南王田的的記持
「南王田Lâm-ông-tshân」這个所在已經是無啥人知矣。
南王田就是台灣的鐵路佮公路由北向南會合的所在。1969年以前南王田是 台灣南北的往來，一定就愛經過的所在。
南王田是我的故鄉，我長大成人的所在。
行政區就是屬台中縣大肚鄉中和村（縣市合併了改做市區里）。
公路是台灣南北的大動脈台一線（海線），自北向南，對大肚到南追分斡正爿（這馬是「興和路」），軁過往南的海線鐵路的平交道以後，直行來到南王田，就佮台中烏日往南的山線公路會合，做伙向南經過大肚橋去彰化。
台灣的鐵路上早開通的是山線，佇南王田有設一个車頭，叫做「南王田驛」（1929年7月10日-1935年10月1日）後來海線完成就廢站。
鐵路海線往南，過「追分站」以後來到南王田，佮往南過「成功站」（原「王田站」）的鐵路山線會合，才做伙繼續行，經過大肚溪橋行向彰化。
1969年以前台灣南北公路，一定就愛經過南王田的一个圓環。人佮車經過就會鬧熱。而且公路局山線佮海線的班車攏是經過南王田，就有人會佇南王田盤車。
同時，見若到熱天，成功嶺有大專暑期集訓。拄著放假日，攏會看著集訓生是軍服穿甲奅奅（phānn-phānn），會來到南王田盤車，坐往沙鹿清水的海線公路局班車。
南王田附近的庄頭林仔頭（nâ-á-thâu）庄，王田（ông-tshân）庄，佇種稻仔的中間會種果子。頂冬六七月是種梨仔瓜、mē-lóng、西瓜。下冬正月是種Tā-mà-tò。攏車來到南王田賣，一四界的販仔攏會來，南王田就形成一个大賣市場。同時有用貨運載到台北中央市場批發。彼種鬧熱可比是一个大果子市。
就按呢，一个細細的圓環邊，就有麵店，𥴊仔恬，鐵馬店，oo-tóo-bái店，挵球間，剃頭店。本來南王田就有一間，阮庄裡好額人開的米絞仔（bí-ká-á），是附近庄頭的做田人會來絞米，買米的所在。彼个時陣，南王田的鬧熱盛况是袂輸彰化的市仔。
毋過，大肚橋傷狹，才會當單向行車。1969年佇上流500米的所在起一个新橋，伊是共叫做「大度橋」，閣共原來的大肚橋拆掉。南北二路就無經過南王田，就按呢，南王田就稀微(hi-bî)矣，變做一个無人知的所在矣。
因為新大肚橋佮高速公路的王田交流道，攏是做新路。而且台灣的交流道是無考慮步輦的(pōo-lián--ê)（步行者），用行路的是軁袂過的。鐵馬、機車攏是踅彎路、踅遠路。
就按呢，人力的（步輦的、騎鐵馬）往南上北，欲軁過王田交流道就愛經過古早的老路，就是經過南王田的這條路。
現此時，會經過南王田的有幾種人，第一是「行路環島」佮「騎鐵馬環島」的，閣來就是「白沙屯媽」佮「大甲媽」的兩仙媽祖，每年割香攏會經過南王田。南王田鎮明宮是一定會停駕的。舊年白沙屯媽，猶佇興農的工場駐駕一暝咧。
這馬欲去南王田是真歹報路。用路名就是大肚區的「興和路」佮「南榮路」的相接的所在，或者是google map拍「南王田」嘛會走出來。毋過，好人若是拄著困難，老天攏會指示明路，興農（楓康超市）的工場就佇南王田附近，欲去南王田，就問講欲去「興農公司」就會到。
這嘛是真怪奇，南王田是先鬧熱的、先有名的，這馬是淪落到揣無路，需愛借別人的名揣路。南王田就是親像芥川龍之介短篇小說「鼻仔」內底的一句話。
「怨慼（uàn-tsheh）今仔日的悽慘落魄（tshi-tshám-lo̍k-phik），想起昔日的囂俳奢颺（hiau-pai tshia-iānn。」
寫我的故鄉03 Tong-îng231225
文章定位：
