　　　　　　　　　　　　　　⊕潘文良　撰

　　周小姐，佮男朋友，行了半年外，一直攏無予親人知影，想講帶轉去，予爸母「鑑定」一下。
　　老爸聽了查娒囝的男朋友，自我介紹了後，著顯得真𣍐爽，一直到伊走了後，抑是一個面仔臭臭。
　　查娒囝著問講‥「爸仔！你是對我的男朋友，有啥麼不滿是無？」
　　老爸講‥「伊的條件是真好，不而過，著是伊姓『孔』，所以予我誠失望！」
　　查娒囝問講‥「姓『孔』是安怎？」
　　老爸講‥「妳知影‥㑑是三國時代，吳國大將軍〈周瑜〉的第二十代囝孫……周瑜是安怎死的？是去予〈孔明〉，活活氣死的……這是何等的恥辱……所以講‥㑑姓周的，佮姓孔的，有不共戴天之仇……」
　　查娒囝叫講‥「爸仔……你嘛『幫幫忙』！〈孔明〉是〈諸葛亮〉的字——
孔明複姓〈諸葛〉，單名〈亮〉字，呣是姓〈孔〉啦！佮姓孔的，有啥關係？你是咧怨𢗧啥麼？」
　　老爸叫講‥「我不管！倽叫伊要姓〈孔〉？姓〈孔〉著佮〈孔明〉有關係…… 聽著『孔』，我著真𣍐爽！」
　　查娒囝著叫講‥「吼……你哪會偌無講情理？」
　　老爸叫講‥「我給妳警告‥妳若佫繼續，佮伊來往，我著𢵰妳趕出去！妳若是要嫁予伊，我著佮妳，斷絕父女關係……」
　　查娒囝聽了，也好氣、也好笑，叫問講‥「敢有偌嚴重？」
　　老爸繼續叫講‥「除非‥伊去改姓，啊若無咧，著等徦我死……恁要安怎，攏無我的載誌！」
　
　　呵呵！古來「偉大的愛情」，攏是無好結果的較濟——
親像「羅密歐與茱麗葉」，兩家為世仇，致使兩人相愛，最後是以死為終。
　　仇恨，有時陣，實在呣知咧恨啥麼？真正恨𠇺莫名其妙！
　　呰個周小姐的戀情，呣知結局會安怎？
　
　　　　　　　　　　　　　　　　　　　　2018.03.01.四　01:00:00
　
■臺語註解
【偌恁】ㄐㄧㄚˋ　ㄌㄧㄣ├　tsiah4~2 lin7　⊕如此、這麼。
【查娒囝】ㄗㄚ├　ㆠㆦ　ㄍㄧㆩˋ(漳)∥ㄗㄚ├　ㆠㆦ　ㄍㆩˋ(泉)
　　　　　tsa5~7 boo2~1 kiann2(漳)∥tsa5~7 boo2~1 kann2(泉)
　⊕女兒。
【抑是】ㄧㄚˋ　ㄒㄧ├∥ㄧㄚㆷ　ㄒㄧ˙　iah4~2 si7∥iah4 si7~0
　①還是。　②或是。
【知影】ㄗㄞ├　ㄧㆩˋ　tsai1~7 iann2　⊕知影跡。喻知道、知曉。
【𣍐爽】ㆠㆤ└　ㄙㆲˋ(漳)∥ㆠㄨㆤ└　ㄙㆲˋ(泉)
　　　　be7~3 song2(漳)∥bue7~3 song2(泉)
　⊕不爽、不高興。
【面仔臭臭】ㆠㄧㄣ├　ㄚˋ　ㄘㄠˋ　ㄘㄠ└
　　　　　　bin7 a2 tshau3~2 tshau3
　⊕臉臭臭的。
【囝孫】ㄍㄧㆩ　ㄙㄨㄣ　kiann2~1 sun1　⊕子孫。
【不而過】ㄅㄨ'ㆵ　ㆢㄧ└　ㄍㄜ└(漳)∥ㄅㄨ'ㆵ　ㄌㄧ└　ㄍㄜ└(泉)
　　　　　put4~8 ji7~3 kor3(漳)∥put4~8 li7~3 kor3(泉)
　⊕不過。
【著是】ㄉㄧㄜ└　ㄒㄧ├∥ㄉㄜ└　ㄒㄧ├　tiorh8~3 si7∥torh8~3 si7
　⊕就是。漳州也寫作「囉是」，泉州叫「都是」。
　◇《碧巖錄．卷第六．第五十一則》：當時這僧，著是個漢，欽山也大險。
【怨𢗧】ㄨㄢˋ　ㄘㆤㆷ(漳)∥ㄨㄢˋ　ㄘㄨㆤㆷ(泉)
　　　　uan3~2 tsheh4(漳)∥uan3~2 tshueh4(泉)
　①怨恨、怨尤、哀怨。因受委屈，感覺悲傷、不滿，而心生怨恨、埋怨。
　②因為怨恨，而乾脆不理，有死心之意。
【攏無】ㄌㆲ　ㆠㄜˊ　long2~1 bor5
　①都沒有。　②難道。又叫「總無」。
【載誌】ㄉㄞ└　ㄐㄧ└　tai7~3 tsi3
　⊕記載於誌。謂事情也。引申為工作。
　{按}載又通戴，故又作戴誌。俗作‥代志、代誌、事誌。
　◎《廣韻》載：事也。《康熙字典》載：又，事也。
　◇《書．舜典》：有能奮庸熙帝之載。{註}言奮起其功，以廣帝堯之事也。
【呣知】ㆬ└　ㄗㄞ　m7~3 tsai1　⊕不知、不知道。
【戀情】ㄌㄨㄢ├　ㄐㄧㄥˊ　luan5~7 tsing5　⊕愛戀、戀慕之情。
　
【倽】{本}ㄒㄧㄤˊ(厦漳)　siang5　{變}ㄒㄧㄤˋ　siang5~7
　　　{本}ㄙㄤˊ　(泉)　sang5　{變}ㄙㄤˋ　sang5~7
　　⊕誰也。「啥人」合音用字。
【𢵰】{本}ㄍㄚ　kah8　{給}ㄍㄚ└　kah8~3
　　①將、把。　②為、替、幫。　※台用漢字。例：
　　⑴𢵰物件予人。（把東西給人。）
　　⑵𢵰我的肩胛頭掠掠咧。（幫我把肩膀抓一抓。
【徦】{文}ㄍㄚˋ　ka2　{變}ㄍㄚ　ka2~1　⊕至、到。
【偌】{白}ㄐㄧㄚˋ　tsia2　{變}ㄐㄧㄚ　tsia2~1　⊕如此、這麼。
　
==========================================================
※本文轉舖「新聞台」。2018.03.03.六　00:00:00
◎潘文良《仇恨》。2018.03.01.四 01:00:00
　http://mypaper.pchome.com.tw/avun01/post/1374854476
※本文首發表於「臺語學院」。
◎潘文良《仇恨》。2018.03.01.四　01:10:00
　https://www.facebook.com/groups/978821105480673/permalink/2023012344394872/
　
■標籤：仇恨、周瑜、孔明、諸葛亮、氣死、𣍐爽