飛行機頂講台語＠Tong-îng 的台語人生記錄

2023-06-14 08:53:32| 人氣24| 回應0 | 上一篇 | 下一篇

全時間台語的我，飛行機（hue-lîng-ki）頂當然是開喙講台語。
空姐（stewardess/乘務員）的回話一般攏會用台語。毋過，罕得拄著台語老的，半桶的較濟。不而過，𪜶攏足認真欲擠出台語佮我講。我攏會共𪜶呵咾，鼓勵𪜶較捷講一定會愈來愈講愈好。

罕罕會拄著袂曉講的，毋過，通常是聽有台語。就按呢（tsua̋n）伊講伊的華語，我講我的台語，會通就好。

幾十年來佮日本人盤撋，行動佮形姿敢若是有成日本人（？）佇飛行機頂台灣籍空姐欲佮我講話，袂曉日語的攏會落（làu）英語，我當然回伊台語。這个時陣是定定會予伊驚一趒，哪有這款的代誌！？

頂一站仔我佇面冊呼籲咱就儘量寫台文：華文翻台文，翻外文做台文，家己寫的攏總好，共鋪出來。予「台語文的花蕊開甲四界滿滿是」！

佇遮嘛欲鼓勵逐家：儘量加講，去到佗攏就講，捷講。予台語的聲，台語的音，
一四界攏聽會著，予
「台語文的花蕊，開甲四界滿滿是」！

做一个全時的台語人，遮爾濟年來猶罕得拄著困難。逐家毋免驚，台語共講落去就著!
（Tong-îng230501）

我要檢舉

台長： Tong-îng Lîm

人氣(24) | 回應(0)| 推薦 (0)| 收藏 (0)| 轉寄
全站分類: 教育學習(進修、留學、學術研究、教育概況)

回應(0)

Tong-îng 的台語人生記錄 人生一步一步的跤跡，用阿母的話一字一字寫落來！台灣人寫台灣字，天公地道。 0愛的鼓勵 0訂閱站台