好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

       阮媽媽在生的時，若佇電視頂看著彼位阿媽級的台語演員，就講，「阿蜜仔猶咧拍電視呢。」

毋但繼續搬戲拍電視，而且紅到老。伊無算偌媠，毋過，鄉土型人物，表情動作自然，看起來非常親切。新聞報導講伊巧，反應緊（快）；演戲的時，會講一寡劇本頂頭並無寫的台灣俗語，導演足呵咾。可比「無魚蝦嘛好」、「講你媠，你就講你無洗面」、「四界投（tâu，告狀），投甲無看著喙」之類。

這个媽媽講的「阿蜜仔」真濟年前是阮阿舅的情人。少年時的阿舅人緣投飄撇，逐家叫伊「烏狗坤」。

媽媽講，「阿蜜仔少年的時肉白白幼幼，也真媠；閣是新劇的演員，敢妝，穿插時行，人叫伊烏貓。」烏貓不時佇外媽兜（tau，家）出入，阮外媽無反對；媽媽也共伊看做未來的弟婦仔。可惜後來外媽嫌伊袂生，替阿舅另外揣（tshuē，找）一門親。

阮這个明媒正娶的阿妗骨力（勤快），對序大有孝，和大姑小姑也親。毋過，阮媽媽對彼个無緣的弟婦仔猶是有感情，講後來阿妗無生一男半女，才知影袂生的其實是阿舅。「真冤枉。毋過，我毋敢講半句話；有一遍恁爸爸無意中提起阿蜜仔這个名，恁阿妗就無歡喜；共恁大姊講，莫叫我阿妗，彼个阿蜜仔才是你的阿妗！」

大姊予阿蜜仔疼過，彼時陣，阮爸爸的頭路佇水里，為著欲予查某囝讀較好的「都市的」小學，留大姊佇員林外媽兜。放假日，阿姨才tshuā（帶）伊去水里，有時爸爸轉來tshuā。

媽媽講阿蜜仔離開阿舅了後，bat（曾）去外媽兜，講伊一个齒杯袂記得提去。「伊是揣一个理由來探頭，看恁阿舅這陣啥款。」

經過誠濟年，媽媽才佇電視頂看著伊。「自舞台劇演到電視，真有本事。」
  因為知影這个演過真濟連續劇的查某人和阮阿舅有過這段故事，佇電視頂看著伊，就感覺有一點仔微妙的親切。

毋過，阮姊妹仔講，伊若做阮的阿妗，也無一定會幸福。畫看板的阿舅人趣味，gâu（擅）趁錢；但是，講著做人翁婿的表現，阮阿妗就罕得有好話矣。

2019年元旦《自由時報》副刋