24h購物| | PChome| 登入
2016-07-28 17:11:50| 人氣647| 回應7 | 上一篇 | 下一篇

森話家常：街頭點滴…

推薦 0 收藏 0 轉貼0 訂閱站台

無論上街或搭車我都會望望街景，從中又可能會睇多一點點…

 

捉Pokemon…

可能出街或車程經過的地方，唔係所謂的「精靈熱點」啦～所以唔知呢個game可以去到有幾墟冚！只係不時見到幾個學生哥對住手機圍埋一齊捉「精靈」！可能熱點地區會熱鬧到嚇親人…初時知有呢個game都係聽個電台主持講先知！或者港人乜都係一窩蜂，見外國人熱玩又純為湊吓熱鬧，唔通呢啲就所謂嘅香港精神…哈哈哈！！


長者傳單員…

昨日見到幾名長者在街上派傳單，因為遠所以唔清楚傳單係乜公司…但佢哋專揀長者派…唔通可以薪酬成本減啲?!!見長者們派傳單都幾辛苦，三十幾度在街上，仲要著多件有公司名的背心，而且唔知要企幾耐…因為見派畀人都冇人攞，個個行過就算…嗰一刻，又會忽然好同情當中的長者們，又會覺得當中唔接的人冇咩同理心～雖則未至於幫手一齊派，但起碼都應該接過傳單，否則長者們真係有排收工！返去同人講，原來都有幾多長者出來派傳單架！其實又唔係森伯的同情心氾濫，只不過有如感同身受啫…


月餅廣告…

講返輕鬆少少嘅話題…香港的商家宣傳真係一浪接一浪，而家已經要賣月餅廣告，有時諗吓賣得嚟都差唔多到中秋，真係一年容易又中秋…森伯又倍感唏噓～唉~~~之不過嗰日又畀我見到今年多咗款A字牌的雪糕月餅！據我知平時一般市售的雪糕月餅就有H字牌！感覺上呢隻A牌雪糕係走街坊路線，不過真實價錢就冇講，好似話中秋限定，或者睇吓有冇機緣見到，見到都會買啲應節！算係特別少少咁啦…

我要檢舉
台長： 森源

您可能對以下文章有興趣

人氣(647) | 回應(7)| 推薦 (0)| 收藏 (0)
全站分類: 心情日記(隨筆、日記、心情手札)

我要回應
搞一爺
我喺YT睇到條美國短片，正當天氣報告時，有條女低頭揸住部手機捉精靈行過鏡頭都唔知，嚇咗個天氣男郎一下， 然後，佢回個神笑住講話pokemon ，真係好瘋狂架。 又有啲人懶行就開動部drone 飛去捉，充份運用新科技發揮創意去解決問題。其實，將虛擬加落實體，我都感覺呢個概念好有趣味，不過，講真個game 係好白痴，好處係畀啲肥鬼行多啲運動吓。

森仔好有愛心喎！

A字牌係咪 阿波× 呀？ 13年買＄188 一盒四個喎，都唔平，我買幾盒唔同口味嘅雪糕食低好多。
2016-07-28 21:01:23
版主回應
YT好多呢類影片，掛住玩就會頻生意外～～其實都幾啱而家的人玩，佢哋係唔係都低頭睇手機，今次仲可以乘機當玩手電囉！哈哈哈
呢隻game純係聽報導，未真實玩過……呢隻遊戲對我嚟講都冇咩興趣，我又唔覺得白痴，只係覺得無聊啫！心智未成熟的人就可以當係鼓勵自己運動吓，運動呢家嘢係自動自覺架嘛…

你成日嚟森blog探森伯個老人家，都係滿有愛心的人啦…XXXXD

好嘢喎！你又知道我講呢隻雪糕，原來你咁早就買，我仲以為係新嘢：P…佢既價錢等如一盒雙黃～未試過既都OK！幾盒雪糕又唔同食法，去茶樓買幾籠蓮容包都抵過食月餅啦～～XD
2016-07-29 09:05:02
stella luk
長者真係幾捱得又抵諗架，但我相信佢哋是兼職，用自己努力賺錢，我敬重！
2016-07-28 21:04:19
版主回應
講得好！其實我都覺得自食其力是值得欣賞，不過有感而發的是街上的路人有點冷漠而已…
2016-07-29 09:06:33
KaKa
我見周圍都幾多人玩呢個遊戲，身邊都有友人玩緊，虚擬與實境連在一起，
確實幾有趣。
禽日喺地下鐵就見到一個玩Pokemon的情境真喺幾有趣，見坐在旁邊的一位女士玩得非常興奮，偷望一下…咦！做乜個情境中的男士條褲咁熟面口嘅，原來喺站在那女士前面的男士的褲子來，那女士正在他的重要部位捉緊精靈，那一刻我差點忍笑不住！kakakaka……
(好在那男士不知情啫，不然……他真的會尷尬死！)

見到派傳單的…通常我實會接，因為人哋揾緊食嘛！

以前屋企人工作的公司有送某xx雪糕月餅劵，好正架…所以中秋節有雪糕壽司、雪糕月餅食…
2016-07-29 09:26:29
版主回應
呢個捉精靈的遊戲在港先啱啱開始，呢段時間梗係多人玩…令咁多人瘋狂相信實有佢既吸引之處…
哈哈哈，呢個情景又幾好笑～畀我覺得嗰位女士可能別有用心呢？！咁多度唔捉，偏偏在男士褲處捉精靈……嗰位女士都夠鬼馬，換轉係攞住手機係位男士對住個女士，以為係色狼影女士裙底…畀人捉到又話搵精靈，肯定畀人打到橫晒抬出地鐵，真係好唔公平XXD

其實接唔接張傳單，好睇當時的狀況，若然太趕時間真係咩都唔理架～～不過當時係收工時間，理應都唔屬於繁忙時間啦～～
証明你好有善心，識得為人著想～～

咁又幾好，呢類食品平時唔會買來食，覺得唔太值～～既然有優惠券就試吓無妨，雪糕壽司都幾有趣喎…..
2016-07-29 11:45:42
基爾
初頭我都係咁諗,暑假可以多出外走走同啲朋友仔gathering都唔錯,唔駛日日宅在家打機,又可以行多幾里路減減卡路里,身體都健康啲^^
本來唔知捉啲精靈有乜用,後來睇報紙才知可以轉售,聽聞level高的account可以賣千幾蚊云云,唔知有冇人會買....不過啲店舖食肆可能都有商機嘅!!
月餅太貴又滯唔食得多,我鍾意蓮蓉包同雪糕多一點XXXD
2016-07-29 11:38:05
版主回應
Gael 兄又暑假?!!又同啲朋友仔?!!又在家打機?!!忽然好似時下的學生哥＠＠~~

其實我自己就覺得打機都幾浪費時間，森伯平時都好宅吓！無詳特別都未必出街街，不過唔好以為好空閒，在家有千樣嘢要做（畫吓嘢溫吓書…）比返工差唔多，而且好快又一日～～有恆心落去行行走走已經係運動啦…

哦！原來可以賣千幾蚊，唔怪得啲人咁熱衷儲精靈啦…

其實一年一度，自己本身都鍾意食月餅，當然食番傳統嗰種，一兩個止就OK
2016-07-29 12:14:11
ykk
近日搭電車看見一個怪現象, 電車樓上整整齊齊, 安靜地, 坐滿了一班年青人, 各人手持手機, 動作千篇一律, 高興地尋找pokemon, 想如果其他事情也同樣一樣, 明天會更好.
2016-07-29 12:33:42
版主回應
其實時下搭咩車都係個個睇手機，又唔知ＫＫ係咪低頭一族？！…大部份港人都係有種湊熱鬧的心態，可能熱潮過後會冇乜人提…
2016-08-03 09:11:48
ykk
長者傳單員, 相信是各有所須. 首先公司請人難, 後健康長者搵外塊, 只是天時地不利, 望天公造美, 唔好咁晒咁熱.
2016-07-29 12:43:03
版主回應
你也說得對！對於現在的長者，個個都精力十足…除咗森伯XXD~~有收入之餘亦有工作寄託…可能人性就是如此，人哋的事就與自己冇乜相干！就係缺少呢份同理心囉~~
2016-08-03 11:33:21
ykk
相信傳統月餅市場會越來越細少, 年輕人少吃, 送禮亦大不如前, 好在生產商各出奇謀, 生口味應運而生.
2016-07-29 17:22:18
版主回應
係呀~~所以現在出的月餅，比較似小食、甜品、糕點之類~~但賣的價錢就同傳統月餅一樣…不過都係去迎合消費者而已！搞到傳統的節日都冇咩氣氛，只是靠商家商品營造~~
2016-08-03 09:12:31
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文