好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 

  佇日本高山市買一个風鈴，風鈴聲音響亮閣感覺有一點仔少女的活潑；吊佇客廳，有風的日子，規厝間叮叮噹噹，真好聽。風鈴下面彼片有「飛驒路」三个毛筆字的長紙片，反來反去，也親像查某囡仔咧跳舞。

囡仔轉來，聽無歇睏的風鈴聲，講，「按呢直直咻咻叫，恁睏的時敢袂真吵？」咻咻叫，這个講法心適；有影伊敢若真著急，拍拚欲講啥。我講，「袂啊，這款聲好聽，袂噪耳。」

講煞，隨想著，「暗時，客廳的門一定會鎖起來；無風，伊就袂咻咻叫啊。」

紲落（suà--lo̍h，接著）閣想著，「自彼年予賊仔驚著以後，暗時客廳的門就毋敢拍開矣。」

無講袂記得，彼是二十外年前的代誌矣。

彼暗半暝，先生目睭擘金（睜開），看著眠床邊仔有人影，越頭看，我睏好好。一時大驚喝起來，彼个人就自事先開好的門逃走出去矣！

報案了後，警察來看，判斷賊仔是uì（從）外牆peh入去樓梯間二樓開開的窗仔內，行到四樓才攀到阮的陽台。這款好跤手，竟然毋驚跋落摔死。伊的運氣足好，阮客廳的玻璃門開開，敢若咧歡迎伊；彼工先生吊佇壁勾仔的西裝褲閣錢飽飽，台票外票總共有六萬外箍。我三个空的皮包伊也搜過，擲佇陽台；可能是看皮包內底無錢，毋甘願，才閣徛（khiā，站）佇眠床邊探頭。彼日，我用的皮包佇眠床跤內角，才無予伊偷過手！

後來，我發覺梳妝檯的屜仔伊有動過，可能是瞭（瞄）一下無看著有啥值錢的，並無好好仔搜；毋過，囡仔房間冊桌屜仔內的一个金手指無去矣，可見逐个房間伊攏有巡過。半暝兩點外當好睏，囡仔準做有佇厝，可能也袂發覺賊仔來。

彼暝，我著驚甲強強欲吐；半暝有歹人行到你的眠床邊，啥人袂驚？伊也可能有紮（tsah，攜帶）刀仔啊。毋過，經過再三考慮，阮猶是毋願鬥（裝）鐵窗；嫌歹看。阮的防賊辦法是樓梯間二樓的窗仔關予好；閣有，欲睏進前，會記得共客廳門的勾仔圈（khian，鎖）起來。雖然熱天時，客廳的門拍開，厝內加真涼。

著賊偷兩三年後，雖然有飼狗，門也是盡量圈起來。

七年前，狗離開了後，阮就恢復無管寒熱，暗時客廳的門一定圈起來的傳統；所以，這陣，阮睏的時陣，風鈴也會當恬恬仔休息矣。

2018.12.23《自由時報》副刋