好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

     

彼間偏僻的民宿有一欉三四層樓懸（高）的小葉欖仁樹，暗時阮「摸」到遐的時，我就予伊煞（sannh，迷）著。伊姿態足媠，徛（khiā，站）佇光線無啥明的所在，有一種神祕的魅力。第二工早時，氣氛無仝，樹仔清清爽爽。主人講樹仔是十七年前in（他們）來買這塊地的時就種的；十七歲，當青春。樹椏跤閣有吊一个韆鞦，敢若一幅春天的田園圖。

誠久毋捌（不曾）看著這款物件，想著做囡仔的時，我幌韆鞦足本等，徛咧抑是坐咧，攏會當幌到天頂－－毋是天頂，是會超過吊韆鞦的鐵管/樹箍啦。有時和同學相對徛咧幌，嘛真心適。

我兩个囝細漢的時有幌過無？竟然想袂起來。

雖然毋是耍這的年紀，既然出門度假，做「非常」的代誌敢袂使？我就按呢坐佇狹狹的柴板頂頭，開始幌；輕輕幌一二十下，頭殼就淡薄仔眩起來。我本來就是平衡感無好的人，連佇公車頂頭看手機仔也會眩啊。

但是，有翕相（hip-siòng，拍照）有證據，會當提來展，我共相片貼佇拜四食飯團Line群組，也發表感想，「這陣台北的公園敢若罕得看著韆鞦，我看過的韓國連續劇內底，in出現幾若遍；坐佇韆鞦頂家己想心事，抑是兩人講話，特別有故事、有氣氛呢。」

紲落去（suà--lo̍h-khì，接下來）怨嘆：「咱的公園若有韆鞦，佇遐（hia，那兒）曝日頭、開講，就會當幌幾下矣。」啥人知影，隨有人回我，「小姐，你有看無見，咱的公園有韆鞦啊。」

有影？佇遐出出入入歹算擺，哪會毋捌看著？正經大目新娘無看見灶。我去遐的時，愛抾（khioh，拾）落落來塗跤的葉仔，尤其是麵包樹的；竟然無去注意著遐的運動遊樂設備。人的目睭看的和頭殼記起來的，攏是選擇性的啊。

第二日去厝附近的公園運動，我斡（uat，轉）去看邊仔的小遊樂場，也有韆鞦！

不過，毋是縛佇樹仔的韆鞦，猶是較無美感，莫怪我袂去注意著。

2021.4.11《聯合報》副刋