阮的「請媽祖」---「大肚下堡二十庄迎媽祖」
南王田的林仔頭（Nâ-á-thâu）庄，一冬有兩改的鬧熱，一擺是咱人四月初三的「請媽祖」，就是「大肚下堡二十庄迎媽祖」。另外一擺是舊曆六月十八，庄裡順安宮三府王爺到水裡港福順宮割香。
*** Nâ-á 的漢字佇較早猶無「通用」漢字的時攏用「籃仔」，個人認為「林仔」應該是較合意。我就用「林仔頭Nâ-á-thâu」。
這个「大肚下堡二十庄迎媽祖」已經有一百五十外年的歷史。每年農曆四月初一，由船仔頭庄庄民，到彰化南瑤宮「南門媽」、彰化天后宮「內媽祖」、頂街萬興宮「頂街媽」、下街永和宮「下街媽」分別請四仙媽祖，迎請到船仔頭庄遊庄了後佇船仔頭庄的廣興宮駐駕。紲落來就一庄接一庄，二十庄迎媽祖遊庄。行政區域調整後，本成的大肚下堡二十庄就分屬烏日、大肚、龍井三區，多數的庄頭是屬大肚區。最後一工是大肚頂街的萬興宮，四月二一由大肚頂街萬興宮，集合廿庄信眾送駕回宮。
大肚下堡二十庄的詳細：
初一：船仔頭（大肚營埔里）廣興宮。
初二：營埔（大肚營埔里）福興宮。
初三：籃仔頭（大肚中和里）順安宮。
初四：勞胥（烏日榮泉里）振興宮。
初五：王田（大肚王田里）天和宮。
初六：山仔頂（大肚福山里）福安宮。
初七：社腳（大肚社腳里）福和宮。
初八：大肚庄（大肚新興里、大東里、大肚里、永和里、磺溪里）下街永和宮。
初九：汴仔頭（大肚永順里）順天宮。
初十：崁仔頂（大肚永順里）崁仔頂永順宮。
十一：寮仔（大肚成功里）國姓廟。
十二：茄投頭（龍井龍東里）奉天宮。
十三：茄頭尾（龍井龍西里）保安宮。
十四：水裡港（龍井麗水里）福順宮。
十五：海埔仔（龍井福田里）福成寺。
十六：田中央仔（龍井田中里）福田宮
十七：崙仔（龍井竹坑里）龍天宮。
十八：竹坑（龍井竹坑里）朝奉宮
十九：山仔腳（大肚山陽里）山陽里活動中心
二十：頂街（大肚頂街里）萬興宮。
這个盛會先人有流傳一个「二十庄迎媽祖歌謠」。我細漢的時，干焦有法度念八庄念到社腳。有押韻，有講著迎媽祖彼个季節的天氣，也有講著各庄頭的特色，嘛有講著迎媽祖的社群的互動，有剾洗，有呵咾，表現出先民的生活。我就共流傳的「二十庄迎媽祖歌謠」改做當今的台語正字——《教育部字典》（簡稱《教典》）的用字，予逐家做參考。
大肚下堡二十庄迎媽祖歌謠（台語正字版）：
船仔頭烏、營埔雨、林仔爛糊糊、朥胥（lah-si）鑽雨縫
王田燒死人、山仔頂著青驚、社腳（kha）來探聽、
大肚王爺真有聖（siànn）、汴（pān）仔頭近溪邊、崁仔頂孤棚戲、
寮仔滿竹刺、茄投查某市、三崁店相拼戲、
水裡港近海墘（hái-kînn）、海埔仔笑咍咍（hai-hai）、田中央仔咧相拍、
崙仔分二庄，媽祖相爭扛（kng）、竹坑龍眼宅、
山仔腳石頭地、頂街人客上蓋濟。
原來留傳的「大肚下堡二十庄迎媽祖歌謠」
船仔頭烏、營埔雨、籃仔爁糊糊、朥胥弄雨縫
王田燒死人、山仔頂著青驚、社腳來探聽、
大肚王爺真有聖、汴仔頭近溪邊、崁仔頂孤棚戲、
寮仔滿竹刺、茄投查某市、三崁店相拼戲、
水裡港近海墘、海埔仔笑哈哈、田中央仔地相打、
崙仔分二庄，媽祖相爭扛、竹坑龍眼宅、
山仔腳石頭地、頂街人客相蓋多。
（寫我的故鄉08 Tong-îng240329）
文章定位：
