汽車，煞顛倒著投資轉去，會記得是投100億箍的日本錢。後來閣發生濟濟經營上的失誤，三菱汽車煞著予Nissan來加入，到尾仔就變做佮人合併經營。
企業是按呢，人嘛是仝款。毋免「啥物攏做」，毋免「十路全」。共家己上專長的做予精、做予徹。應該就會當佇這个變化無常的環境活落去，才會當繼續追求家己想欲的人生。
（250112Tong-îng）

我要檢舉
台長： Tong-îng Lîm
人氣(3) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

我要回應
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文