獅．石．史．識 我叫做石牧民，我主張台灣獨立。 知識分子要是沒有抑鬱以終那也算是遜掉了。 我。 2.0 海外版

8,473愛的鼓勵 0訂閱站台

有朋友問我：對教育部建議使用个漢字並無完全「正確」，有什麼看法？我感覺有必要解釋這个問題對福佬語文个意義。

 

福佬話本來是口語，有無受文字規範个生命。咱希望伊有傳承，有文學，所以將伊寫做文字。基本上，這是用「文」、用「字」，去表現「語」、表現「音」个活動。我請咱好朋友暫時將「字」和「音」完全分開來理解。

 

舉一个例：福佬話个「koh」，咱可能將伊寫作「閣」。「koh」是音，「閣」是字。

 

所以講，咱寫福佬文，就是以「閣」作記號，將「koh」寫出來。文字「閣」是語音「koh」个記號。但是，實際上，這篇文章是無可能有聲音。看起來，「koh」並不是「音」，伊其實也是記號，也是字。所以講，「koh」、「閣」並無差別。

 

既然如此，若是有人強欲將「koh」寫作「佫」，（實際上，將「koh」寫作「佫」个人真正不少）「koh」、「閣」、「佫」就全無差別。但是，有人覺得「閣」比「佫」較適合「koh」，所以「閣」較正確。也有人想个完全倒反。

 

為什麼咧？

 

喔，因為漢字這種記號，表現語音，也表現意義。因此，有人感覺教育部建議个漢字，有一部份只是考慮到語音，無考慮到意義；所以，就無真正確。

 

我願意提供我个看法：咱講，「台灣人」不是「中國人」，「福佬語」不是「中文」。「福佬語」有自己个主體性，既然不是中文，就無必要受中文个規範。

 

「中文」个字，表現讀音，也表現意義。真好。但是，福佬語一定需要如此嗎？我認為無必要。咱可以制定自己个福佬語文規則，自己个福佬語文慣例。中文个規則、慣例當作參考。但是，若是無符合中文个規則就被當作「無真正確」，我無願意接受。

 

台灣國內，「中文」對「福佬語文」（以及其他弱勢語言）不夠排擠嗎？連福佬語文个發展也受中文个檢查和評斷，我不願！

 

就是如此，我並無感覺教育部个部份建議漢字是「無真正確」。無錯，部份建議漢字看起來是怪怪，無真合「習慣」。但是，我會想，彼種「習慣」，是毋是我長久使用中文產生个習慣？用彼種「習慣」來講部份福佬語文个建議漢字「無真正確」，我反倒感覺「無真客觀」、「無真公平」。

 

當然，這是我个看法；可能有人會講我真偏激，我願意承擔。總是，我感覺中文有中文个規範，中文有中文个美麗；我也希望福佬語有福佬語个規範，福佬語有福佬語个美麗。

 

兩種規範和美麗个關係，無應該是互相控制、互相綁縛，互相觀摩較好。