芥川龍之介短篇小說 台文版「貉Hô」
刊載佇《海翁台語文學雜誌》276期（2024年12月號）
根據《日本書記》（3）的記載，日本佇推古天皇（4）三十五（西元627）年春二月，對陸奥（5）就代先發現貉化身做人。特別是有一本寫著：毋是「變做人」是「裝做人」。毋過，兩種攏共叫做歌之（u-ta-u）。毋管是「變做人」抑「裝做人」，佮人仝款會唱歌應該是事實。
閣較進前的《垂仁紀》（6）寫講：八十七（西元 58）年丹波國有一个人號做甕襲（みかそ，àng-si̍p），伊的狗共貉拆食落腹，佇貉腹肚底有藏八尺瓊曲玉。這个曲玉佇馬琴的《八犬傳》內底，為著描寫八百比丘尼妙椿有共借來用。猶毋過，垂仁朝的貉是干焦腹肚藏明珠，無像後世的貉是遐爾仔變化自在。按呢看起來，貉的化身應該是對推古天皇三十五年春二月就開始矣。
彼時陸奥國有一个擔海水的查某囡仔，佮仝庄一个燃海水的查埔囡仔戀愛。猶毋過，查某囡仔是佮阿母蹛做伙，欲見面著閃避阿母的目，𪜶是逐暗就想欲見面，兩人的互相關懷佮相意愛毋是普普仔爾。
查埔囡仔是逐暗盤過磯山來到查某囡仔厝的附近。查某囡仔攏是算好時間偷偷仔來相見。猶毋過，查某囡仔著愛閃避阿母的眼目，小可仔無拄好就會慢到。
有當時仔是等到月娘就欲落落去的時才來到位。有當時仔是到一四界上蓋早的雞啼嘛猶未來到位。
這款代誌連續發生幾若擺以後的一个暗暝，查埔囡仔跍佇若像屏風的岩石跤，為欲消磨等待的稀微就開喙大聲唱歌。滿腹操煩的心思用伊梢梢的歌聲拍拚共
唱出來，彼聲是強強欲共湧來湧去的海水聲壓過去。
阿母聽著歌聲就問睏佇邊仔的查某囝：彼是啥物聲？上頭仔查某囝是咧假睏，予阿母問二三擺了後，想講無應嘛袂使得。敢若毋是人的聲neh！——查某囝青驚就按呢應，欲共瞞過。
彼毋是人？曷到底是啥咧唱歌咧？阿母就問倒轉去。查某囝答講：無的確是貉，會按呢答完全是查某囝一時的變竅（piàn-khiàu）。——自古以來戀愛是一直會予查某人學著這款的變竅。
天光以後𪜶阿母就共暗時聽著歌聲的代誌，講予附近織蓆的阿婆聽。阿婆就變做家己聽著歌聲的一个人矣。貉會唱歌hioh？——喙是按呢那喃，阿婆閣講予一个割盧草的查埔人聽。
話就按呢傳啊傳，就傳到來到庄裡的乞食出家人的耳空矣。出家人對貉唱歌的原由做誠詳細的說明。——佇佛法有輪廻的講法，無的確貉的靈魂本成就是人的靈魂。若準是按呢，人做的代誌貉嘛會做，佇月夜唱歌嘛無啥物怪奇啊。----
以後，這个庄頭就出現幾若个人攏有聽著貉的歌聲矣。就按呢，到落尾就傳講
：有人看著貉矣。彼就是一个揣海鳥卵的查埔人，一个暗暝對海邊轉來，佇殘雪的反光看著岩石山的暗暗所在，目睭前有一隻貉那咧唱歌，慢慢仔咧行過來趖過去。
就按呢連貉的形姿嘛有人看著矣。紲落來，規庄的大大細細、查埔查某攏捌聽著貉的歌聲已經是自然的道理矣。貉的歌聲有當時仔是對海傳來，有當時仔是對山傳來。紲落來，有當時仔閣是對山佮海之間的一間一間的草厝頂傳來。毋但按呢，落尾是連擔海水的查某囡仔，有一暝雄雄予貉的歌聲驚一趒。——
查某囝當然知影彼是彼个查埔囡仔的歌聲。邊仔咧睏的阿母，喘氣聲看起來應該是睏落眠矣，伊就偷偷仔𬦰起來，那共門拍開一屑仔開欲看外口的動靜。猶毋過，外口是干焦有淡薄仔光的月娘佮海湧聲，無看著查埔人的影。查某囝有一觸久仔的時間是親像按呢四箍輾轉咧觀察，雄雄予冷吱吱的春天的夜風搧著
，那共喙䫌揤咧，愣愣徛佇遐。彼个時陣佇朦朦中，伊看著門前的沙埔頂懸，有一點一點的貉的跤跡。-----
這層代誌隨就傳到相隔有幾若百里遠的京城矣。紲落來，山城的貉是變做人，近江的貉嘛變做人。閣來連同屬的狐狸嘛開始變做人矣。來到德川時代，佐渡出現一位號做團三郎的，毋是貉抑毋是狐狸的先生矣，甚至是變做海彼爿面的越前國的人矣。
毋是會變做人，是相信會變做人——各位會按呢講嘛無一定。不而過，「會變做人」佮「相信會變做人」之間，到底是有偌濟的精差hannh？
毋但是貉，對咱來講，所有一切的代誌只不過是相信伊是「有」而已，敢毋是？ Yeats（イェイツ，葉慈）（7）的《Kelt(凱爾特)的黃昏》內底有寫著：Silsersee湖（錫爾斯湖）頂懸的囡仔，看著穿白衫佮青衫的基督教新教（Protestantism）的少女，自早就相信伊就是聖母Maria，閣是信甲神神。仝款是佇人的心肝底存在的代誌來看，湖頂的聖母佮山溝的貉並無精差啊！
咱佮祖先仝款攏是相信貉會變做人，咱是想欲相信咱心肝底存在的物件，敢毋是？就按呢，咱敢毋是生活佇咱相信的物件的命令所決定的生活方式？
這就是：是按怎咱袂當看袂起貉的原由！ （了）
譯注
1. 「貉むじな」原著 芥川龍之介 1917（大正6）年3月作，台譯稱「貉hô」。
2. 貉むじな：又稱貉子、狸，犬科動物。生活在山林中，晝伏夜出，以魚蝦和鼠兔為食。是一種珍貴的毛皮獸狸。學名：Nyctereutes procyonoides。 台語是貉hô。山貉suann-hô。
日本傳說的一種妖怪。也稱野箆坊（のっぺらぼう），是外表如同普通人類，但臉上無眼睛、口、鼻的日本妖怪。
3. 《日本書紀》是日本留傳至今最早之正史，六國史之首，原名《日本 紀》，舍人親王等人所撰，於西元681年至720年完成。記述神代乃至持統天皇時代的歷史。全三十卷。
4. 推古天皇：第33代天皇。在位36年（西元593〜628）
5. 陸奥：陸奥（みちのく）の塩竈（しおがま）：陸奥国Michi-no-kuni，令制国之一，屬東山道，現在的福島県、宮城県、岩手県、青森県和秋田県的鹿角郡。
6.《垂仁紀》：《日本書紀》第六卷。垂仁天皇（第11代天皇，西元前 69 年-西元 70 年，在位99年）時代的記錄。
7. ウィリアム・バトラー・イェイツWilliam Butler Yeats、1865年6月13日 – 1939年1月28日。威廉·巴特勒·葉慈，出身愛爾蘭的詩人、劇作家、散文作家。是 20 世紀文學界最具代表性的人物之一。
台文翻譯 Lîm Tong-îng2024.10.23
文章定位：
