好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

             張光賓的字

「硯台敢無台語？」

久長以來，我和玉蕙兩人保持互相寄文章予對方欣賞兼「掠漏」的習慣。這是伊讀我台語文「來去買毛筆」了後問的關鍵問題。

「敢有？我讀國校時就講硯台啊。」

「你上好閣查一下。」

結果一下查，哎唷，「墨盤」遮爾好聽、遮爾古意的名，我哪會共伊袂記得甲遐爾澈底！

墨盤，墨盤，墨盤。我連紲講三遍。

讀國校時當然有講這个詞，毋過，五六十年無聽過，我哪會記得伊叫啥名！這陣，明明是真熟的人名，有當時仔拍拚想兩三工都想袂出來呢。

念過三遍，親像「烏麻仔（芝麻）開門」，做囡仔時用毛筆和墨盤的經驗就轉來矣。

小學四年開始接觸毛筆，可能是本底寫的字就端正，毛筆攑咧雖然若攑箸，寫出來的字猶是予老師呵咾著－－至少比真濟同學畫的「符仔」較好。有一个禮拜日，和蹛（tuà，住）佇附近的同學去學校耍，閣予老師「掠」去辦公室特別指導一下。

五六年時也有書法課，字寫了按怎，我無印象， kan-na（只）會記得身軀穿的衫不時會沐（bak，沾）著烏墨，好佳哉媽媽有撇步；伊用糜抑是泔（ám，米湯）去挼（juê，揉），就洗甲清氣溜溜。（聽講衫袂使先去沐著水。）

閣會記得我狡怪，共毛筆囥佇翹起來的喙唇面頂，然後挑戰同學，「你會曉按呢無？」

「會啊，這有啥困難！」趁伊喙唇翹起來、筆管囥好勢（hó-sè），我就出手共毛筆抽過來。哈哈，一撇烏墨畫佇伊喙頂，敢若發喙鬚！

讀初中以後，著用小筆寫週記，彼是「行禮如儀」，抄報紙面頂「一週大事」，閣凊彩寫一點仔「生活檢討」，就準算；字媠bái（醜）無啥要緊。

寫大字嘛是若有若無的課，毋過初中二年有一遍書法比賽，我竟然得著第一名。彼擺，我連筆墨都無紮tsah（帶），臨時共坐隔壁的同學借的。伊也有著等（得名次），毋過一定是心內不服、毋甘願，過後伊講筆予我用過了後，毛性走精，變真歹寫矣。雖然是笑笑仔講，也是有機會就講一遍。

莫怪伊不服，伊是外省囡仔，老爸佇公家機關食頭路，規定查某囝逐日練字；本來就有一个程度的人，輸我這个連中鋒都袂曉的「半桶師」，連我都感覺袂過意。

凡勢（huān-sèi，可能）是我拄好有文曲星照著，抑是評審的老師對我較偏心，彼學期我竟然也提著作文和英語朗讀的冠軍。這佇阮兜（tau，家）是破紀錄的代誌（佇我這世人嘛是），爸爸一時歡喜，就共一个長形匾內底媽媽繡的孔雀圖收起來，換囥我的三張獎狀。倒佇榻榻米面頂，攏會看著in，彼陣，我家己嘛有一點仔衝（tshìng，神氣）起來。

尾後，獎狀佗位去無重要，較可惜的是媽媽彼幅五彩的孔雀圖無好好仔收起來；彼當時若知寶惜，這陣應當猶佇咧。媽媽的針黹（tsiam-tsí）誠好呢。

印象當中，高中以後就無閣寫大字；到十外年前退休，學書法、水墨畫，才閣用著毛筆。

毋過，猶是無用著墨盤。

Tsit-má（現在）墨汁遮爾方便，除了書畫家，幾个人會遐工夫去磨墨？有一个同學講伊磨半點鐘才有通寫一張對開的宣紙，予我愈無想欲去用墨。

而且，一罐270cc的墨汁，就予你寫足久，寫甲烏暗眩（眩暈，眼前發黑）矣。

我用墨汁閣比別人較省，別人照起工用墨汁練字，我搵（ùn，蘸）水寫佇毛邊紙頂頭，欲寫偌濟張，攏免驚拍損（浪費）；紙焦了後，會當一遍一遍閣寫。按呢敢毋是較環保？貧惰（pîn-tuānn）有理！

  有一遍，水墨老師講，「你這張是毋是磨墨畫的？」我感覺伊是咧鼓勵我應該愛用墨條矣，就共一个貯（té，盛）墨的柴盒仔uì吊櫥頂提落來，彼是二十外年前日本人送的；兩條墨囥佇絲仔巾面頂，看起來誠高貴。可惜，毋知是in的品質無偌好，抑是真濟年來擲佇桌仔角彼个來源袂記得的「硯台」較粗俗，磨起來的墨色較淺，我就共in收起來矣。

今仔日，既然予「墨盤」這个名迷著，頂日去買毛筆的時閣有買一條墨，無定著也來買一个較好的墨盤。

啊，墨盤，竟然予我順紲想著墨斗！彼款木工搝（giú，拉）出墨索仔，繃絚 （ân，緊），佇木材頂頭畫直線的物件，我做囡仔的時猶有看著；這陣若欲看，大概就愛去文物館啦。　

原載2016.9月號《文訊》雜誌