南王田佮鐵路的記持
南王田就是台灣的鐵路佮公路由北向南會合的所在。鐵路海線往南，過「追分站」來到南王田，佮往南過「成功站」（原「王田站」）的鐵路山線會合，才做伙繼續行經過鐵路大肚溪橋行向彰化。
就按呢南王田有3條大肚溪橋，一條公路橋、兩條鐵路橋。附近有兩个車頭佮南王田就成一个三角形。
** 王田驛（成功車頭）
鐵路山線是 1905年5月15日開通，佇現在的成功車頭的所在設車頭是叫做「大肚停車場」。
鐵路海線（當時叫做海岸線）是先起臺中線（山線）的大肚停車場到清水是叫做「王田支線」，佇1920年12月25日通車。佇大肚的所在設一个車頭叫做「大肚停車場」（今大肚車頭）。共原來叫做「大肚停車場」改做「王田停場」。
其實大肚鄉第一个火車頭佇王田叫做「大肚車頭」嘛是合情合理。毋過，大肚的所在設車頭矣，就愛共名還予本尊。
1967年10月10日車頭改建，向東徙100公尺同時改名，採自成功嶺的名叫做「成功車頭」。
** 追分驛（追分車頭）
海岸線（海線）竹南至彰化全線佇1922年10月11日通車，設立追分
驛。本來「王田支線」的「王田驛--追分驛」的路段，現此時就叫做「成
追線」
** 南王田驛
早期海線與山線鐵路由本站分歧1929年7月10日設立，本來是欲做山、海線南邊轉運車頭站（南王田），毋過佇1935年10月 1日廢站。。
後來是山線列車欲利用流量較小的海線的鐵枝路（大肚溪橋），就佇本來南王田驛設立鐵路號誌站，叫做「大肚溪號誌場」。第一擺是1946年8月12日設立，1949年6月6 日廢站。
第一擺是1963年7月12日閣再設立叫做「大肚溪北號誌站」，（同時佇大肚溪南爿設立「大肚溪南號誌站」）
1987年4月20日：大肚溪新橋建成後廢站
鐵路大肚溪橋第一代橋
1895年開始的日本時代，1899年開始對南、北兩端建設鐵路縱貫線，南部路線對打狗開始往北建設，1905年3月26日通車到彰化。彰化往北迒過大肚溪的大肚溪橋，是佇1905年8月起好開通的。
第一代大肚溪橋是單線鐵路橋，全長1,929.3呎（約588公尺），橋梁上部設計為南北的兩段跨度70呎上承式鋼鈑梁橋各8孔與5孔、中段跨度150呎下承式普拉特式（Pratt式）平行弦穿式桁梁橋6孔。
後來，海岸線（海線）竹南至彰化全線佇1922年10月11日通車，毋過，猶是駛第一代橋。無偌久就佇第一代橋的下游（西側），中心線相距15.24公尺的所在起第二代的鐵路橋。1925年4月通車起用。就按呢第一代橋是行山線，第二代橋是行海線的雙線鐵路橋，
實際上大肚溪拄著落大雨就做大水是足恐怖的。佇日本時代嘛是發生幾若擺，造成鐵路大肚溪橋受損，就攏愛趕緊修理。
戰後嘛是發生幾若擺做大水，造成鐵路大肚溪橋受損。上蓋嚴重的是1959年8月7日的八七水災佮1960年8月1日的八一水災，兩擺攏造成鐵路大肚溪橋是足大的損害。這兩座橋是鐵路南北的大動脈，就緊急搶救修理。攏是當時的大新聞。
1978年鐵路電氣化以後，判定原來的橋的強度無夠，應該嘛是因為幾若擺做大水的損傷。就佇橋的下流20公尺的所在，共橋的懸度搝懸2公尺，主橋有海線鐵路、山線鐵路各1座雙線橋梁並列，攏是25孔32.1公尺的「上承式預力梁橋」，全長802.5公尺佇1987年完工，叫做第三代橋就是現在使用的橋。現在的海線鐵路、山線鐵路的兩條橋攏是複線，就是上北落南各用一條線。
本來的第一代第二代的橋就攏共拆掉，這馬只會當看著橋墩的基礎爾爾。
戰後佇本來的南王田驛的附近，有一間農林廳所管的叫做「台中麵粉廠」（佮另一間叫「基隆麵粉廠」是當時台灣的2間公營麵粉廠）。彼个時陣進口的原料小麥是對基隆港、高雄港進口，利用鐵路共貨運到王田車頭，才用王田庄的牛車隊載到工廠。
另外 王田車頭邊仔有起一間「王田毛紡」，應該嘛是看著鐵路運輸的便利。
**後來公營的麵粉廠收起來，尾仔佇1990年彼跤兜，捌予萬客隆Makro開量販店到2003年關起來。就予南王田有小可仔鬧熱一站仔。
南王田是公路台灣南北二路必經之地。閣有鐵路經過有追分車頭、王田車頭這兩个車頭的助贊，創造南王田一時的繁華。
就按呢南王田林仔頭的人，欲坐海線的追分車頭，佮山線的王田車頭是平遠。上北去台中就坐山線，坐海線就是去大肚清水大甲。落南欲去彰化，海線、山線攏會使得是足方便的。
較早蹛清水的人去台中讀冊若是坐火車通學，就愛火車先坐去彰化才盤山線火車去台中，按呢一逝路就愛了1點半鐘。
就是按呢以前林佳龍做市長的時陣，有計劃「台中大山手線」。就是欲改善台中的海線地區佮山線地區之間的交通。毋過，市長換人做以後就毋捌閣聽著這个計劃矣。
「大山手線」下環的追分車頭到王田車頭的「成追線」，改善的繼劃是有做成。毋過，這陣的客車車幫猶無濟。曷上環的大甲─后里的彩虹線，猶無聽著影咧！
較早南王田繁華鬧熱的時陣，敢是人聲、自動車聲共火車行佇鐵支路的聲音遮去？彼个時陣，阮是干焦佇半暝才會聽著火車聲。
今南王田就已經稀微矣，鐵路閣嘛已經高架化，不時就會聽著火車行過的khok-khok，khok-khok的聲。
（寫我的故鄉05 Tong-îng240204）
Photo:線頂掠的，感謝。倒爿是第一二代的兩條鐵路橋。正爿彼條就是公路大肚橋
文章定位：
