好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

         
       咖啡店柱仔頂貼一張海報，推銷in新出的三款雞卵糕。雞卵糕號的名和說明的口白攏古錐古錐，閣淡薄仔笑詼。

這个時代做生理（意），毋是產品排出來著好，閣愛用一寡有文藝氣味的廣告來唌（siann5，引誘）消費者；上好閣有特別的故事。

有的餐廳誠工夫，出一个菜，服務生就踮邊仔講 / 背一堆說明。這是牛/豬的佗一部位，師傅燖（tim7，燉煮）三點鐘，才遮爾軟閣khiu7（有彈性）；這盤荷蘭豆仁是用豆腐絲、毋是麵線炒的，工夫好才有法度共豆腐切甲遮爾幼，炒甲遮爾好食；這是……

念煞，才講，「請慢慢仔享用。」

有時聽著趣味趣味，知影彼盤菜的履歷、營養成份、做法，感覺伊的身份提懸（高）起來，正經較用心食；按呢才袂辜負著食材的價值和師傅的工夫。

一遍佇大飯店用餐，服務生紹介一隻「先知鴨」，講伊是飼佇宜蘭稻田內的鴨仔，有機，肉特別甜。「恁知影是按怎伊叫做先知鴨無？」阮無應話，恬恬聽。伊講蘇東坡寫過一首詩，「竹外桃花三兩枝，春江水暖鴨先知。蔞蒿滿地蘆芽短，正是河豚欲上時。」

  等伊念煞，閣大約仔解說詩的意思，阮才開始食。看伊對家己的工作遮爾（這麼）認真，阮呵咾伊講了誠好，彼盤鴨肉食起來嘛加一點仔詩的氣味。

毋過有時餐廳吵，抑是腹肚枵的時，聽人佇邊仔踅踅念，講一寡有的無的，加減嘛會煩起來。

各種產品也愛有故事，這是佗一代傳落來的，當初是啥物原因去做這途，得著啥物高人的指導抑是古早某乜人的祕方等等，故事好聽閣帶淡薄仔傳奇愈好。

莫怪有的影星也愛編家己的身世和人生經歷，有的編了誠好，逐家聽甲「耳仔覆覆」，對彼个人有欣羡，有欽佩；對伊的產品就愈有興趣。

毋過，有的編了傷過頭，尾後予人煏空（piak-khang，事情敗露），就真歹看矣。

2017.4.30《中華日報》副刋