「賀 OO學長高中 XX 大學 OO研究所」＠Tong-îng 的台語人生記錄

2024-08-06 11:30:45| 人氣9| 回應0 | 上一篇 | 下一篇

我的記持內底：逐年的春天，大學各學系辦公室的公佈欄，會貼規牆仔的「賀 OO學長高中 XX 大學 OO研究所」紅條仔！

下早起想欲敨氣（日語：氣分轉換）騎Youbike到隔壁的大學，就是想欲去看這款的景色！踅欲到規十个系，干焦看著一个系有貼爾，閣是貼佇公佈欄頂懸的懸懸的所在。無像較早是親像咧相拚，逐系攏是貼甲規壁滿滿滿，足顯目的。有當時仔閣會貼到外口來咧。

我佇這个大學邊仔蹛40外年，這是逐年的春天校園的景色之一，其他的景色猶有，定定會看著一大陣、一小陣翕出業相的同學，運氣較好會拄著翕各班團體的出業相的日仔。（想著頂日是拄著翕團體的出業相）

有問同學𪜶敢知影貼這款的「賀 OO學長高中研究所」紅條仔？一位大二的同學，伊講毋知影有這个代誌。毋過，有一个講以前捌看過，閣講是教育部發公文禁止袂當貼的。

這就真怪奇neh！恭賀學長高中研究所是歡喜！是一種祝福！學長高中研究所是伊四年學習拍拚的成果，人生的一个崁站，值得後輩的祝賀。

閣問同學講：若是你「高中研究所」夆貼出來，你的感覺是按怎？一位查埔同學講：足歡喜啊！我嘛誠愛啊！一位查某同學講：我無愛，無愛家己的名夆貼出來！

這款好代誌汰著禁咧？真正是「愛管的毋管，無必要管的硞硞管！」

欲問𪜶的時，攏先問講：用台語問會使得袂？兩个查埔的隨答講好，閣攏是用台語答話。猶彼个某囡仔講伊袂曉，就用伊聽有的話問囉！

少年囡仔攏會講台語，咱就對𪜶講！講落去，就著！

（20240613Tong-îng）

我要檢舉

台長： Tong-îng Lîm

人氣(9) | 回應(0)| 推薦 (0)| 收藏 (0)| 轉寄
全站分類: 社會萬象(時事、政論、公益、八卦、社會、宗教、超自然)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台