大肚橋
「大肚橋」是台灣南北大動脈「縱貫道」就是臺1線，迒（hānn）過大肚溪的大橋，佇1923年起好通車，一直到1952年攏是全臺灣最長的公路橋梁。
清朝時代台灣南北的交通，欲渡過大肚溪是設立渡口、用渡船來往的。渡口是佇「大肚橋」下流大約4公里，叫做船仔頭庄（現在是屬營埔里）的所在。
日本時代的初期，為了軍事需求興建台北到楓港的軍用道路，叫做「縱貫道」（臺1線前身）。佇「南王田」的所在起橋，1923年5月14日啟用，命名叫做「大肚橋」。是當時全臺灣最長的公路橋梁。
大肚橋是鋼筋khōng-ku-lí的橋墩，橋面是上承式普拉特式桁架（Pratt truss）的桁架橋（truss bridge），橋身長593.8公尺，闊度5.5公尺，干焦會當車輛單向通行。
（橋的外觀就親像西螺大橋彼款。仝款是桁架橋、毋過伊是華倫式構造。伊是佇戰後1952年起的。就是講，佇日本時代欲經過濁水溪猶是用渡船的。）
毋過，我看著的大肚橋是無桁架的橋，應該是後來改建拆掉的。
是按怎無佇本來渡口的所在-----船仔頭庄----起大肚橋，去彰化嘛較近。我咧臆是，彼个時陣南王田已經有一座鐵路橋（第一條是1905年起好，第二條是後來1924年起的），起佇附近是較適當，就佇鐵路橋下游側約100米的所在起公路橋。
就按呢，南王田的所在就有3條橋，就予南王田變成南北二路必經的所在，創造著南王田一時的繁華。
二次世界大戰的時陣，因為大肚橋是當時全臺灣最長的公路橋梁。日本政府知影大肚橋佮兩條鐵路橋，一定是米軍轟炸的目標，就動員附近庄頭，阮林仔頭Nâ-á-thâu庄，隔壁營埔庄等附近庄頭的人燒草薰火煙，予米軍的飛行機看較袂清楚。阮阿爸佮阮營埔庄同學的阿爸攏嘛hőng動員過。毋過，米軍嘛是有共一个橋墩炸斷。彼个所在修理了後，橋面就無遐爾好，定定會有一空一隙。
戰後1946年共大肚橋橋面重建，楦闊了後的闊度是7.5公尺，仝款是車輛單向通行。1959年發生八七水災，大肚橋無損傷。毋過，兩座鐵路橋是佇上流，大水直衝就斷去矣。
八七水災做大水的時陣，有聽大人講，對頂流流來的草厝厝頂的頂懸有坐人，
因為流到頭前的鐵路橋斷去，就流來到大肚橋，草厝厝頂碰著橋面就反過，人就沉落大水矣，阮遮的囡仔就走去看。彼个景像到今60外年矣猶是記甲深深。
彼个時陣全台灣的重要橋樑攏有派兵顧。大肚橋橋頭就有駐在軍人。會記得攏是外省兵，佮庄裡無啥有交插。
我是林仔頭庄出世大漢的。大肚橋橋跤是阮細漢的時陣，庄裡囡仔飼牛、𨑨迌（tshit-thô）的所在。庄裡主要是佇彰化出入（佮去大肚是平遠，攏是7公里，毋過彰化較鬧熱。台中愛12公里傷遠）經過大肚橋毋是騎鐵馬，就是行路。佮大肚橋是真親密的。
1965年我初中出業，就去彰化讀冊是騎鐵馬通學，讀冊日攏愛經過大肚橋。因為大肚橋南北兩爿懸低差4-5米（北爿的台中這爿較懸），寒天橋頂的風是足透的，騎鐵馬時是足驚學生帽（大盤帽）吹落溪。閣會記得橋面的Tam-mà-ka誠無平，閣是一空一隙（khiah），鐵馬徛著是膽膽。
我有兩个小學同學嘛仝款佇彰化讀冊，嘛是仝款徛鐵馬去彰化讀冊，三个攏無仝學校。捌定定佇拜六中晝下課欲轉去，就佇peh到大肚橋的崎（kiā）的時相拄騎做伙。 寒天的時風誠大，就驚帽仔飛去，三个人是一手共帽仔揤咧，一手扞車手，閣是peh崎，三个人是騎甲怦怦喘（phīnn-phīnn-tshuán）。今就經過幾若十年矣，三个人徛鐵馬躘（liòng）彼个崎的「雄姿」，猶是敢若就佇我的目睭前。
阮出業以後，就佇大肚橋的上流500米的所在，起一座新橋1969年通車。是一座16M闊、長1000米的現代橋，叫做「大度橋」。後來921大地動以後判斷耐震度無夠，就改建新橋佇2008年通車，是31公尺闊、長1000米雙向四線道的大橋，就是現此時逐家咧經過的橋矣。
1969年新橋-----大度橋做好，隨就共舊橋----大肚橋拆掉。大肚橋拆掉，人車就無經過南王田。一時繁華的南王田就稀微(hi-bî)矣，變做一个無人知的所在矣。
大肚橋有阮的記持，有阮濟濟人生的跤跡。自從起新橋改做大度橋，大度橋就無閣進入我的記持矣。阮的記持只有大肚橋。
寫我的故鄉04 Tong-îng240110
Photo:線頂掠的，感謝。，正爿彼條就是大肚橋。倒爿彼兩條是鐵路橋。
** Photo:線頂掠的，感謝。美軍轟炸的大肚橋。
文章定位：
