好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

畫圖班一个同學講伊細漢時，伊的媽媽做過補絲仔襪的頭路，白嘉莉一寡仔電視歌星捌佇in兜（tau，家）出現。

哇，補絲仔襪，真久以前的行業矣。

五十外年前，絲仔襪猶未普遍，時行的人才有咧穿。

我第一遍看著「玻璃絲襪」是讀高中的時，英文老師鼓勵阮交外國筆友，練習寫英文批（信）。其中一个同學共美國筆友寄予伊的一雙「玻璃絲襪」提來學校展寶，逐家看甲真趣味，「原來玻璃絲襪生做這款。」無偌久前，真濟人看過一齣美國的歌舞電影，就叫做「玻璃絲襪」。

上早的絲仔襪是真絲，非常貴，聽講價數和查甫人的領帶差不多。我第一擺見著的應該是化學品nylon做的。一方面因為逐家對nylon無了解，一方面絲仔襪透明光彩，所以叫做玻璃。同學好奇，想欲摸，彼个同學就出聲喝，「較細膩（sè-jī，小心）咧，才袂勾破去。」

我出社會食頭路一段時間了後，才開始穿絲仔襪。穿起來跤腿的肉色較媠，腿形嘛變較好看。毋過當時絲仔襪的長度kan-na（只有）到大腿，愛家己束糾帶（kiù-tuà，鬆緊帶），穿久袂爽快；用吊襪仔帶嫌費氣，穿起來閣有一點仔怪怪，敢若巴黎跳康康舞的舞女。後來絲仔襪本身有糾帶，有較方便；但是，褲襪仔的出現才真正是女性的福音。

當時逐家無褲襪仔的知識，一个立法委員寫專欄大聲呼籲，講穿褲襪仔成何體統，台灣的道德觀念沉落矣，離傳統儒家思想愈來愈遠矣。痛心閣操煩甲這款，後來知影無人會直接共透明的褲襪仔當做內褲穿，毋知伊家己有感覺歹勢無？

絲仔襪媠，毋過脆弱，穿的時愛真細膩。寒天，驚手kah跤底粗，穿襪仔的時，我著愛戴手套，或是先洗手，予手有一點仔濕，才袂去勾破。我一个穿插誠頂真的記者同事教我，絲仔襪買來時先囥（khǹg，擱放）佇冷凍庫凍半工，抑是用半燒冷的水浸過，襪仔的纎維會較韌，較袂破。聽起來有理，不過我總是欲出門才臨時提一雙出來穿，根本袂赴（來不及）按呢共襪仔加工。。

彼陣，逐家過日子較儉，絲仔襪無俗（便宜），若破去、落紗，就提去補；無補，愈抽愈長，會變做一條溝仔。如果色水和皮膚差siunn濟，破空就愈明顯。也有人穿後面一條暗色縫線的襪仔，看起來較「性感」；毋閣線若無搝（giú，拉）好，更加袂看得。

我佇新生報工作，買衫、買鞋攏佇博愛路衡陽街彼箍圍仔；補絲仔襪嘛揣沅陵街一間賣雜細的小店仔。補襪仔的婦人坐佇店口，共絲仔襪套佇滾水罐的蓋面頂，一針一針補。尾後是毋是有用機器，無印象。

後來，絲仔襪愈來愈俗，落紗免麻煩提去補，我就凊彩（隨便）用指甲油抑是膠水來黏，莫予紗直直抽落去就好。這是我家己緊急時想起來的方法。破甲無必要黏起來的，嘛毋免擲掉；上好的路用是做縛巾仔。換季時，我愛用破襪仔共膨紗衫（毛衣）束做一囷（khûn，捲），才囥入衫櫥內，按呢較袂蓬蓬鬆鬆占所在。兩个囡仔細漢時，春秋天我愛用絲仔襪縛浴巾佇in腹肚；按呢就免驚in被仔蓋袂牢，半暝腹肚頂光光。每遍我攏叫：「來箍桶囉！」講「箍桶」，就想起我媽媽佇厝後壁埕菝仔樹跤（下），用鉛線共一个柴板散去的柴桶箍予好的畫面。

十幾年來，褲襪仔較無流行矣。一般職業婦女，穿長褲時可能猶會穿短襪仔，穿裙時，已經慣勢赤跤穿鞋；穿涼鞋時，更加無人穿絲仔襪，因為會予人笑sông（俗氣）。tsit-má（現在），佇寒天較有人穿褲襪；毋過，真濟是穿棉質的，較摩登的女子才會穿網狀花樣的烏色絲仔褲襪。 台灣解嚴後，我捌（曾）訪問一个去中國探親的婦人，伊講去看親人除了送三大件－－冰箱、跤踏車、裁縫車之外，也紮（帶）一寡金手指，閣臨時紮一堆褲襪仔和短絲仔襪。遐的人特別愛短絲仔襪，講彼好穿閣會燒；伊欲離開時，連最後一雙穿佇家己跤底的都褪落來予人。 「絲仔襪佇台灣是消費品，穿破就擲掉，in猶當做寶貝。」 這句話，我猶會記得；順紲想著講反攻大陸的時代，台灣空飄大陸的宣傳品也有絲仔襪。風水輪流轉，眼前，in好額（富）起來，無希罕這款物件矣。         原載2016.7月號《文訊》