好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

欖仁落葉

     我上有感覺的兩个季節是：大葉欖仁季（春天）和第倫桃季（熱天）。這兩種樹仔佇我的「視力」範圍內，去公園運動會看著。

In落落來的葉/果子真媠，我攏會去抾（khioh，拾）。二月底，我開始抾大葉欖仁葉。

三年前的春天，看著樹仔跤紅記記的葉仔，我才知影阮做運動的所在有一欉大葉欖仁。伊落落來的葉仔自淺黃到大紅，每一葉的色水lam7（混）甲真自然，有水彩畫的流動感。有的規片紅甲像火焰，面頂閣有露水，敢若紅寶石！

        欖仁葉與子

草埔仔頂的紅寶石，我抾甲足歡喜。In的青春誠短，少女兩三日就開始老，葉仔邊捲起來翹起來；焦去，變做咖啡色。共伊夾佇冊內底，伊的美貌嘛無久長。毋過，抾轉去彼時陣的歡喜就價值矣；囥（khng3，放）佇冊桌頂，看葉仔沓沓仔（tauh8-tauh8-a2，緩慢地）老去，閣敢若咧看人，看人生。

有一段時間，聽講大葉欖仁的焦葉仔煎茶來啉，會當治肝病；所以樹仔跤無葉仔，有的人「守樹待葉」，即時抾去矣。

可能後來證明這个醫療效果是膨風的，痟欖仁葉仔的風潮過去，公園內這欉樹仔的葉仔，才無人關心，隨在我抾。

第一遍，我頭犁犁咧揣（tshue7，找）寶，就有人問我是欲提葉仔轉去煎茶？

紲落一禮拜內，至少有三四的人問我仝款的問題。看起來台灣人差不多攏聽過這種葉仔的醫療功效。我講毋是，只是看媠，猶有人懷疑。在in的想法，年紀大的人會去抾葉仔，總是為著養生才對。

聽講大葉欖仁的子會食得，每年三、四月，新穎（inn2，幼芽）會漸漸發出來，等新穎全部展開，就進入開花期。

毋過，我毋捌看過這欉樹仔的花，也無看過果子。有朋友講in厝附近也有一欉，伊攏抾子來做小船仔；有一遍伊做一隻龜予我，三四公分長的子扁圓形，做龜身，五支番仔火枝做龜的跤和頭，真親像呢。拄仔（剛）予我的時是綠色的，後來變做銅色。

請教一个佇遮運動真濟年的大姊，看過咱這欉大葉欖仁結子無？伊講無，「這欉是公的。」

2017.3.13《中華日報》副刋