獅．石．史．識 我叫做石牧民，我主張台灣獨立。 知識分子要是沒有抑鬱以終那也算是遜掉了。 我。 2.0 海外版

8,473愛的鼓勵 0訂閱站台

今仔日讀冊ê感想：


閣較無成個月，我就（tō）愛出發去美國讀博士。

這是第二擺，我欲離開爸母，去到他鄉。我感覺著咧欲（teh-beh）告辭爸母ê憂悶。我慣勢（kuàn-sì）讀冊來解心悶，就共（kā）美國作家Marilynne Robinson所寫ê《Gilead》提來讀。逐擺看彼本冊，攏是我感kah上接近阮爸爸ê時刻。果然，今仔日看著ê部分，使我了解著阮爸爸四年前ê目屎佮心聲。

四年前，我頭一擺欲去美國留學進前，親情（tshin-tsiânn）去佇機場相送。咧欲登機ê時，阮爸爸開始流目屎。阮爸爸足罕咧哭，彼陣目屎煞流kah四淋垂（sì-lâm-suî），阮逐家攏驚著。

爸爸共我講：以後你若有了解我ê目屎，著共寫落來。

今仔日透早，我teh讀ê《Gilead》提起著《聖經．創世記》第21章。有幾逝（tsuā）經文，我一leh看著，就想起阮爸爸佮伊ê目屎。

《聖經．創世記》第21章內底，Abraham必須將Hagar佮Ishmeal母仔囝送入ì曠野。Abraham毋甘，毋過姑不而將（koo-put-jî-tsiong）。囝兒佇曠野敢有通食？敢會當活落ì？Abraham家己是無能為力（bû-lîng-uî-li̍k），干焦會當信靠上帝會保守伊ê囝兒。

我來想著阮爸爸ê目屎。

我孤單一ê人去美國讀冊。阮爸爸準定（tsún-tiānn）會毋甘。飛行機一咧載我起飛，伊就無法度閣再保護；我一咧離開伊ê身軀邊，著愛倚靠家己，面對大大ê、路歹行ê世界。佮Abraham仝款，阮爸爸目睭金金，看家己ê囝兒行入ì曠野。

伊真毋甘，毋過，伊姑不而將。

阮爸爸猶真少年就出社會趁食（thàn-tsia̍h）；猶足少年，就離開爸母，進入社會這ê曠野。伊知知，人若欲真正轉大人，干焦家己一ê行入ì曠野這條路。伊看我咧欲離開，咧欲孤單去走傱（tsáu-tsông）⋯

閣較毋甘，嘛愛我大漢；閣較毋甘，嘛愛我家己會徛起（khiā-khí）。

干焦會當信靠伊嘛無啥了解ê，天父、天地ê慈悲，會共我保守。想袂到，按呢堅信，猶原袂止操煩⋯

毋甘、不得已、操煩⋯佇心肝頭相kheh，kheh做目屎，輾落來。

阮爸爸ê目屎，我tsit-má看有。

我咧欲來離開。離開進前，想欲求我嘛無啥了解ê，天地ê慈悲，保守我ê爸母，保守爸母ê操煩，予in得著安慰。

保守我ê爸母。我去讀冊，連鞭（liâm-mi）轉來。


釋義：
咧欲（teh-beh）→快要、將要
慣勢（kuàn-sì）→習慣
親情（tshin-tsiânn）→親戚
四淋垂（sì-lâm-suî）→涕泗縱橫
趁食（thàn-tsia̍h）→討生活
走傱（tsáu-tsông）→奔波
徛起（khiā-khí）→立足
連鞭（liâm-mi）→馬上