人濟的所在毋通去（2之1）＠Tong-îng 的台語人生記錄

2023-06-07 08:55:56| 人氣51| 回應0 | 上一篇 | 下一篇

人濟的所在毋通去（2之1）

驚某大丈夫，拍某豬狗牛。

Kiann bóo tāi-tiōng-hu, phah bóo ti káu gû.

這个俗諺是表示較早應該有真濟查埔人會拍某，才會用這个諺語來教示，來警告，來勸人毋通做。毋過，現代的人已經是倒擺矣。現代的人對濟濟的祖先的教示是攏無咧信篤，獨獨對這个教示毋但袂共放記得閣身體力行。

咱國的有娶某的查埔人是十个人九个攏講伊驚某，賰的彼个人是毋敢講。佇咱國有成立一个叫做「驚某協會Kiânn-bóo Association 簡稱KBA」的全國性的組織。
逐家攏知影每一个協會攏會收會費來維持。干焦這个KBA是無收會費，入會的時陣只要你宣誓講你是驚某就會使得。會員是有夠濟，就有真濟個人佮企業相爭捐錢寄付。特別是到選舉的時陣，遐个候選人就相諍捐錢。聽講有一擺的「幾合一」的選舉，捐錢的候選人傷過濟，KBA只好規定欲捐錢愛先預約。

這款的全國性的協會，這个會長就有足濟人想欲做。逐家攏知影咱國是足濟人愛有名份的，啥物長啥物長是足愛印佇名片頂懸的。全國性協會的會長印佇名片頂懸是偌奢颺咧你敢知。
聽講有一任的KBA會長選牢了後，共會長當選證書特別共入相框囥佇in兜的紅格桌頂。

四年一任的會長選舉是風動武林，驚動萬教。買票，縛柱仔跤，發行路工，集體𤆬去蹛旅館，恐嚇(khióng-hat) 等等的咱國的選舉的所有的奇形怪狀攏看會著。
到尾仔就共任期改做2年一任，就是欲予較濟人做會著會長，看會當減少競爭袂。按呢做了後的競爭確實是加減有較消退。
（Tongîng20230507）

我要檢舉

台長： Tong-îng Lîm

人氣(51) | 回應(0)| 推薦 (0)| 收藏 (0)| 轉寄
全站分類: 社會萬象(時事、政論、公益、八卦、社會、宗教、超自然)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台

人濟的所在毋通去（2之1）

Tong-îng 的台語人生記錄人生一步一步的跤跡，用阿母的話一字一字寫落來！台灣人寫台灣字，天公地道。
0愛的鼓勵 0訂閱站台