追分車頭的記持
台灣鐵路縱貫線的海線上南的車頭就是「追分車頭」，是佇鐵路海線竹南到彰化全線1922年10月11日通車的時設立的。海線火車佇追分車頭分叉，就共號做「追分おいわけOi-wake」駅（驛ia̍h，車頭）。直行就是縱貫線本線、行向彰化，往倒爿行就是行向王田車頭往台中的山線。
追分車頭的行政轄區是屬王田庄（大肚區王田里）。這逝「追分車頭--王田車頭」的路線，因為王田車頭改名號做「成功車頭」，現此時就叫做「成追線」。受著逐家佮意、有名的「追分-成功」車票，是佇追分車頭賣的。
「追分車頭」這个名，日本時代叫做「追分おいわけOi-wake駅」。戰後就叫做 「追分Chui-fen」（戰後-2003年），2003年改做 「追分Jhuei-fen」（2003年-2009年）2010年閣共改做 「追分Zhui-fen 」。
毋過，阮自細漢講到今幾若十年攏叫伊：「tui-hun（追分）」。
咱這个社會就是足愛kâng改名，當然攏有伊改名的意涵。猶毋過，上悲哀的是攏毋捌問過蹛佇遐的在地的人。
「追分車頭」「驛舍ia̍h-sià」的建築是用hī-noo-khih（檜ひのき，松梧柴）起的。經過規百年猶是完好如初繼續咧使用。目前夆講做「海線五寶」之一。「海線五寶」就是鐵路縱貫線的海線，日本時代起的木造車頭，就是「追分車頭」、「談文車頭」、「大山車頭」、「新埔車頭」佮「日南車頭」這五个，攏是同年份落成的。
「追分車頭」邊仔有兩个機關掛追分的名，一是「追分派出所」，另外一个就是我的母校「追分國民小學」。
日本佇鐵路分叉所在的車頭就共叫做「追分駅」，這个「追分駅」現此時佇日本猶有八个。 北海道勇払郡的「追分駅」，是JR北海道的室蘭本線佮與石勝線分叉的所在。這个「追分駅」的車頭邊仔仝款有「追分派出所」佮小學是叫做「安平町立追分小学校」。這間「追分小学校」佮我的母校「追分國民小學」結做姊妹校。
追分車頭是我國校仔6年佮初中3年讀冊經過的所在。阮讀「國校仔」的時陣是叫做「追分國民學校」，簡稱「國校」抑是「國校仔」。阮林頭庄的囡仔去「國校仔」讀冊是無對南王田行縱貫線台1號去學校，攏是行田岸路、五分仔車路、圳溝路、軁過追分車頭，才閣佇縱貫線行一塊仔路行到學校。
阮國校仔六年到學校讀冊攏是褪赤跤（thǹg-tshiah-kha），行過火車路的幼石頭嘛攏袂感覺砧（tiam），熱天的火車路佮tánn-má-ka路是燒拂拂，嘛袂感覺燒。應該是規年迵天褪赤跤，跤底皮已經是厚厚厚，毋驚燒矣。
國校出業考牢清水中學，初中三年我就逐工早起，到追分車頭坐7:07開的火車去清水讀冊，欲暗仔坐清水5:07開的火車轉來。初中3年是我的家庭經濟狀況上䆀的時期，會記得逐工是穿一雙10箍的「兵仔鞋」，襪仔是會勼入去跤底。攏是衝衝碰碰坐火車去讀冊，轉來就愛鬥做田的工課。攏是經過而已，罕得佇追分車頭停留。
彼个時陣的火車母是燃塗炭的蒸汽火車頭，往清水的方向是上崎，會記得火車咧𬦰崎是𬦰甲怦怦喘（phēnn-phēnn-tshuán）沖烏煙。熱天著愛共窗仔拍開，火車的烏煙就攏總走入來車箱，有當時仔塗炭粒仔走入目睭就目油流袂離。
初中出業以後就去彰化讀冊，佮追分車頭9年的緣份就無閣繼續矣。後來入社會佮日本人盤撋，想著追分車頭佮日本的因緣較深，嘛捌𤆬日本人客去共看看咧。後來想起來，講是𤆬人客，實在應該是家己藏佇心肝底的思念，想欲消敨的成分較懸。
這是一世紀前的記持，時代已經是大大的改變矣，不而過，「追分車頭」hī-noo-khih起的「驛舍」原在好好𫞼（tshāi）佇遐，閣猶是佮60年前仝款咧使用（現役）！行禮！
追分車頭有我青春歲月的跤跡，成長過程敏感年代的記持，閣較按怎就拊袂去的。罕罕的一半擺仔去共看的時，攏會予我墜落去彼个青春的日子，跤就親像釘根佇遐，仙徙就徙袂開。
（寫我的故鄉07 Tong-îng240225）
文章定位：
