阮安搭佇遮兮每一字，親像是會生湠的相思仔林，一叢牽挽一叢，一菢攬過一菢，徛佇這塊土地金金看，看南勢溪佮北勢溪按怎會合，看新店溪佮大漢溪按怎讚聲，搝長一條淡水河迵大海兮生命線。
彼日，山腳姑丈過身欲出山，阮佮阮尪撥工開車載台北姑仔轉去通霄。一路阮聽伊老大人勻勻仔講起幾落段以前阮攏毋捌聽過兮囡仔代，聽咧聽咧，家己若親像跋落時間兮迷魂陣，分袂清楚這到底是伊兮人生故事？抑是照影阮未來心情兮一面鏡？
自細漢阮就聽厝邊頭尾呵咾阮兮面模仔生了誠媠，誠像嫁去台北彼个阿姑細漢兮時陣。這擺，阮拄好有機會載伊，順續聽伊講起阮囡仔時是按怎黏伊黏甲剝袂落離，就連伊欲出嫁進前彼一暗，欲去媽祖宮邊仔彼間美容院電頭鬃，阮嘛哭欲綴伊去，甘願予伊攬佇心肝頭煽燒風，嘛欲盹龜等伊。
日頭欲落海兮時陣，阮閣開車載伊去虎頭山頂走揣伊囡仔時兮記智——日本神社，順續看海看街景後壁彼片青翠兮山崙，阮嘛趁這擺兮機會，翕幾落張相片做紀念。看伊一路笑微微，親像欲晚仔兮海風，吹起來誠清爽，伊講伊誠久誠久毋捌遮歡喜矣。
這幾冬，伊兮跤頭趺關節退化誠嚴重，行路變甲誠慢，毋管是落樓梯抑是落坡崎，看起來攏誠吃力。彼工，阮就親像伊兮查某囝仝款，牽伊兮手，一路勻勻仔行勻勻看。
講到通霄這个日本神社，是最近阮定定造訪兮一个所在，自從舊年秋天，第一擺陪阮尪轉來遮看海，順續行阮囡仔時行過兮路，這馬只要有機會轉來故鄉，阮攏會閣來遮行行坐坐咧，這種感覺就親像天頂尾溜彼幾落隻兮鳥仔，佇金黃兮暮色中踅來踅去，卡踅嘛踅袂過徛佇出海口爿仔這六支染著故鄉天色兮煙筒管。
阿姑講，自從伊嫁去台北了後，上起碼嘛有幾落十冬，毋捌閣爬上這粒虎頭山。她猶記得頂擺來，是因為伊轉來共阿公做生日，彼當時阮學校拄好佇開運動會，伊去柑仔店買兩罐黑松汽水來學校看阮佮阿兄。
伊若毋講，阮煞險嘛袂記遮件代誌。彼工，伊毋爾提兩罐黑松汽水來，猶閣牽伊生兮一對雙生仔來。想袂到目一睨，阿敏嘛閣生一對雙生仔，今年攏欲考大學矣。
自阮讀冊以來，就知影一件代誌——汝兮血脈未來會佇汝兮下一代繼續湠落去，汝兮囡仔這馬兮形影就是猶袂落土爛兮汝；阮兮故事佇阮家己兮生命以外，若有法度按呢繼續生湠，這就是講阮兮生命就親像南勢溪，並毋是猶未迵大海彼一段等待佮孤單。
昨暝欲睏進前，阮閣共家己寫兮這篇日誌位頭甲尾詳細看幾落擺，規暝續來一直眠夢一直眠夢，夢阮心內想欲畫出來這幅圖兮天頂線，續落欲按怎牽絲變成山頂尾溜彼片雲，彼片滲滲仔落佇相思仔林兮相思雨？
汝敢會記智咱定定去彼片山，溪墘樹蔭下底落規土跤兮台灣相思仔花？這馬按怎看按怎想攏誠媠；黃黃一蕊一蕊，親像暗暝天頂金爍爍兮目睭，恬恬用母親看顧心肝仔囝兮眼神牽挽著阮，親像攬著阮兮夢佇胸前予天頂兮月娘看。
夢中遮形影重重疊疊，若親像一齣黑白電影倒退拖，卡帶……停佇滲滲仔雨兮相思仔林，停佇落雨煞兮青草埔，停佇青山崙莩野菇兮老柴箍，停佇田溝仔墘抾田螺抓水蛙兮笑聲，停佇囡仔時想欲轉大人兮向望中，向望雨緊煞天緊闊，向望會當離開故鄉一切兮種種。
誠濟年了後，阮佇夢中時常想起紅瓦厝彼叢老榕樹；阮嘛時常想起佮阿公坐佇簾簷跤彼條長椅條，恬恬看春天兮雨水掛佇老榕樹兮嘴鬚，一粒一粒光影影，親像一摜一摜兮白珍珠。有時陣，阮嘛憨憨仔徛佇樹跤一直等一直等，等遐兮珍珠落落來土跤水窟跳水舞。
這馬想起來，原來彼片相思仔林就親像阮囝仔時彼叢老榕樹，樹跤有阮囡仔時想欲轉大人兮等待；有阿公行過春天兮雨水聲，遮長長短短，一摜一摜，毋管是珍珠抑是目屎，攏位老榕樹兮嘴鬚落落來。
彼當時兮等待，其實並無貪心，只是想欲等待雙跤搝長會當走卡遠；只是想欲等待家己轉長大人，了後會當離開厝走揣家己兮美夢爾爾。
這馬兮雨水滴佇相思仔林，發出仝款沈重孤單兮歌聲，規世界親像攏佇等待這場落袂煞兮冷雨，啥物時陣才欲結束？
阮兮美夢嘛佇遮等待，等待雨水稍歇一下，就親像阮囝仔時佇落雨煞，會當去山邊兮坑崁跤走揣阮兮貓仔囝，想伊一定佇遐等阮去抾田螺抓水蛙予伊食；就親像阮等待雨落煞，趕緊去山邊挖一个土灶，順續偷挖幾條蕃薯，家己抾柴起火，烘甲規面紅記記，一雙手若親像黑火炭，嘴角黏著黃黃香香兮蕃薯味。
汝講，阮這種日誌畫面佇汝夢中，必然是一个無聊歇寒兮悲掠囡仔時，佇汝兮記置內底，內湖兮冬天總是落著雨。汝臆阮紅瓦厝邊仔彼叢榕樹跤，是阮感覺上溫暖上有希望兮所在。是矣，雨水位樹葉頂懸落入塗跤彼條大水溝，阮綴阿兄拗一隻紙船放落去，看伊順著雨水勻勻仔流過阮兜，經過防空壕轉彎彼條巷仔口，繼續向巷仔頭流出去。
阮定定想欲出去，去媽祖宮閣過去彼粒虎頭山，去山跤彼个籃球埕，看山頂彼間若親像鬼仔厝兮日本神社，落著大雨兮日子，內底敢有枉死鬼仔兮哭聲？可惜，阮若會當放一隻小小兮紙船載著阮兮夢出去，看伊流過阮兜佮隔壁兮門口埕，然後歇佇風雨中飄飄搖搖。
汝講汝細漢兮時陣，落雨天毋人陪，上愛家己坐佇水溝墘，因為水溝仔內底有一寡水蠆抑是龍蝨會當觀察，汝上愛看怹佇清清兮水底來回轉踅。若毋，就家己坐佇破藤椅頂頭，看規片若西遊記花果山兮水簾，位懸懸兮厝瓦頂落落來。
這馬想起來，細漢咱離開厝，上遠嘛只是行甲山邊、田邊、海邊，行過一擺閣一擺熟識兮田岸路，軁過一叢閣一叢刺跤兮麻黃樹，關心遐兮毋人愛兮貓仔狗毛蟹佮野花草。這馬大漢了後，離厝越來越遙遠，身軀邊兮一切，續感覺越來越生份。
菜瓜詩
詩是啥？詩是阮頭殼疼，起烘爐火勻勻仔煉出來兮一味漢藥汁，阮共藥粕佮藥劑倒置碗底詳細看，才知影，浮置頂面兮是溫膽湯，沉置碗底兮是紅娘藥方。
汝一定毋相信，原本詩是欣賞相思仔林上媠喟兮滋味，這馬續來因為一本冊內底兮幾句話，予阮自故鄉彼粒虎頭山彼片相思仔林，看向土城山崙閣過去彼座觀音山，佮阮跤底所踏兮這塊險險仔欲荒蕪兮菜瓜園。
最近佇幾位文友兮鼓勵下，阮毋爾漸漸看著徛佇日頭跤兮家己，嘛看著天光了後兮光線，射向東北岸彼片海湧滾絞兮大海。
偌想起阮長久以來欲行兮這條文學路，心內偌像予滿天烏暗兮雲海佮水霧罩咧，續落，出現佇頭前兮風雨若掃射，愈想是愈驚惶。
這款心情，坦白講，只有真正行過船抑是爬過懸山兮人才知影。即馬，阮毋若共天公借膽，憨憨向前行，嘛攬一欉會懸藤兮菜瓜，共金黃色兮花蕊湠甲規山壁，雖然猶原抑是毋知影佗一年？佗一日？佗一蕊？才會予蜜蜂蝴蝶晟作菜瓜。
最近，阮嘛定定問家己，台灣文學是啥物？是阮卡熟手兮華文所寫兮文章，抑是這馬斡頭轉來學阿公細漢吟兮詩寫兮字？
詩是啥？佇阮看來，詩是一葩一葩爍咧爍咧兮火金姑，有時宓佇目睭，有時藏佇心肝，照著八八水災那瑪夏鄉彼條淹過大水崩過山壁，崎崎嶇嶇兮小路；無偌久，阮斡頭看，看著月娘帶一群星仔囝綴佇阮後壁，甲阮心內彼片菜瓜花照甲光影影。
詩是啥？詩是一粒一粒藏佇阿母菜園仔兮菜瓜子，日頭若出，伊就會跰開。
詩是啥？詩是阿母兮形影——阿母一世人毋讀冊，毋夠伊毋認命，盈早晚攏佇厝內學寫字兼種菜瓜；詩是啥？詩是阿母兮堅持——阿母一世人毋識字，毋夠伊誠厲害，目一睨，菜瓜花就湠甲規厝；細漢兮時，阮攏臆袂出，遐兮字按怎讀，才會當讀出佮菜瓜詩會比評兮滋味？
毋夠，這馬阮知影，阿母毋若厲害會寫字，抑閣會吟菜瓜詩，伊兮菜瓜詩頂頭揣毋半條菜瓜，因為伊共菜瓜花，藏佇碗箸，藏佇煎匙，藏佇雙手，藏佇鹹酸苦澀兮日子，藏佇一菢位烏翻白兮頭毛絲，藏佇一杯白滾水，藏佇雙跤踏著裁縫車等待天光兮半暝，藏佇家己愈來愈蝹龜兮身軀，藏佇一群愈來愈正樣兮囝兒。
原來，詩是一蕊一蕊恬恬清香恬恬媠兮菜瓜花，明明開佇遐，毋夠咱若無打開心窗'詳細看詳細聽，嘛聽毋伊佇講啥。
詩是啥？詩是這馬阮攬佇身驅這欉會懸藤閣會開花兮菜瓜。
