　　　　　　　　　　　　　　　　　　　　⊕潘文良　撰

・愛是一種責任，　　　　　　・愛是一種責任，
　如果你抑未學會曉承擔，　　　如果你還沒學會承擔，
　請呣𢓶講愛我！　　　　　　　請不要說愛我！
　　　　　　——潘文良　　　　　　　　　——潘文良
　
　　曾經，有一個女子，將阿文此話中的「責任」，改為「承諾」，而作‥
「愛是一種承諾，如果你不給我承諾，請不要說愛我！」
　　呵呵！啥人呣知‥所謂的「承諾」，有時陣，就親像「放屁」共款？
為了達成目的，啥麼「山盟海誓……的屁話」，伊嘛講會出來！
出一支喙，是上蓋簡單、上蓋輕鬆的！呣免用偌濟力，講久會喙燋爾！
有幾個人，真正會「一言既出，駟馬難追；一諾千金，至死不渝」？
　在「承諾」的時陣，伊也有影是真誠的，希望家己，有法度做到——
只是……只是……世事難料，有一日，伊講‥
「歹勢！歹勢！失禮！失禮！
　我呣是無想要做到，我只是做𣍐到！
　我是心有餘，力不足……」
　　講一句「我愛你」，何其簡單？
　　哪知「愛」，是需要付出偌濟的精神、時間……或者是金錢——
若是無「責任心」的人，有錢又有閑（如富二代、富三代），伊就會變成「花花公子」。
若是無「責任心」的人，無錢卻有閑，歸日浪流連，乾仔想佚佗，實在也難倚靠！
　　少年的查娒囡仔，十五、六歲，十七、八歲，抑咧靠父母生活，欠錢開喙、伸手就有；交查甫朋友，首要的條件，只要「帥哥」——看起來爽著好！
哪管伊是有錢、無錢……有責任心、無責任心？
　　兩個相招，看電影、踅夜市……佚佗是真趣味，日久月深，感情愈來是愈甘甜，恨不得朝朝暮暮、日日夜夜，若蝴蝶雙飛、若鴛鴦相隨……
　　書也無想佫讀落去，定定「逃學」（翹課）嘛費氣，辦休學較歸氣。
　　少年人，柴燋火烈，實在也真歹控制，呣免人教伊嘛會——電影看煞、宵夜食了，啉一寡酒，結果是興試試，著去「厚德路」，開房間……
　　「禁果」滋味，是真迷人；食髓知味，是定定弄。
　　少年人，爽著好，無想赫恁濟，呣管三七二十一，也無計較後果，哪知「珠胎暗結」，腹肚一工一工大起來……這是要如何是好？
　　「生米煮成飯」，父母受氣嘛無路用，想看要安怎處理（收煞）較重要！
　　有的建議去摕掉，兩個家己抑是囡仔，囡仔𤆬囡仔，是要安怎好？
（新聞報導‥一個少年媽媽，則十七歲，就生兩個囡仔〔三歲、一歲〕，先生乾仔愛佚佗，有一工冤家，先生離家出走，煞呣轉來；伊也走出去，將兩個囡仔，𢳱予阿舅。阿舅十工則去看四擺，用麵包、泡麵予囡仔食，結果‥囡仔煞枵死……做媽媽的，十幾工來，竟然是佮一括姊妹仔伴，咧看電影、踅百貨公司……）
　　有的講‥「摕囡仔傷身體、傷性命，『一枝草、一點露』，予生落來則好！家己若飼𣍐起，著交予社會局去處理，自然有愛囡仔的人認養……」
　
　　「愛」是啥麼？
　　「愛」是將「欲」，美化的講法！
　　「欲」是啥麼？講明白的，就是「性欲」——
男女之間，被「性欲」所牽引，而互相愛慕。
　　人的社會，比禽獸較複雜——
　　禽獸為了繁衍後代，而有「發情期」，時陣到啦！母的就散放「欲味」（賀爾蒙），吸引公的，上身交配——禽獸公的，絕大部分，完事了後，就尻川拍拍咧，一走了之，續落來「生、養」的工課，就是母的責任——蜘蛛、草猴（螳螂）一類，雄蟲交尾完，若走無離，著會成為雌蟲的「食物」。
　　男女之間的愛，愛來愛去，愛到尾來，無不是想要「上床做愛」。
　　愛著愛，做愛著做愛——現代社會，思想較開放，也不比較早，結婚進前，若抑是「在室」的，顛倒予人笑！就算「做愛」了後，嘛無一定著會嫁娶——
查娒的，著算負一箍腹肚，步入禮堂，有人抑會講是「雙喜臨門」。
但是‥「做愛」的「後果」是啥，敢呣知？
　　查娒囡仔，呣知保護家己，𣍐曉「避孕」，在「不該有身的時陣有身、不該有囡仔的時陣有囡仔」，後果是真悿頭！
　　為啥麼講‥愛是一種責任？
　　查甫的，若真正愛查娒的，——
要做愛，至少嘛愛有「一套」（保險套），
這呣但是咧保護伊，抑是咧保護家己！
如是，則會當「無後顧之憂」也！
　　如果抑難以承擔「做愛」之後，有身、生囝，所帶來的「責任」，實在著注意啊！呣𢓶乾仔想要愛——想要做愛著好。
　
　　「如果你抑未學會曉承擔，請呣𢓶講愛我！」
　　可惜，大部分的查娒囡仔，攏需要人愛，會當有理智，講出呰款話的人，實在誠少！
　　大部分的查甫囡仔，乾仔知影要愛，卻呣知愛，是須要「負責任」的！
「責任」，你承擔會起嗎？
（人總是「𧼼行𧼼看、𧼼做𧼼學」的‥抑未學會承擔——
　至少嘛愛有「準備承擔」的心理！）
　　少年人，加想一括「後果如何」，則會當減少，真濟無必要的麻煩也！
　
　　　　　　　　　　　　　　　　　　　　2016.10.10.一　11:31:36
　
~~~~~~~~~~~~~~~~~~~~~~~~~~~~~~
■臺語字詞註解
【呣𢓶】ㆬ└　ㄊㄤ∥ㆬ└　ㄊㄤ├　m7~3 thang1∥m7~3 thang7
　⊕不可、不能、不要、不行、不得、不當。
【浪流連】ㄌㄨㄥ└　ㄌㄧㄨ├　ㄌㄧㄢ├　long7~3 liu5~7 lian1
　⊕浪蕩無所事，遊手好閑、到處亂逛。
【乾仔】ㄍㄢ├　ㄚ　kan1~7 a1　⊕僅、只；徒然、白白的。
　〔字辨〕華語「乾瞪眼、乾著急」，
　　意思是：只能瞪眼、只能著急，而沒能有所作為。
　　單字不成詞，故臺語加「仔」字，即成一詞，如魚仔、鳥仔。
　　因「仔」字受前字「乾」的字音影響，
　　講起來，著親像〔ㄍㄢ├　ㄋㄚ├　kan7 na7〕、
　〔ㄍㄢ├　ㄉㄚ　kan7 ta7〕，而被當做是「乾焦」。
【燋】ㄉㄚ　ta1　⊕乾燥。
【乾燋】〔ㄍㄢ├　ㄉㄚ〕[kan7 ta1]　⊕僅只、只是。
【佚佗】ㄑㄧ'ㆵ　ㄊㄜˊ(漳)∥ㄊㄧ'ㆵ　ㄊㄜˊ(泉)
　　　　tshit4~8 thor5(漳)∥thit4~8 thor5(泉)
　　⊕遊玩。
【歸氣】ㄍㄨㄧ├　ㄎㄧ└　kui1~7 khi3　⊕乾脆。
【費氣】ㄏㄨㄧˋ　ㄎㄧ└　hui3~2 khi3　⊕浪費氣力，喻麻煩、費事也。
【興試試】〔ㄏㄧㄥˋ　ㄑㄧˋ　ㄑㄧ└　hing3~2 tshi3~2 tshi3]
　　⊕興致勃勃、躍躍欲試的樣子。
【定定弄】〔ㄉㄧㆩ└　ㄉㄧㆩ└　ㄌㄤ├　tiann7~3 tiann7~3　lang7
　　⊕常常玩弄。　定定‥常常。　弄‥玩弄。
【摕掉】ㄊㄝ└　ㄉㄧㄠ├ the7~3 tiau7　⊕拿掉。
【著】ㄉㄧㄜㆷ　tiorh8　{變}ㄉㄧㄜ└　tiorh8~3
　⊕就也、中也、對也。
【𤆬】ㄘㄨㄚ├　tshua7　⊕帶領、引導；養育、照顧。
【𢳱】ㄉㄢ└　tan3]　⊕丟擲。
【佫】ㄍㄜㆷ　koh4　⊕又、再、更。
【進前】ㄐㄧㄣˋ　ㄐㄧㄥˊ　tsin3~2 tsing5　⊕之前、以前。
【有身】ㄨ└　ㄒㄧㄣ　u7~3 sin1　⊕有身孕、懷胎在身。
【悿頭】ㄊㄧㆰ　ㄊㄠˊ tsiann2~1 thau5
　　⊕比喻事情厲害或嚴重的程度。　悿‥勞累、厭倦。
【呣但】ㆬ└　ㄋㄚ├　m7~3 na7　⊕不但、不只、不僅。
【一寡】ㄐㄧㆵ　ㄍㄨㄚ˙　tsit8~4 kua2~0　⊕一些、少許。
【厚德路】　英語“Motel”之諧音。汽車旅館。
【定定】ㄉㄧㆩ└　ㄉㄧㆩ├　tiann7~3 tiann7　⊕常常、時常、經常。
【𧼼】ㄋㄚˋ　na2　{變}ㄋㄚ　na
　⊕走也。同「逽」。
　　引申為「邊……邊……；且……且……」
　　例‥𧼼行𧼼看‥邊走邊看、且走且看。
　

　
============================================================
├潘文良。2019.06.23.日　16:13:00
　　回應呂雅萍的舖文2019.06.23.日　11:55:00
　　https://www.facebook.com/permalink.php?story_fbid=475808249859261&id=100022902698422
　　當我說我愛你到時候，你會想到什麼？
~~~~~~~~~~~~~~~~~~~~~~~~~~~~~~
├Phêng Tâi-oân。2019.06.23.日　16:46:00
潘文良老師：
　　沒有用教育部字。
~~~~~~~~~~~~~~~~~~~~~~~~~~~~~~
├潘文良。2019.06.23.日　16:54:00
　　臺語用字原則：
一、用正確的字。
　　教育部《臺閩典》，未必然正確。
二、用適當的字。
　　臺語有的字詞，至今猶是難以推尋正確的字，
　　只好退而求其次，比較之後，較適當的字。
　
◎潘文良《臺語用字原則建議》
　http://mypaper.pchome.com.tw/avun01/post/1366841720
============================================================
※本文發表於「新聞台。潘文良著作集」。
◎潘文良《愛是一種責任》。2016.10.10.一　11:50:17
　http://mypaper.pchome.com.tw/avun01/post/1368435698
◇本文分享於「臺語學院」。2016.10.10.一　12:09:00
　https://www.facebook.com/groups/978821105480673/permalink/1456323697730409/
◇本文分享於「台語生活社」。2016.10.10.一　12:05:06
　https://www.facebook.com/groups/1524327644503170/permalink/1812692479000017/
　