醫生館是服務業＠Tong-îng 的台語人生記錄

2023-07-09 19:00:53| 人氣25| 回應0 | 上一篇 | 下一篇

今仔日早起，去一間診所回診。

佇個外月前身體的一个所在有小可仔各樣，是去予伊醫好的。醫生交代講一個月後來轉來巡一下。

今仔日踏入去診所掛號，掛號的查某囡仔是恬恬一句話就無。彼个時陣我的Khì-moh-tsì就有小可仔袂爽快。

醫生就隨叫我，是「Lîm x x」三字齊叫透。敢若是毋捌「請，先生，女士----」遮的常識咧？（其實，到今是逐擺攏是仝款按呢）

當時是「規腹火」攏攑起來矣。

猶毋過，想著遮是醫生館，行入去醫生館是只有據在伊割（kuah）據在伊𠞭（liô）的。佇人的簾簷跤，寧可（lîng-khó）較恬咧較無蠓。

後來閣想講，現此時會叫我全名的人，爸母是已經無去矣，干焦是賰較早的同學爾爾。呔會（thài ē/thah ē）猶有人-------。

佇轉來的路途就咧想：

這是毋是今仔日家己的心情原本就較䆀的關係？

醫生館嘛是服務業啊？！我是伊的人客（患者）neh！這到底是

按怎咧？

這種的基本禮貌應該自細漢爸母就有教的。照理講醫學院應該有「醫病溝通」的課程才著。爸母的教示是毋是攏共放袂記得矣？遐的課程攏是讀佇尻脊骿（kha-tsiah-phiann），是無？

當然家己嘛是定定會想講，佮日本人盤撋（puân-nuá）一世人。對sa̋-bì-sù的要求是有比人較懸。毋過，敢有差遐濟？

今仔日拄著的應該是一个特例！！

家己這世人，有幾若个是佮醫生對患者變做好朋友的。（230707Tong-îng）

我要檢舉

台長： Tong-îng Lîm

人氣(25) | 回應(0)| 推薦 (0)| 收藏 (0)| 轉寄
全站分類: 教育學習(進修、留學、學術研究、教育概況)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台