※本文以台語書寫。

　　　◎志工

　　　　　　　　　　　　　　　⊕潘文良

˙志工呣是免費勞工。　⊕潘文良
　ㄐㄧˋ　ㄍㄤ　ㆬ└　ㄒㄧ├　ㆠㄧㄢ　ㄏㄨㄧ└　ㄌㄜ└　ㄍㄤ　。
　tsi2 kang1 m3 si7 bian1 hui3 lor3 kang1 。
˙志工不是免費勞工。　⊕潘文良
　ㄓˋ　ㄍㄨㄥ　ㄅㄨˊ　ㄕˋ　ㄇㄧㄢˇ　ㄈㄟˋ　ㄌㄠˊ　ㄍㄨㄥ　。
　

【勞工】{漳變}ㄌㄜ├　ㄍㄤ lor7 kang1
　　　　{泉變}ㄌㄜ└　ㄍㄤ lor3 kang1
　
　　　
　
　　志工是愚工？
　　聽講‥有一個小姐，去某某社區發展協會做志工。
　　人叫伊洗窗仔。
　　伊呣𧧸（未曾）做過，做無路來，也𣍐曉將茶箍粉泡水，則去鑢窗仔；結果‥著去予人「剾剾洗洗」，害伊艱苦𠇺目屎輾輾遨。
　　聽著實在，令人憤慨！
　　志工是啥麼？啥麼是志工？志願工作服務者。
　　會想要做志工，總是想講‥有閑加減做一括‥對人、對社會，有貢獻的載誌。
　　會去社協做志工，總是有認同，社協的一括理念，則願意去付出時間、勞力。
　　只是‥每一個人，攏有伊的長處、短處；優點、缺點——
人也呣是生來，著「十項全能」，雖然‥未曉的載誌，學著會曉；但是，著算講要學，嘛愛有興趣，則較願意去學；著算講會曉做，嘛愛有興趣，則較願意去做。
　　小姐的「才能」，都呣是洗窗仔、掃塗骹，予人教伊去洗窗仔、掃塗骹，做無好，煞去予人罵，心情怎會爽快？下擺哪會想要來？
　
　　志工，原本的出發點，也只是‥有時間，來去社區發展協會，行行咧、坐坐咧，有載誌，著𩰒參共；無載誌，著泡茶開講；所辦的課程，若有興趣，著加減學——生活較𣍐無聊，日子較好過。（所以‥差不多攏是婆婆媽媽、退休的人——少年人，逐工愛上班。）
　　「政府」為著要「善用志工」，著設志工培訓課程，發「志工證、志願服務記錄冊」，講一堆「做志工」的好處（福利），吸引人加入志工的行列。
　　領了「志工證」，社協著按「制度」，開始給你「排班」、分配「任務」。
　　本來是「有閑則去」，今嘛煞變成「愛照時間去」——排著班，拄好有載誌，無法度去，著愛佮人「換班」——實在變𠇺有淡薄仔「勉強」。
　　上志工培訓課時，社工講‥「志工服務，三年滿三百小時，著會使申請『志工服務榮譽卡』，若去公家設置的，像國家音樂廳、國家森林遊樂區，憑榮譽卡，著會當打折優待……」
　　遮恁濟年來，志工服務，三年滿三百小時的志工誠濟，申請的誠濟，但是‥「通過、領著」榮譽卡的，卻是無若濟？
　　某某社協的總幹事，服務時數，也呣知有幾個三年、有幾個三百小時，老早著申請，卻是至今未領著。
　　問題講是‥卡咧某某承辦的機構，因為愛核對「志工時數」，但志工四界做，登入時數的社工，攏無共人，各社工登入，各有帳號密碼……要一一去查證、核對，實在真浪費時間，也有所困難。（所以‥承辦人員，處理𣍐來，歸氣「全部擱置」？）
　　問題敢真正是按呢？
　　相信每一個社工，登記每一個志工的服務時數，也𣍐亂亂記——實在有啥好「核對、求證」的？（須要核對、求證，是懷疑「志工」，會為著「榮譽卡」，而賄賂社工；懷疑「社工」，會「做人情」而造假是無？）
　　電腦系統，敢無法度改善？寫一個程式，每個月，滿三百小時的志工，著自然浮上「枱面」，提醒承辦的人——甚至‥全國每一個志工，佇電腦檔案內，攏有相片、服務的社區發展協會等等資料，只要自動套去「榮譽卡」面頂，列印出來，加上護貝，然後，寄送志工所在的社區發展協會著好。
何須人提出申請？政府𣍐當「自動」發放嗎？
　　申請卻是「久候不至」，實在教人有「被騙」的感覺。
　　相信志工，會用著「榮譽卡」的機會，也𣍐真濟！只是‥會當用著，佇摕出來的時陣，會感覺有一種‥「被肯定的榮譽感」而已！
　
　　某某人講‥「勳章，是用來騙小孩的玩意兒！」（𣍐記持啥人講的，也𣍐記持伊安怎講，但伊的意思，著是按呢。）
　　因為「勳章」有獎勵的作用——公開授予，受眾人的掌聲、讚揚，被授予者，以後著會更加盡心盡力，乃至盡性命，為「國家」奉獻！
　　比如‥訓練動物，動物若做好，著賞伊一點仔食物（其實塞齒縫嘛無夠），做為獎勵，動物著會愈做愈好——以後，做好無食物，佫教伊做，伊嘛是會一直做。
　　政府因為有全國志工的投入、奉獻，實在省了真濟人事成本的預算——
卻是連一點仔「騙小孩的玩意兒」，都無啥情願發放！
到底是呣是，將志工，當做是免費的勞工？
　
　　　　　　　　　　　　　　　　　　2017.06.27.二　06:00