好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 

                

我房間的衫櫥仔門是我的畫廊。

我佇面頂黏一款柴夾仔，三扇門各有一組。每遍畫好一張圖，就共伊夾起來；按呢，每日行來行去，總是會看幾若遍，會當看著in的缺點，知影按怎改；嘛會當看著in的優點，家己歡喜一下。

真早以前，一个厝邊無佮意（中意）人共伊做的親情（事），嫌對方䆀（bái，醜）， in老母講，「媠（美）敢會食得；看慣勢就袂䆀矣。」

這句話有道理，有的人，初見面時你對伊外表的分數有較低，毋過熟似了後，凡勢（huān-sè，也許）是伊的性地好、人巧，抑是講話趣味，就慢慢仔感覺伊媠起來矣。

對我家己的圖也是按呢，拄仔（剛）夾佇門頂時，有一點仔自卑，「這款作品，敢好提去予老師看？別人攏畫甲遐爾好！」毋過，一遍、兩遍，一日、兩日，愈看愈好，竟然親像咧佮（跟）人賭氣，大聲講，「是咧偌䆀！」（哪有多醜！）

有時輕聲講，「啊袂啦！」

這句話佇阮兜（tau，家）有歷史意義。

我第一个囡仔出世十二日，我的外家照風俗來「送庚」（送嬰仔衫、嬰仔帽等等），我的媽媽抱著初見面的嬰仔斟酌（tsim-tsiok，仔細）看，恬恬仔看，過真久，才講，「啊袂啦！」 伊是足細膩（sè-jī，謹慎）的人，這句無意中講出喙的話，明明就是因為心內想「爸母攏生做袂䆀，哪會…..」。「啊袂啦」是安慰家己「嬰仔袂䆀啦」。 好佳哉，後來，阿媽對這个孫仔愈看愈滿意，伊讀幼稚園時，竟然問伊，「你是毋是恁彼班上媠的？」 對我家己的圖，我安慰家己，「啊袂啦！」然後，嘛是對in愈看愈有信心（我的圖並無一日一日大漢啊）。尤其時間拄好，日頭照佇圖面頂的時。 向南的厝，日頭會uì（從）窗仔入來巡巡看看咧，行到衫櫥無路矣，才歇佇我的圖面頂。
看著日頭替我的圖拍光，一時攏驚著，徛咧欣賞。老師不時講畫圖愛肯定，「毋免驚，像按呢烏白舞，水彩共糊落去！」看起來，日頭有做到「肯定」，大筆大筆撇，光和影予靜物抑是動物活起來矣。 有一工，日頭照佇葫蘆面頂，予in敢若生佇園仔內。提相機翕（hip，照）起來，其中一張，我的手也翕佇相片內，親像我咧挽葫蘆呢！ 原載2016.9.6《中華日報》副刋