番薯遮爾無人緣
無偌久前，共（kā，跟）公園邊發財仔車賣豬肉的買三斤黃肉番薯，鬆，好食，也袂像超級市場賣的，加減有臭hiunn（變質）的。賣肉的講彼是in阿嫂佇北港種的，品種好。
這工，我共鬥陣運動的太太講，「賣豬肉的今仔日毋知有閣賣番薯無。」
「這陣食番薯，恁兜的老歲仔敢袂講話？」
「欲講啥？」我好奇。
「欲過年矣，逐家攏嘛欲買好料的，過豐沛的年，閣有一个好彩頭；你買這款粗俗的物件，序大（長輩）看著一定無歡喜；阮大家（婆婆）若猶佇咧，一定會罵我頭殼歹去，毋知輕重。」
我講過年若過日，阮已經慣勢逐早頓食番薯，厝內若無番薯通家己炊，一定會去便利商店買烘好的。
我紲落（接著）講，「而且，阮兜的老歲仔就是我，我就是序大啊。」
行去發財仔車遐，無看見塗跤（地上）有大大的布袋仔，問頭家娘今仔日無賣番薯？伊講，「倚年矣，阮阿嫂無時間去田裡挖予我賣矣。這時陣，人嘛無愛買啦。」
原來過年的時，番薯遮爾無人緣；逐家攏想起伊「艱苦時代食物」的身份，無想欲和伊有牽連啦。
冬筍的地位就無仝款。
我一个同事講過，in大家教查某孫切過年一定愛炒的素十錦時，共伊講所有的材料，像豆干、木耳、香菇、紅菜頭等等，攏愛切幼幼；毋過，冬筍愛切較大片咧，「冬筍足貴，切較大片看較有，表示咱過了真富足。」
有影，今年的冬筍一斤四百箍，聽一位太太講伊頂日買著空心的；我一方面嫌貴，一方面驚也去買著bái（差）的，就按呢儉儉kan-na（只）買三支。
我有共你line
過年，我慣勢三十早起（早上）去菜市仔買花和粿。
真濟年來去彼个固定的擔仔（攤）買粿，總是看著桌砧面頂排足濟菜頭粿、發粿和甜粿；無疑悟（想不到）這日，煞賰（剩）少少仔。頭家娘講，「你若閣較慢來，就買無啦。」買粿遮爾競爭？是毋是今年做較少？伊講差不多啊。
粿買好，去對面也是in開的雜貨仔店補一兩項過年欲食的瓜子，竟然kan-na賰一包帶殻的土豆；原味的，半斤爾爾！往年，店口攏排三四種無仝款的瓜子，有本地的有進口的；土豆嘛有幾若種口味隨在人試食啊。
聽我講半斤哪有夠，頭家建議我先訂明年的，到時欲偌濟攏無問題。
「這陣訂明年過年的？」
伊講著。
毋是物資缺的「非常時」，我預定三百六十五工以後欲食的四秀（零食）？我無咧起痟！伊掀手摺簿仔予我看，正經有三四个名寫佇訂貨單內面。
我想著有一遍去大市場買菜，一个太太問賣菜的今仔日有蒜苔無？伊講，「今仔日無，昨昏（天）才有；我有共你line，你哪會無來？」
「按呢啊，手機仔面頂遐爾濟群組，有當時仔袂去看。」
買菜猶著用line通消息？家庭主婦猶著和賣菜的設line的群組？我驚一趒（tiô）；想袂到現代人遮爾依賴電子科技！
比起來，用手摺簿仔記一年後人客訂的雜貨的做法，較有農業時代老派人的人情味呢。
現場寫春聯
彼一日經過社區活動中心，看見真濟人佇遐排隊，等欲提春聯。現寫的春聯較有意思（嘛較燒），我就按呢斡入去和人鬥鬧熱。
桌頂有一寡仔寫好的，我出手欲提，人共我講彼是別人求來的，囥（khǹg，放）佇遐等予焦（乾）；叫我排列等，「tsit-má（現在），人較少，免等傷（太）久。」
有三四个人咧寫，寫字閣畫一隻雞的彼个排上濟人；一个面頭前無人，毋免等，我閣欲予伊較袂孤單，就行過去。寫字的先生問我是欲貼佇佗位，愛對聯抑是一張就好？一張就好，貼佇公寓大門。伊閣問我欲寫啥？我愣一下，竟然愛家己想字？看隔壁桌閣畫好一隻雞矣，心內想猴走雞到，既然是丁酉雞年，總是愛有雞，就按呢請伊寫＜金雞報喜＞。（實在真無創意啊！）
這位先生用墨無算本，大筆敢若uì（從）水底撈（hôo）起來；四个字寫甲「墨汁淋漓」。字是真媠，閣有氣勢；毋過遮爾澹（濕），欲等偌久才會焦？服務人員建議我食過中晝才來提。啊？閣一逝（tsuā，趟）工來？伊講啊無就愛拜託親子活動區的人替我用吹風機吹。
我看遐的人嘛無閒，囡仔用柴刻的模仔印一隻金色的雞，義工就替in（他們）吹。（彼才叫做金雞啊。）
趁有人閬縫（làng-phāng）無咧吹，趕緊去拜託伊。吹一時仔，我感覺歹勢，講無要緊，我一路弄（lāng，抖動）風提轉去。
提一張＜金雞報喜＞的紅紙按呢行，敢若咧跳加官；佇公車頂，嘛驚墨去沐著別人的衫。尾後，我猶是共伊略略仔捲起來。毋過，轉去到厝，紙展開，有的筆畫糊去啦。這欲按怎貼？實在是食飽換枵去和人鬥這个鬧熱。
明年，還是家己來寫。無論偌bái，家己寫的總是較有意義。
|
寫春聯，以前是寫字人趁錢的好時機，一位畫家講伊讀中學的時，佇庄仔內排桌替人寫，褲袋仔內逐工攏櫼（tsinn，塞）真濟銀票；暗時轉去厝，一大把撏（jîm，掏）出來，老母那整理那算，笑甲足歡喜。
|
已經過身的作家李潼也捌寫過一篇文章，講in兄弟替人寫春聯趁錢的故事；伊文學修養好，隨在人客「點菜」，現場做詩詞，有的人要求用家己的名寫對聯，也無問題。
毋知佗一年開始，廟寺抑是文化機關除了送印好的春聯以外，閣會舉辦現場書寫的活動，予民眾來討。聽講參加這个活動的書法先生半是做義工，kan-na收著一寡仔車馬費；這个年頭，學生囡仔抑是大人，想欲展跤手趁這款錢煞無啥機會矣。
。原載2017. 3月號《文訊》雜誌。
文章定位：
