好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

        

立冬透早，就有兩个LINE群組傳來今仔日立冬的消息，講「立冬補冬，補喙空」。這句話，自做囡仔就聽媽媽講過。補冬，一般攏是補熱的，可比麻油雞抑是漢藥燖（tīm，燉）雞；所以有人寄大隻雞的相片，講「予你補冬」。

毋過，一方面天氣遮爾（tsiah-nī這麼）熱，超過30度，一方面，我攏囡仔轉來的時才會好好仔煮料理；所以中晝我kan-na（只）煠（sa̍h，燙）一塊梅花肉，批薄薄仔，佮薑絲搵（ùn，蘸）豆油就算是補冬矣。

下晡，佇朋友的面冊頂頭看著一張店頭的廣告，寫：今仔日立冬，特別供應龍眼米糕糜。

著喔，我哪會袂記得這味？冰箱內底有囥（khǹg，放）誠久的尖秫米（糯米），有龍眼乾；我隨去洗米，兩杯米兩杯米酒和一丸龍眼乾肉囥落去電鍋煮；等煮熟烘好才攪一寡糖入去。

幾十年前，毋是不時有雞肉通食，寒天時，阮媽媽就是炊龍眼乾米糕來予阮補。媽媽慣勢等阮睏一醒的時才叫阮起來食，是毋是伊感覺食有摻米酒的米糕上好是睏睏仔食，閣包佇被內，營養才袂揮發掉？（彼陣，無喙齒保健的觀念。）

想著食米糕，敢若看著媽媽掀榻榻米頂的蠓罩（蚊帳）叫阮起來的情形。

無幾工前，一个朋友講伊感覺悲傷，伊的老毋才過身兩年，伊竟然罕得想著伊；真不孝。我安慰伊，毋免刁工、專工去想，過身的爸母無所不在；尤其是媽媽，看著、聽著一句話、一段文章、一个動作、一个風景，攏有可能去想著伊。

Tsit-má（現在）食龍眼乾米糕，媽媽的面容、媽媽的聲音，我就攏感覺著矣。

2018.12.20《聯副》