Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。

0愛的鼓勵 0訂閱站台

請媽祖的記持

 

   一般攏是講「迎媽祖（ngiâ-má-tsóo）」，阮是自細漢就講「請媽祖」。媽祖是愛

用請的，袂當干焦是迎接。

  較早做農做田的時代，阮故鄉的林仔頭庄是一冬有兩改的鬧熱，一擺是舊曆四

月初三的「請媽祖」，另外一擺是舊曆六月十八順安宮三府王爺的割香，是庄裡

的大代誌。

    佇彼个散赤年代這款的「請媽祖」佮割香、清明、七月半、中秋、過年這幾个節日才食會著魚肉，補一屑仔油臊。仝時「請媽祖」「割香」彼工，序大人是

無落田做工課，愛無閒鬧熱佮攢請人客的事項，做囡仔的就毋免落田鬥做，就

會當耍，是上歡喜、上期待的代誌。

   「請媽祖」「割香」 這兩改的鬧熱，攏會攢腥臊請親情朋友，這是彼个年代的

交際方式。這種「相請」的方式佮「相放伴」——互相鬥做工課——是仝款的

。

  彼个做農做山的年代，每工是工課拚甲強欲烏暗眩，哪會有閒相揣？咱人這種「群居」的動物是需要有伴、愛有交際，就趁這種「鬧熱相請」來往來。這種「鬧熱相請」對囡仔是暢甲袂講得，猶毋過，這種鬧熱的交際好是好，「鬧熱相請」是真大的開銷，對大人是大代誌，著愛先共錢攢便（編預算）。

  會記得「請媽祖」請人客的時陣，攏有「乞食」來分，閣攏是規陣。親像阮故

鄉的「大肚下堡二十庄迎媽祖」，規陣乞食就會當一庄過一庄，有二十工攏有通

分來食。佇三、四月做田的閒月，閣佇「三月痟媽祖」的時代，就按呢有一、兩過月會當食油臊。會記得阮A̋u（阿母）佇乞食來厝裡分的時，攏會共阮講

：愛加提寡仔分予人。彼時我是無去想講：是按怎著愛做乞食去分來食？後來捌斟酌共想，彼个散赤物資欠缺的年代，親像阮兜的三頓，嘛只有「菜脯、醬瓜仔做配鹹，佮家己種的青菜」。阮彼个所在雖罔是田攏做少，毋過攏是五等則的好田會當種稻仔。米是家己食有夠，較骨力的家己種一寡仔菜，無當過甲誠好嘛袂枵著，汰著愛去ka̋ng分來食？毋過，若是蹛佇較山內，山園攏是灌溉水欠缺的瘦山、瘦園，是袂當種主食的稻仔、麥仔，干焦會當種副食，親像番薯、樹薯。近圍仔閣是無啥物散工通做，三頓欲食飽實在有困難，就莫講食油臊矣。就趁著這款的「鬧熱相請」的時陣，面捋落來就一庄過一庄分來食，補一寡仔油臊。當時我嘛無注意，𪜶是當日就轉去厝無？是毋是分來的物件，嘛有共提轉去予厝裡的人食。

  到了當今的21世紀「請媽祖」「割香」逐年猶是逐年繼續咧做，毋過這種「鬧熱相請」「乞食來分」的風俗。早就佇台灣的經濟起飛以後的1980年代消失去矣。

  （20240409Tong-îng）