好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

  著獎矣

提一疊發票出來對的時，我講，「看會著著一千萬無。」一千萬是特別獎，運氣好的人kan-na（只）買一二十箍的物件就著著。

凊彩講講，錢和我的緣份一向真淺，免講這種意外之財。

對咧，對咧，咦，這張和頭獎的尾三字仝款。

繼續對，這張和陸獎仝款。

真稀罕，竟然有兩張著獎，今仔日財神爺注意著我矣！

聽過一个少年的朋友講，伊若欲對獎抑是摸彩的時，會共（kā，把）彩券貼佇胸坎仔前，對伊講好話，希望得著啥物件；結果幾若擺正經心想事成。伊講，講出來，目標明確，神明才有辦法來鬥相共（幫忙）。

所以，閣紲咧對發票的時，我心內念一千萬，一千萬。結果，可能誠心無夠，也無共發票貼佇胸坎仔前；雖然有閣對著一張，猶是兩百箍的尾獎爾。

三張合起來嘛才六百箍，心情一時卻誠好；至少表示這回的運氣袂bái啊。

想著一个佇大學教冊的朋友講，伊一遍提著千二箍的監考費，同事怨嘆這屑仔錢毋值著消磨的體力和時間；伊卻歡歡喜喜，講欲提去買三塊古典CD，好聽的音樂有通聽幾若年。「按呢，彼就毋是kan-na一个小小的數字矣。」

著，六百箍會使買二十外張的宣紙，每一張裁做四張，會當予我畫/寫甲烏暗眩（眩暈）。老師講「驚驚袂著等」，用意外得著的錢去買紙，烏白畫嘛袂感覺無彩（可惜），無定著會畫出較有膽的作品。

風颱了後，菜起價，一粒高麗菜就一百箍；六百箍會當買六粒，予阮食甲叫毋敢。毋過，猶是買栗子金瓜較好，好食，閣會囥（khǹg，放）得，六七粒排起來若「裝置藝術」，會使看誠久。

閣有，天氣熱，七八分的褲較實穿，前日我舞規半晡才共一領長褲改短；我得著的教訓是，這个錢予人趁，較實在。佇菜市仔一領褲改短才一百箍，我有兩領想欲改，六百箍提來用，猶賰（tshun，餘）四百箍通買一枝毛筆！

愈想愈歡喜，敢若六百箍用袂完，會當買菜，買紙，買筆，閣予人改褲矣。

                                                                                                                   

像毛蟹按呢坦橫行 

做伙學畫圖的一个同學讀著我一本冊了後，大驚小怪講，「前後和你同窗三四學期，竟然毋知影你是作家，閣寫甲遮爾好！我若是你，一定足聳勢（sáng-sè，神氣），像毛蟹按呢坦橫行路！」那講，伊肩胛頭弓懸，做一个敧（khi，傾斜）正爿（右邊）歪倒爿（左邊）的動作。我笑起來，講作家滿滿是，若是連我這款細跤的行路都像毛蟹，規街路一定全全是橫咧行的毛蟹矣，閣攏是比我較大隻的。想著街路予大細隻、五彩的毛蟹占去，愈好笑。

講起來是隔行若隔山，這个同學才會感覺作家真稀罕；像阮佇文壇江湖幾十年，較有來往的朋友十个有九个是攑（gia̍h）筆的，根本無感覺作家有啥好風神的。真濟作家寫甲足好，予我欣羨兼欽佩，當然愈袂感覺家己有資格驕傲。

講著驕傲，我的查某孫（侄女）讀北一女的時，我共伊講南部來的囡仔會當考著北一女，無簡單；毋過，愛像阿媽不時講的，做人愛謙虛，毋通驕傲。伊笑起來，「無啥好驕傲啊，我身軀邊攏是北一女的啊。」後來，伊考入去台大，「歌仔戲仝款按呢搬」，我這个做阿姑的閣提醒伊毋通因為讀台大就驕傲；伊仝款笑咧應我，「無啥好驕傲啊，我身軀邊攏是台大的啊。」

和邊仔的人仝款身份/背景，確實較無差別心。不過，無管和啥物款人做伙，較謙虛咧總是較好；真濟人是烏矸仔貯（té，盛裝）豆油，你看袂出伊的輕重。講我畫圖班的同學就好，有的人退休以前就誠有成就；有的人生活經驗豐富，做過幾若種頭路；有的人的藝術才情袂輸專業的；有的人的專心和定力，毋是普通人有的。這位講伊若是我，會像毛蟹坦橫行路的同窗，毋但圖畫甲足好，來上課閣是「盤山過嶺」，愛坐兩點外鐘的車；這款學習的精神，我萬萬不及。

原載2017.9月號《文訊》