Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。

0愛的鼓勵 0訂閱站台

  翕畢業像

   逐工佇電腦頭前做台文翻譯的工課。 袂使得規工坐牢牢，目睭嘛就愛歇睏。著定時做活動、振動一下。有固定的幾種个活動咧輪流做，欲做啥就看彼時的khì-mo̍h-tsì。 今仔日就騎鐵馬到隔壁的中興大學校園蹓蹓咧。

  一下行入去校園，就看著一陣一陣穿學士服的學生咧翕像，看起來應該是咧翕畢業像，閣到翕畢業像的季節矣！

  共鐵馬停落來坐佇鐵馬頂，目睭掠遐的學生金金相，心肝就咧想講：

  遮的學生佇咧翕畢業像的時陣，到底咧想啥hannh？

  欲讀研究所的，研究所最近就欲放榜。

    有的應該是按呢想：若是考著意中的學校，毋知偌好咧。

    猶有的是猶毋知將來欲創啥，按算就先考一間研究所暫跔（ku），毋知考會著  袂？

  家境較無好的學生，這三年外攏咧A-lú-bái-toh（拍工，打工）趁生活費，冊也無偌認真讀，應該是咧煩惱：畢業了毋知揣有好頭路無？

  免煩惱生活費的，這三年外干焦顧耍，冊嘛無認真讀，應該仝款是咧煩惱毋知揣有好頭路無？

  閣有的是出業開始食頭路，就愛開始愛還「學貸」，咧煩惱月給敢有夠開？

  猶閣有的是毋知是按怎入來讀的，嘛毋知按怎就按呢欲出業矣。出業了後嘛毋知欲按怎？一切的一切攏總是毋知按怎？----------

    就按呢坐佇鐵馬頂，若像釘根釘佇遐，一直咧想遮的代誌，無起行！

  「 啊！遮的學生仔，嘛是社會的一个縮影！」喙是就那喃（nauh)，鐵馬就那騎起行！  （ 240308Tong-îng）