好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

逐家（大家）攏畫甲遮爾好，我哪會攏袂進步！每遍看同學的作品，我就按呢怨嘆。

一遍心內閣按呢想了後，問家己，「逐家？」

逐家是偌濟人？

想著囡仔讀小學的時，若吵欲買啥物件，就講伊的同學「逐家攏有」。

有一遍，伊講逐家攏有啥牌的鞋時，我問，「逐家？規班的人攏有？」

「無啦，差不多一半的人有爾。」

看伊一聲退遮爾大步，我感覺趣味，繼續問，「二十外人有？」彼陣，一班的學生有四五十个。

他想一時仔，「無遐濟，可能十个啦。」

我繼續和伊做心算，落尾伊講六个同學有彼款鞋。

「kan-na（只）六个，袂使講逐家。」

囡仔老實，袂曉講媽媽嘛是不時膨風，講「逐家」。

比論我會講，「逐家攏有法度早早寫好功課，你哪會遮爾gâu（會）拖！」

「逐家攏會聽老師的話，你哪會意見遐爾濟？」

到讀中學，伊講無愛做「順民」的時，我嘛是講，雖然學校/老師有一寡規矩無適當，「逐家都會當接受，你哪會…..」

「逐家」這个詞意思含糊，毋過真好用。敢若講出來，氣勢就大起來。

2017.4.30《自由時報》副刋