我的母校追分國校
日本時代，現在的追分國校轄區的庄頭：社腳、山仔頂、船仔頭，營埔，王田、林仔頭這幾庄的囡仔，著到「大肚公學校」讀冊，路途誠遠。一直到1919（大正8）年4月1日，才佇現在追分車頭的南爿成立「社腳分教場」，佇同年4月就改做分校；毋過只有一年級佮二年級，三年以上的學生仝款愛到大肚街仔的「大肚公學校」讀。大肚庄的第一間學校，經過地方人士久年的爭取，是1899年（日本統治台灣的第五年）佇大肚街仔設立「大肚公學校」。
縱貫鐵路海岸線（海線）全線佇1922年10月11日通車，設立追分驛（車頭）， 社腳分校的校地拄好是車頭用地，就搬到陳保全先生等十幾人寄付所買的校地——就是現在的校地。社腳分校佇1923（大正12）年4月1日獨立設校，號做「社腳公學校」，1926（大正15）年4月1日改做「追分公學校」。1943年正式實施六年國民義務教育，到歲的囡仔是強制去學校讀冊的，1942（昭和17）年4月1日改做「追分國民學校」。
戰後國民政府來台，仝款叫做「追分國民學校」，一直到1968（民國57）年8月1日實施九年國民義務教育的，才改做「臺中縣大肚鄉追分國民小學」。
「追分國民學校」的邊仔，有兩个機關掛追分的名，一个是「追分派出所」，另外一个就是「追分車頭」。日本的鐵路分叉號做「追分」，分叉的所在車頭就叫做「追分駅」，就現此時日本猶有8个「追分駅」。同時追分駅的所在有兩个叫做「追分」的機關，干焦北海道勇払郡安平町的追分，就是這个因緣，「追分國民小學」佮北海道勇払郡安平町立「追分小学校」結做姊妹校，互相有往來。頂幾年我的母校慶祝成立100週年，追分小学校有派人來祝賀。
彼个做田做農的年代，囡仔大漢就是欲鬥做工課的，囡仔去讀冊，就無通鬥做仝課，爸母本成予囡仔讀冊的意願就無懸，學校若是佇附近，去學校讀冊的前後，會當加減鬥做工課。這馬的追分國民學校轄區若是去「大肚公學校」讀冊，上遠的林仔頭庄，到大肚是7.2公里著行2點鐘久，其他的庄頭有較近嘛有3-4公里著行1點鐘，讀冊著愛行遐爾遠，爸母予囡仔讀冊的意願就愈低矣。所以增設學校是會當普及教育的。
咱台灣的全民教育，主要是佇日本時代開始的。咱來查看覓，清朝時代只是設幾間「書院」，是佮本土仝款參加「科舉」，這是好額人的專利，毋是啥物全民教育！
1895 年日本人開始管理台灣，當年就佇芝山岩設立「芝山岩國語傳習所」（就是隔轉年發生「芝山岩事件」（日本人稱為「六氏先生事件」）的所在，當然拄開始是欲予台灣人學日本話，佇台灣各地設「國語傳習所」，後來佇1898年（明治31年）共「國語傳習所」改做「公學校」（就是現在的小學）。閣來佇1919年（大正8年）1月4日發布《台灣教育令》，佮1922年（大正11年）頒布《改正台灣教育令》，開始佇各地設立各級學校，台灣的教育才開始普及。
佇1926年（昭和元年）的調查，台灣兒童的就學比例是28.4%（查埔囡仔43.0%，查某囡仔12.3%）。
到1943年，兒童就學率就達到71%，當時佇亞洲，干焦輸予日本國內，已經達到歐美國家的水平。（全台共有 1099所國民學校，小學生932,525人，1943年的台灣人口是660萬人），彼時正式實施六年國民義務教育，屆齡學童是強制入學的。
彼時的經濟環境佮學校少，讀冊無遐爾簡單，敢是按呢，讀冊的人較珍惜就較拍拚，實力嘛較一致，攏有夠程度。現此時的台灣，只要你想欲讀就有通讀，敢是因為按呢，讀冊的人才袂珍惜，就無認真讀！致使現此時一般人攏認為：程度就愛降一級，就是大學畢業只有高中的程度！
時代是進步抑是退步？
（ 20240510Tong-îng）
文章定位：
