就欲消失的行業---送報紙
透早起來的頭項代誌就是去提報紙，久年來的慣勢到今猶是無變。最近，應該是有一站仔時間矣，早起時7點外去提就罕得提有矣！若是閣較早去就閣較免講。報紙若是猶未來，守衛仔是遠遠看著我行倚來就會先搖頭。這馬八點以後才送到，也已經是變做”正常”的矣。有當時仔猶會袂記得送！
捌敲電話問報社，通常的回答是送報紙的Oo-tò-bái 壞去啦！送毋著去啦！有當時仔閣會唱哭調仔予你聽，訂報紙的人少，就無人肯（khíng）送啦，----
認真共想起來，自從網路興（hin）起來。看報紙的人是愈來愈少，訂報紙是閣較免講矣。譬如我蹛的這个大約40戶的社區，已經是賰2戶有訂報紙矣！
我有做一个簡單的田調：問社區的幾位守衛，𪜶捌佇別的社區做過，遐的社區這幾年來的訂報紙的狀況。答案大約是一二百戶的社區訂報紙的極加（ki̍k-ke）是2-3戶爾爾，猶有百幾戶的社區訂報紙是干焦一戶-----卻是訂「國語日報」。有叫做是「豪宅hâu-tsâi」的有10幾戶，20幾戶的社區，訂報紙的攏是0戶。看起來訂報紙的愈來愈少是趨勢，看起來是「不可逆put-khó-gi̍k」。
報紙少人訂，送報紙的送的範圍就愛擴大，送的時間增加，油錢嘛增加就愈來愈無人愛送矣。
送報紙這項代誌予我想著古早一位仝庄的，做伙大漢的小學同窗。阮兩个真相好，讀小學攏是做伙行路起學校。後來伊考牢世新編採科，出業了佇台北的啥物出版社做幾年了後，就轉去故鄉送報紙。
彼个時陣伊轉去故鄉送報紙是予我驚一趒，我是較按怎想就是想袂曉。
猶毋過 1970年代的報紙佮這陣是無仝款的，是大興大盛的時代。伊毋但有送報紙的收入，猶有招人定報紙，挾廣告單，閣有招人登廣告等等的收入。
這馬的人恐驚較毋知，當時的報紙是「社會傳達消息的主要工具」。刊廣告的是無奇不有（bû kî put iú），商業講告，徵人廣告，分類廣告是無奇不有。
公司行號欲招人攏是佇報紙刊廣告。當初我入社會揣頭路，嘛是看報紙的徵人廣告。
「分類廣告」是足時行（sî-kiânn）的，嘛是真有需要的。刊「訃文hù-bûn」 「證件遺失」、「警告逃妻」、「警告逃夫」等等。
彼个時陣有名的人攏會佇報紙刊「訃文」，較有錢的刊佇頭版。
當時的規定是證件拍毋見（phah-m̄-kìnn/phàng-kìnn）就愛刊「分類廣告」做證明才會當補發。
彼个時陣是定定看著的「警告逃妻」，罕罕才看會著「警告逃夫」。當時我是袂當理解。數十年後的這馬是按呢想：
佇彼个時陣
「查埔人是無查某人扞（huānn）家就活袂落去的。
查某人無查埔人是日子照過」
彼个時陣的查某人應該是比查埔人較「儼硬giám-ngē」。
我這个同窗轉去送報紙做無幾年，看起來是有趁一寡仔錢，庄裡的人面嘛有矣。就佮人選村長閣就選牢，變成一个村裡的有頭有面的人士。伊是送報紙建立伊的人生事業。
當時我猶佇追求人生事業的路途咧沐沐泅（bo̍k-bo̍k-siû），猶毋知當時會當靠岸（khò-huānn）咧？
彼个時陣的送報紙是會當建立人生的事業，是會當蓄（hak）田園，蓄家伙（ke- hué）的。
這馬的送報紙是無人愛做，就是袂趁，趁無錢才會無人欲做。
這款資本主義的道理是袂違背的。這款的時代的潮流佮變遷，是無人擋會牢的。
（230723Tong-îng）
文章定位：
