車天車地 一個有好多回憶既地方!!!

106愛的鼓勵 0訂閱站台

12-9-08(五)返8:30，d小朋友一返到o黎第一件事就係要起字頭，冇計啦!上午要同佢地玩中秋節慶祝會，下午又去參觀協和小學，邊有時間起字頭做功課呀!

寫到9點半，佢地全班先起曬字頭，好彩我安排得好， 起曬字頭o既小朋友就自己去洗手食早餐，所以到9:45中秋節慶祝會開始時，終於可以安安心心同佢地去玩了。

今日減肥餐結束，我也可以放監了，開開心心同小朋友一齊食特別中秋節午餐，有蛋沙律三文治、牛油粟米同茄汁腸。

12:30佢地上床，1:00同大王落吉之島，因要用恆生信用卡幫佢買大班冰皮月餅(用恆生卡有9折)，再返上學校時，又要趕住寫埋畫展作品d名，然後1:20叫小朋友起身，準備出發去協和小學。

大王話我知協和小學係一間名校，當年佢大仔入左呢間小學時，因為冇人接送放學，所以轉校，當時d老師話佢知，入到呢間學校o既人，冇人會退學。

去到小學時，先聽校長介紹學校，跟住學校派出大哥哥大姐姐幫我手，佢地一個小學生帶住2-3個小朋友去參觀小學同玩遊戲，我就最開心了，唔駛咁辛苦去睇曬18個小朋友，有人幫我帶佢地玩，真係求之不得。

我地先欣賞銅管樂表演，然後小朋友可以試玩樂器、跟住去操場玩攤位遊戲、然後再玩中樂樂器，我都就去玩呢個古箏呢!我第一次彈古箏，好鐘意聽古箏果d清脆o既聲音!好彩!中國o既琴棋書畫中，我都識一樣架!(棋：圍棋)，以前亦都試過學二胡，不過自己有枝結他都懶得練，更何況學多樣!

玩完中樂樂器就去做圖工，佢地可以整蛇螺、卡、書籤，之後就去上數學課同英語堂，英語堂由外籍老師做畫戲，他們做得生動有趣，逗得小朋友嘻哈大笑!

睇到4:00就走了，跟住坐車返學校，璥鋒累到係車上已經瞓覺了(可以瞓妟覺時，佢又唔瞓)。但我又好殘忍咁同佢講野，唔俾佢瞓，大佬唔駛10分鐘就落車(如果唔塞車)，你瞓左一陣，唔湯唔水，落車時咪重辛苦!

4點幾先返到學校，4:30就放學了，4:45又有畫班(畫班地點是在我課室)，我又未派功課，佢地又未食茶點，簡直同時間競賽，拿拿林派功課，跟住又要去K1課室食茶點，又要叫D唔學畫畫o既小朋友返課室攞曬d書包、小學送的環保袋，自己帶回來o既燈籠、同埋自製燈籠。

即使5:30放工，也不敢即走，就係要等埋繪班d小朋友放學，要佢地執齊d野先走，結果6:00先走，跟住即刻去小巴站坐6X出尖沙咀，去到小巴站，眼見架小巴已開了，不過停下小巴站出口等轉出大路，我又即刻跑去架小巴前面去上車，好彩上到車，6:07上車，6:40已經返到Ied，都唔係遲好多，呢科又係Grace Lau教，遲到下都冇咩所謂，但星期二果科英文就麻煩d，老師話遲過6:45當遲到，兩堂遲到計一堂abs，咁就死啦!如果我放6:00，就一定會遲過6:45，更上星期二全校老師、校長返工，冇人調班，咁樣好大穫架!

放學就返屋企，明知明天做姊妹，但亦都掛住睇電視同msn，結果2點幾先瞓，明天卻要6:45起身，只瞓4個鐘，呢樣重大穫!