五分仔車的記持
阮南王田林仔頭庄北爿，有一條五分仔車路，這條載甘蔗專用的五分仔車路應該是叫做大肚線，自烏日糖廠經過lah-si庄（朥(月胥)庄）--林仔頭庄-營埔庄一直到龍井的茄投。
林仔頭庄北爿的五分仔車路有兩條鐵支路，應該是愛叫做「五分仔車頭」。附近庄頭的甘蔗攏會用牛車載來遮，疊起去五分仔車台。
會記得大肚線對林仔頭庄行到大肚橋橋跤，佮一條對彰化來五分仔車路（應該是叫做彰化線）會合，才做伙𬦰徛行向烏日。嘛會記得彰化線，佇大肚溪頂的橋是用柴箍做的。細漢的時陣，捌想講大肚溪若做大水，柴箍橋橋墩毋是就會流流去。後來大漢想著成本的問題，起一个較勇的橋較貴，柴箍橋起的費用較俗，大水流去就閣修理就好矣。而且大肚溪有當時仔嘛無做大水，做大水嘛袂攏總流去，實在有夠巧。
五分仔車路佇大肚橋橋跤會合的所在，有大肚橋遮蔭，就是阮庄裡的囡仔飼牛、𨑨迌的所在。
較早糖廠的五分仔車是分做「營業線（載人）」佮「原料線（載甘蔗）」兩種。這條大肚線是載甘蔗專用的五分仔車路，干焦是佇寒天甘蔗收成的時陣，才有用著。其他的期間攏是做行路用的，庄裡的囡仔去追分國小讀冊有一段是行五分仔車路的。
台中糖廠有一條「中南線」是「營業線」，是對「台中後站」行到南投。予我想去細漢的時，捌綴阿爸去「車籠埔」佮做兵的阿叔面會，應該是坐火車抑是公路局的到台中才盤中南線去的。這條大肚線可能是因為烏日、大肚到海線有火車，就無閣用來載人矣。
彼个時陣阮林頭庄主要是種稻米，干焦佇「溪底仔」——大肚溪溪邊的地開墾做田做園有種甘蔗。攏是用牛車拖到庄裡的五分仔車站疊的。
大肚線五分仔車路經過林仔頭庄就開始落崎，軁到大肚橋橋跤才閣𬦰崎。應該是彼陣火車母（機車頭）的馬力較無夠，平地拖10節無問題，𬦰崎就拖袂起去矣，就佇林仔頭的「五分仔車頭」放一半5節囥咧，，先拖5節去到「下lah-si庄的五分仔車頭」，才閣轉來拖賰的5節。拖到下lah-si庄的車頭才閣共拄才的5節結做伙拖到烏日的糖廠。
彼个物資欠缺的時代，囡仔攏會偷抽甘蔗轉來食的。我猶會記得齧（khè）甘蔗彼款爽快，到今就過60外外矣，猶會記得彼个甜粅粅（tinn-but-but）的滋味。
通常偷抽甘蔗是對載甘蔗的五分仔車咧行的時陣那行那抽，只是抽一兩支爾爾。毋閣阮庄頭北爿的「五分仔車頭」，附近庄頭用牛車載甘蔗來遮疊，定定攏有幾節的甘蔗車停佇遐。阮就到「顧甘蔗的人」看袂著的所在，抽甘蔗甚至𬦰起車頂𢯾（mooh）甘蔗。會記得攏𢯾轉去囥佇總鋪的眠床跤，才沓沓仔食。
毋過，誠不幸一个比阮佮細漢的囡仔，佇五分仔車落崎當咧行的時陣抽甘蔗，無拄好絞入去車輪煞軋死，這層事故以後，庄裡的大人若是看著囡仔抽甘蔗攏會罵共阻止，阮逐家就較毋敢去偷抽甘蔗、偷𢯾甘蔗矣。
毋知對當時開始見若轉去庄裡，我就會擋袂牢，掠著較早的五分仔車路金金看。當然五分仔車路是早就廢掉，路地嘛賣人矣。猶毋過，五分仔車濟濟的記持，早就刻佇我的心肝穎仔，閣較久、閣較按怎嘛是拊（hú）袂掉的。
寫我的故鄉06 Tong-îng240220
文章定位：
