18-7-08(五)Lunch王老師話我知，佢話校長同佢講9月唔同佢續約，因佢想請全職，而阿王又只係做得半日，唉…好唔捨得佢呢，同埋外評才過左一日，校長就即刻講d咁o既野，俾人一種打完齋唔要和尚o既感覺lor。4:00時，高班表演畢業舞蹈，我就同佢地夾番d音樂時，然後改番powerpoint o既播放時間，4:30放學，差不多帶曬成班仔去畫班，我就upload埋個powerpoint去安強學校，跟住就開始打profile，打左5,6分報告，5:30放工了，諗住坐115過港澳碼頭，但入到去巴士站時，發覺巴士站裝修緊，我又唔知115號巴士搬了去邊，跟住有見到有部6x小巴可以直出尖沙咀，我就直刻上車，雖然撘小巴出尖沙咀轉地鐵d車費會貴左，不過早d會合阿姨、表妹佢地，早d過澳門，點都好過搞得太夜先過去。
在6:10時(表妹打來問我係邊，佢地諗住買船飛先)，而我下一站已是中環，但我掛住打nds，唔知道中環已轉車去上環，結果坐番倒頭車又過番尖沙咀，先醒覺自己唔記得轉車，於是馬上落車出閘，過對面再坐番地鐵去金鐘，再轉車去上環。
好彩表妹佢地買左7:10o既船，所以一定趕得切。
上船後，係度搞個電話o既飛線，諗住close左個冇電話會飛去留言信箱o既功能，否則如果有人打俾我，我唔停電話，佢會先計一次漫遊，然後再飛番去香港o既流言信箱，計兩次漫遊，都好貴架!我打埋上台問佢點樣去關呢個功能，我照足佢講o既方法去做，都關唔到呢個功能，所以有電話打到來時，就唯有聽吧!
8點幾落船，坐酒店o既免費車去新馬路，見到英皇駕車己開始上客，又咩人，但諗住新葡京會近d，於是就去排呢格車，點知太多人，都要等第二架車先上到，早知一早坐英皇架車啦!
去到新葡京係停車場落車，佢焗你一定要經賭場才可以離開酒店，咁o既招數都俾佢度到。真係…
去左新馬路o既「順德公」食晚餐，可以睇到「甜言蜜語」大結局個幕。原來已經9:30了，好肚餓呢!好彩下午茶時，玉姐俾左琴日食剩o既一件蛋糕俾我食，有件蛋糕頂下肚，都唔係太餓。
叫左碟$48炸雞卷，d粉太厚，d雞太少，所以唔好食。$58白飯魚，好太碟，抵食，$85西蘭花炒帶子，太少西蘭花，而帶子更是一開三，太薄，呢碟野超唔抵lor!
飯後坐的士去關閘，過關去拱北，係小商鋪買左兩隻碟「六樓後座2家屬謝禮」同「一個好爸爸」，諗返屋企睇。
買完碟就坐的士返去阿姨間屋到。呢棟大廈已不及周邊新起的大廈漂亮了，但唯一令我欣賞o既係佢是一間有兩層o既屋。
望到間屋個廳咁大，我就係度諗，如果呢度可以用來招呼我d朋友捉圍棋，你話幾好呢!如果我將有間咁大o既屋，我一定會咁做。
晚上肚餓，唉!應該係下午件蛋糕出事，我當時食時，都覺得d味道好似有奇怪，我以為呢款蛋糕係咁，但而家諗落應該係佢開紿變壞吧!算啦!當清腸胃。十二點幾就瞓了。
19-7-07(六)成晚都瞓得唔好，因為我地三個人瞓一張床，佢地其中一個人一郁，我都會醒，所以成晚都不斷咁醒，好辛苦呢!同埋早上，d太陽射入房，已經(殘)醒，同埋熱醒。
11點幾起身，梳洗後行去五月花酒樓飲茶，外面的天氣好鬼熱，點知入到酒樓，d冷氣又唔夠，很熱呢!食完野就行去國貿商場，商場好多商鋪都有特價，我用$56買了件一件黑色T-shirt，而Converse更抵，買二對鞋都只是收其中最貴一對的價錢，可惜我出街少著波鞋，所以冇買野，表妹就買了兩對鞋。
佢一對自己著，一對攞上網賣。
行到4點就坐的士去步行街果邊，我同阿姨就按摩，表妹就係隔來睇下電視，瞓下覺，最激氣o既係我沖涼時，突然聽到「叮」一聲，我知道隻福娃耳環跌大落地，於是即刻關水喉，諗住執番隻耳環，點知個地下搵唔到隻耳環，大獲，我諗頭先「叮」一聲，係隻耳環跌左落去個條渠到，唉…個渠蓋也打不開，不過打得開都冇用，因為我都見唔到耳環o既蹤跡。又唔係好傷感的，因為福娃鎖匙扣可以賣得番，個耳環圈都可以買得番，用錢可以解決o既問題，都唔係d咩問題。8點幾leave。
跟住去了米蘭商場食一間台灣野做晚餐，廿幾蚊個餐，d野麻麻地啦!跟住行商場o既超巿，超巿有奧運專門店，我第一時間就買番個鎖匙扣了。之後我地買了d飲品，同一個電風扇。跟住10:30坐的士回家。
返到房，同阿姨一齊攞張床單去遮住個窗，就係唔想明天俾太陽曬。
一早12點幾已沖完涼，可以瞓覺了，阿姨、表妹係到傾計，於是我又打多陣nds先，到熄燈瞓覺時，大家又係到傾計，傾到成3點幾先瞓。
20-7-08(日)又係瞓得唔好o既一晚，成晚醒，到9點幾直頭醒了，因為我以為已經11點幾，於是我就去刷牙洗面，之後我去開電話時，才知只是9點幾，咁就唯有再瞓過，但唔係好瞓得著，過左好耐好耐先可以瞓到。
12點幾起身，阿姨問我可唔可以攞埋明天放假，如果佢早講就得，因為校長都迫緊我地補OT，但而家咁遲講，就未必得，因佢都要安排人手，況且我都將補OT那日假放係4/8(一)，是關之前個3日會入camp，同埋再留係珠海都冇乜野好玩，還是早點回香港好。
大家收拾好就離開了，坐的士去灣仔海鮮街，入左間酒樓後，先知係要買海鮮入o黎食，酒樓派個員工出來酒樓門口個攤檔，幫我地講價，但我覺得佢地好明顯係打曬龍通的。
呢間酒樓o既烹調技巧麻麻，不過d海鮮本身夠新鮮，所以都叫ok，但冷氣就不夠lor，當其中一枱客人走了，員工就即刻關冷氣，我叫d員工開番冷氣，轉頭d員工就走去開窗，跟住個老闆就叫個員工關番冷氣，簡直不知所謂，呢間「楊記海鮮酒樓」，我一定唔會幫襯第二次。
飯後係d乾貨店買左辣魚仔同魷魚絲。然後坐的士去番拱北，行商場，自知d頭髮剪左齊陰後，我一直都想買一個有一行閃石o既頭箍，有間鋪頭開價$30，我還價$20成功，於是即刻帶住tim，阿姨話自從我買左個頭箍後，好似好開心，係架!我好容易開心的。
行完街過關去澳門，係關閘坐英皇小巴去英皇酒店，記存曬d行理就行出新馬路，跟住去鉅記買手信，lay少話要雀肉乾，今次係專登o黎幫佢買的，本來我d屋企人都打算係珠海坐船走，如果唔係為左幫你買雀肉乾，都唔返過來，lay少你識到我呢d朋友，係你o既福氣，重成日幫我改花名，你真係要好好反醒下。
跟住去義順食野，我想食o既豬扒包買曬，改食雙皮奶，然後再返酒店取行理。去到碼頭時8:40，但turbojet o既船要到00:45先有位，太誇張了，去買新渡輪o既船飛都要到11:00先有位，估唔到d位咁full。
本來我地想行去八百伴，但行到途中已經很累，同埋見到沿海住碼頭d好似星光大道o既長沿海長廊，於是坐在到休息，打下nds，食下雀肉乾，同埋傾下計。
10:15行番去碼頭，準備上船，11:04開船，12點幾落船，係船上時搵爸爸，佢又咁啱係佐敦，所以阿姨叫佢o黎車我地返屋企。
1點前已回家了，再沖涼洗頭後，2點幾先有得瞓。
PS返來香港開電話時，竟收到璥鋒媽媽o既SMS，話要幫個小朋友請假…家長用呢個方式幫小朋友請假，我都係第一遇到。
PS三日o既旅程，每一天都總係有d唔如意o既事情發生。都係在家千日好。
文章定位：
人氣(181) | 回應(4)| 推薦 (
0)| 收藏 (
0)|
轉寄
全站分類:
不分類
