好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

    禪學老師講坐禪時，愛意識著家己的氣順著膻中、氣海、會陰、命門、夾脊、大椎、風府、泥丸、玄關行，最後行轉去膻中穴。

「若按呢好好仔做幾輪，等於全身五臟六府massage過，也拍通了任督二脈。」

伊的話我有聽入心，毋過，我喘氣（呼吸）時若一穴一穴照步來，不時會袂記得紲落（suà--lo̍h）來行啥物穴，得停落來想，氣就斷矣。

閣有人講「數息」較簡單，就是每擺算到十閣翻頭ui一算起。我試了閣試，真罕得算到十就回頭開始算，總是算到十幾甚至五十幾，人才醒過來。

無論想穴位，抑是數息，心有罣礙，顛倒無法度專心。所以，我決定kan-na（只）關心吸入來的氣由鼻孔行到丹田、吐出的氣由丹田行到鼻孔，就好。聖嚴法師嘛講過，愛專心體會冷空氣慢慢出入的感覺。

講較簡單，三不五時練習坐禪時，天文地理、世界大小事猶是會走來我的頭殻內。嘛真自然會想著菜頭、梨仔、馬頭魚；因為稍等愛去市場買菜啊。

2016.6.26《中華日報》副刋