好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 

阮三姊妹和小弟會去揣（tshuē，尋找）親，和三四十年無見過的表姊妹見面，完全是因為小弟的熱心。伊這幾年整理家族相片，掃描到電腦內底，放大，修復；有親情（親戚）的老相片，就親身送去。

這遍紮（帶）去的老相片，上重要的是彼張阮三个阿姑和抱嬰仔的表姊阿勉做伙翕的相。想袂到表姊一時竟然看袂出其中一个查某人就是in老母；伊講家己連一張老母的相都無，強強欲（幾乎要）袂記得伊的容貌矣。莫怪in姊妹仔看著這張一甲子以前的相片，有一點仔激動。看著阿舅、阿妗（阮爸母）的相片，嘛想起真濟過去的代誌。講著頂一輩的人，逐家感覺足溫暖。

表姊阿勉沒啥改變，猶是滿面春風，淡薄仔福相；一家人生理（生意）愈做愈大，環境比以前閣較好。表小妹阿婉，我完全袂記得伊少年的時生做啥款，這遍見著，聽伊講古早代誌，講伊的人生，予阮對伊印象真深，閣對伊欽佩起來。

伊講18歲的時，家庭散赤（窮），有媒人來講親情；對方是外省人，人袂bái，生活也會得過，毋過年紀足足大伊一齒年。阿婉共老母講，「莫啦，想著欲和加我十二歲的人睏做伙，足奇怪呢。」

In老母，阮阿姑就按呢回絕這个親事。

後來，伊家己交著一个查埔朋友，阿姑探聽著in兜（tau，家）較複雜，無贊成。「既然老母無贊成，姑不而將（不得已），我就共伊講咱來煞煞去（分手）。彼陣，逐家較單純，無亂來，欲煞較無掛礙。」

對方毋甘分開，講，「你若嫁予別人，我會來去恁庄仔賣雜細，看你過了好無。」

賣雜細，就是擔兩个囥（khǹg，放）針線胭脂膨粉，抑是其他日常用品的細櫥仔四界去喝賣的流動行業。

「哇，聽起來有情有義，予人真感動呢。」我講，心內想：閣有鄉土劇的趣味。

阿婉講，「著啊，講甲按呢，我就嫁伊矣。阮爸母也無閣反對。」

結局圓滿，誠好；阿婉卻講，「結果，才知影是我前世欠伊。」

前世欠伊，這世來還；彼个有情的查埔人娶某了後無去賣雜細，也無去做其他的頭路；靠阿婉扞家（huānn-ke，持家）。

阿婉的華語算是有標準，有時講華語，有時講台語，攏真紲拍（流利），口才袂bái。予阮欽佩的是，講著翁，伊無怨無氣；對大家（婆婆）也誠有孝，「阮大家上愛來佮我這个新婦蹛（tuà，住）。有一遍，我病甲真嚴重，伊那哭那講：阿婉啊，你千萬毋通行佇我頭前！」

翁婿放外外，無管家庭；好佳哉阿婉身體好，人緣好，也拍拚。「我八歲的時，算命的共阮爸母講我帶財庫出世；若是查埔的，做事業會真發達。我毋是查埔的，毋過靠做工，飼雞，替人tshuā（帶）囡仔，省省仔過，也是共三個囡仔晟（養育）大漢。」

Tsit-má（現在），伊過了雖然無阿姊遐爾富裕，也是真樂暢；姊妹相招去卡拉OK，去旅行，無偌久前才坐遊輪去日本thit-thô（遊玩）。

講著唱歌，阮央in唱來聽。表姊拍開客廳的伴唱機，兩人就唱起來，台語華語各一條，唱了袂bái，尤其阿婉動作活潑輕快，看起來誠享受唱歌。

我呵咾伊心情真少年，真樂觀，伊講爸母共伊生做這款個性；人條直（憨直），講話白。「阮老母 54歲就過身，我轉去厝看著伊病甲彼款形，大聲哭起來，隨去共頭路辭掉，專心照顧伊。」「我讀小說、讀新聞予伊聽。有人來看伊，若講伊無效矣彼款話，我就共伊趕出去，叫伊以後莫閣來！」

伊講家己家婆性，「過年，我攏炊幾若床（sn̂g）粿，分予庄仔內較無好過日抑是無閒工的人。」

伊的信仰也有一點仔神奇。一遍，有通靈的講in囝後壁跟綴一个烏面的，阿婉隨想著大伯厝內彼尊囥佇壁角的四媽（祖）。阿婉去問神，四媽講伊欲來in兜；無法度奉佇神明桌頂也無要緊，免佇外口流浪就好。後來伊共四媽迎請來，奉佇客廳。「我共伊講阮的神明桌有較kheh（擠），眼前予你較委屈，日後阮後生若買厝，就予你坐大位。」後來，正經予四媽坐新厝神明桌的大位。（毋知是毋是四媽的保庇，才買厝？）

伊紲落（接著）講兩件四媽共伊解厄的經驗，我講有拜有保庇，心誠就靈。伊講心存善念，做好代（誌），結善緣，神明攏會庇佑。

彼工，表姊煮規桌頂的菜請阮，鬥陣食飯的有伊兩个有成就閣有孝的囝。會當佮疏遠遮濟年的表姊妹做伙看古早的相片，講往過的代誌，食飯，阮攏感覺真有「收成」。

阮講後回換去阿婉in兜看看。伊共阮講過，免住址，in庄仔內人人捌（認識）伊，講伊的名就好。

。原載2017. 5月號《文訊》雜誌。