小學的記持
我讀追分國民學校是1956年，阮彼時攏共國民學校叫做「國校仔」。咧想講到底是幾年入學的時陣，心肝隨浮出一二年的教室，教室塗跤猶是塗的、無鞏紅毛塗。是講阮攏褪赤跤嘛無差，只不過，拄著落雨塗跤會澹澹，跤踏著𣻸𣻸無蓋爽快。(會記得彼个時陣阮厝的塗跤嘛仝款是塗做的，落雨天嘛袂澹甲踏著會𣻸𣻸，應該是教室地質的原因)。
會記得拄入學彼時是用大布巾仔共冊包起來縛佇腹肚，就親像人講的「包袱仔」彼款的。會記得我國校仔六年攏是褪赤跤去學校，應該有一半个同學有穿鞋，年久月深矣嘛記袂清楚。毋過五六年的阮彼班升學班，查埔囡仔確實攏褪赤跤去學校，有幾个查某囡仔有穿鞋。
追分國校就佇縱貫線台一號。對校門入去的兩爿攏有規片樹仔，正爿閣有一窟噴水的水池仔，倒爿彼片樹仔內底有幾若欉蓮霧。猶會記得五年的歇熱，捌佮同學走去偷挽蓮霧食。
兩爿的樹仔閣過去就是運動埕，跑道是塗做的，跑道以外嘛是規片塗，會記得有發草的所在無濟。運動埕有升旗台，阮佇遐早會，下課佇遐排路隊才轉去厝。彼个時陣學校一年有四班。
會記得有一位仝庄慢我一年的囡仔，人真朝直、反應較慢行動較綴人袂著，功課嘛無好，排路隊的時就徛佇我的邊仔。有一位姓吳的老師捌佇排路隊的時，用話共詼，彼陣我是毋知這位老師出自好意抑毋是？毋過就感覺「不對」，後來認真共想：老師對這款較「頇顢hân-bān」的學生應該愛用「鼓勵」抑是「關心」的口氣才較合矣！講實在的我是看袂起彼位老師。
二年的時，有一位蹛營埔的查埔同學無來讀冊，後來才知影是佮厝裡的人冤家，家己食農藥自殺的，彼陣干焦想講伊汰會個性遐爾強。
一二年的老師姓楊（全名到今猶是記甲誠清楚），捌佇課堂變魔術予阮看，伊用帽仔共倒爿耳仔閘咧，叫阮看正爿耳仔會振動。後來大漢去想著，家己做看覓我的耳仔是袂振動。伊是蹛佇台中樹仔跤，捌看伊騎鐵馬，嘛捌看伊坐公路局的班車來學校。（入社會以後才知影我有一位同事蹛伊隔壁，幾年前才改建做大樓）
二年的寒天，教室北爿有一塊玻璃破去，北風sńg-sńg叫阮攏寒甲爍爍顫（sih-sih-tsùn），學校一直無叫人來補，後尾手是一个同學𪜶阿爸去裁玻璃家己來共補的，𪜶阿爸是蹛王田毛紡。
長長教室的中央有兩間教室是會當拍通的，就是欲佇落雨天拍通做集會用。我3年的教室就是佇兩間的東爿彼間，隔壁班若是咧念冊歌（全班號齊念冊），阮就聽無老師的講課矣。
三年仔的老師是湖南人，伊講話腔口誠重阮是一句就聽無，伊是教國語，規學期攏就毋知伊是教啥。干焦會記得有一條歌，歌詞阮攏共聽做「碗公，碗公，碗公佗位去？」毋過冊是寫：「反攻，反攻，反攻大陸去！」，就按呢，害我到今經過欲70年，這條歌是記甲牢牢猶會曉唱。
想著家己小學的代誌，就想著我阿爸國校仔是讀到4年，佮日本老師相罵就無愛閣讀。老師來到厝裡勸伊著閣去讀，伊就無愛。捌想講：阿爸若準有閣讀落去，伊的人生應該是無仝款，這款的「若準」嘛只是「若準」爾爾（仿芥川龍之介「羅生門」的字句）。毋過無愛閣讀落去的緣由，可能是做人大囝的阿爸想欲佮伊阿爸鬥做工課，因為伊下面有幾若个小弟愛食飯。
上會記得的是小學一二年學校是兩部制，就是分讀早起佮讀下晡的。拄著讀下晡的時，欲晝仔欲去學校進前，阿母猶佇田裡做工課——就因為厝裡田做少，阿母仝款愛去田鬥做。家己就凊彩（tshìn-tshái）挖飯坩內冷冷的飯丸齧（khè）齧咧就出門，去招一个同窗的做伙去學校。一个同窗𪜶阿爸佇做田以外閣做小生理，家境好誠濟，𪜶阿母攏佇厝裡會提早煮飯予伊食。有一擺，𪜶阿母問我食飯未？我照實講，𪜶阿母就捀一碗燒湯予我啉。經過幾若十年，彼碗湯的滋味佮情境到今猶是清清楚楚記佇心肝。這位阿嬸過身的時，我專工對台北駛車轉去共拈香表示我的心意。
五六年是編入欲升學考初中的升學班，這个升學班是另外一段的記持。
我的小學生活，講實在，應該無讀著偌濟冊！下課轉去到厝，冊揹仔抨咧隨就愛落田鬥做，往往是做甲暗眠摸。厝裡嘛只有一葩電火，「讀冊」攏是干焦是佇學校的時陣綴人讀的，轉去厝閣再做功課的記持是真薄。
這馬的人講：「欲當輸佇起跑點——小學」「人生的基礎由小學決定」（聽講起跑點已經提早到幼稚園），毋過，這嘛無的確，照我的經驗：這著愛看你有悟著「你有想欲創啥，閣有欲繼續做落去的決心」抑無？
（ 20240624Tong-îng）
文章定位：
