台語文的楦闊（hùn-khuah）＠Tong-îng 的台語人生記錄

2024-08-09 11:43:44| 人氣19| 回應0 | 上一篇 | 下一篇

今仔日到病院「回診」，提《羅生門》(台文版) 這本冊送予我的主治醫生。

久年的老毛病佇幾年前老同學的推薦換來予伊看，毛病就攏坐落來，已經佮正常人仝款矣。醫生人誠親切，閣袂激派頭，我誠佮意。（全時台語的我，佮醫生是講台語就免閣加講）

欲去進前心肝猶咧躊躇，欲送抑是莫？就想講來試看覓。毋過，看診了後共冊提予伊的時、予我料想袂到：共冊反到「蜘蛛的絲」彼頁，本成我是想欲念予伊聽，我就未念，主治醫生就開始念，念一段長長長。閣較著驚的是念甲誠準！

我說明《羅生門》(台文版)這本冊的時，有感覺伊無聽過有這本冊。

這予我想著《羅生門：芥川龍之介短篇小說選Ｉ》佇六月初七出版，宣傳，新冊見面會，中央社、公視台語台訪問，閣聽講佇博客來、讀墨嘛賣甲袂䆀，銷售攏佇「排行榜」內底，物仔霸仔看起來是鬧熱滾滾，嘛予我的神經有一個月貼貼是弓甲絚絚絚。

按呢看起來，鬧熱滾滾是干焦是佇「台語箍仔」內底。就是時行語的佇「同溫層」咧互相焐燒，互相鼓舞爾爾。

看起來，欲按怎來楦闊（hùn-khuah）台語文這个箍仔是一个大課題，猶有一大段長長的路愛行！

***我嘛知影阮這輩的齊齊是「越頭族（ua̍t-thâu-tso̍k)」，看著誠傷心。毋過芥川佇100外年前就講過：「想著遮的代誌，良平強欲哭出來，想講哭嘛無路用，這馬嘛毋是哭的時陣。」（《羅生門》台車p119），拚落去就著。

（20240723Tong-îng）

《羅生門：芥川龍之介短篇小說選Ｉ》

有聲冊---布袋戲主演的聲音演出

我要檢舉

台長： Tong-îng Lîm

人氣(19) | 回應(0)| 推薦 (0)| 收藏 (0)| 轉寄
全站分類: 教育學習(進修、留學、學術研究、教育概況)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台