好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

          

  電視影集內底一个先生消遣伊愛買物件的太太，「伊和我無仝頻道；伊是買物頻道，我是新聞頻道。」

  一般講起來，查某人較愛踅百貨公司買衫買鞋；毋過日常用品和食品的採購，查埔人一旦出手，卻時常比查某人較無撙節，甚至到予太太欲掠狂的地步。

  薩依德《鄉關何處》彼本冊，有一个場面予我印象真深，伊講in一家伙仔逐年熱天去黎巴嫩一个山城度假的時，老爸會坐佇店內，手裡一杯土耳其咖啡，涼勢仔涼勢（輕鬆自在地）巡視貨品，叫兩粒西瓜，五罐果醬，一公斤無花果、三磅奶酪。…….紲落（接著）行到隔壁間，叫一大堆厝內無人會用著的浴間用品；然後去肉店、咖啡商、藥房。……

薩依德的老母面對一个一个一直來的送貨員，無奈和懊惱的喝咻愈來愈大聲。最後，老爸轉來食中晝矣，老母噼哩啪啦共伊罵甲臭頭，老爸無歡喜，兩人就大小聲起來。第二工，親像日頭會閣出來遐爾自然，薩依德的老爸閣演一遍採購的劇情。

  我一寡女性朋友的翁也有這款情形，好佳哉規模較小。 

  有一回，我到阿燕姊兜（tau，家）附近的冊店買冊，拍電話共伊講去提伊欲予我的一本冊。本來是想，才十點外，伊提冊落來，兩人開講一時仔，就講再見。啥人知影伊聽著我的聲音，竟然足歡喜，講，「趕緊來，趕緊來，阮頭家早起買一尾烏仔魚，來鬥食！」

  In翁也真熱情，講伊買真濟菜，伊煮食的技術嘛袂bái。

正經無膨風，烏仔魚已經落鼎炒蒜仔，真芳。阿燕姊講趁這个機會tshuā（帶）我去附近的傳統市場買魚。這个菜市仔的魚真正像伊講的，真鮮，又閣俗；毋但魚肉類誠濟，青菜果子、熟食都予我看甲目睭大大蕊；莫怪in翁共踅菜市仔當做退休後每日的活動。

  聽阿燕姊嫌翁愛買菜，我講伊愛買菜是你的福氣，伊講無毋著啦，只是冰箱內底的物件永遠煮袂完，食袂了；倒掉閣真無應該，會予雷公摃。「實在是，唉！」伊是傳統賢慧體貼的太太，除了因為政治理念佮先生的無仝款、講起來頷仔頸筋會浮起來以外，其他一概體諒包容。

  觀光過市場、買兩尾烏魚轉去，主人已經煮好規桌頂的菜，包括厚工的「糋（tsìnn，炸）卵」。 我真捧場，食袂少，呵咾逐項菜攏好食。主人歡喜，叫我紮（tsah，攜帶）兩包伊家己包的、冷凍起來的水餃轉去。我講有食閣有掠，哪會使！阿燕姊佇邊仔拍拚拜託，親像咧叫我做善事。趁in翁行開的時，伊細聲講冰箱窒that（塞）甲袂喘氣矣啦，那講那拍開冰箱，「咚！」一粒高麗菜跋落來矣。

  我的厝邊阿咩的頭家也愛踅傳統菜市仔；歇睏日騎鐵馬去踅，運動兼買菜。有時開車看著路邊小卡車賣青菜水果，也會停落來買一堆。

  阿咩講，「家己愛吃，啥物著時，啥物俗，啥物買一送一，伊就大出手買。既然買矣，無拍拚煮，看著刺目；只是，仝款的魚紲咧食，敢有可能好食？有的菜袂赴煮就爛去矣。」好空的是，做厝邊的阮不時會當「鬥食」。

  毋過，講著對翁婿買物件的受氣（氣憤）指數，阿茵第一名。有一遍阮四五个朋友去in郊區的厝耍的時，伊共阮講，買這間厝的時就嚴重警告先生絕對不准買物件過去；舊厝已經予伊囤真濟有的無的，有的物件擲出去，伊猶閣抾（khioh，拾）入來。

「毋過，恁看，」阿茵手比灶跤調理檯面頂一排「萬年豆（醬）油」，「我罕得佇遮煮飯，伊竟然毋驚麻煩，一逝（tsuā，趟）一逝提豆油過來，我一萬年嘛用袂完。」

  紲落去，伊拍開衫櫥仔門，予阮看一疊一疊的衛生紙，「日常用品佇社區內的便利商店攏買會著；準做有較貴，橫直阮用無偌濟，伊竟然連衛生紙都欲uì（從）台北買來，敢若咧囤積戰略物資。」

伊好氣也好笑，「後來我不准伊閣囥（khǹg，放）佇衫櫥仔內，伊煞佇面頂彼个空縫，閣囤幾若疊。」有影，衛生紙uì衫櫥頂疊到天篷（天花板）；阮笑甲「花枝亂顫」，毋知影一个查埔人哪會遮爾重視衛生紙和豆油。

  一陣人準備欲離開、咧穿鞋的時，門開矣，一位男士雙手捾（kuānn，提）五袋面紙徛佇門口！阮大聲笑出來，然後我細聲講每一个人拄好會當分一袋（五盒）轉去。阿茵的先生愣愣，毋知阮是咧笑啥；親像臨時予人掠來插花仔的演員，因為毋知進前的劇情，顛倒演甲足自然。

。原載2017.2月號《文訊》雜誌。