24h購物| | PChome| 登入
2017-02-23 17:12:47| 人氣1,477| 回應7 | 上一篇 | 下一篇

東起西起…

推薦 0 收藏 0 轉貼0 訂閱站台

起－故博館…

其實對大部份港人來講，平時得閒外出的時候，又會首選什麼地方行行逛逛呢？近來政府推廣吓啲文化活動，唔駛畀人話香港係文化沙漠，所以好多博物館都可以免費入場，畀大眾沾染番少少文化氣息，欣賞吓藝術…畀森伯啲魯粗又係對牛彈琴～哈哈哈！！又唔會嘅～森伯某些時候都好文質彬彬架！遇有啱睇的主題都會去睇吓展覽…近排熱話的故宮博物館，唔知大家又點睇呢？！早前先同人講過，好多人都覺得整個咁大型的博物館，裡面又有幾多珍（真）品可以睇到呢?!!其實香港的博物館展品來來去去都係差唔多，在A博物館見到，又可能在B博物館又睇到相若…不過點都好，有故宮珍品睇都想睇吓～更何況在西九起，第時要去都方便啲啦！
其實睇吓展覽都唔錯，人不多慢慢行慢慢睇…不過好視乎有冇啱睇的展品而已～


起－中醫院…

遲啲可能有首間中醫醫院在香港出現，當然最後唔知能否落實…自從中醫的診療地位提高，大家若果有咩頭暈身興，除咗西醫之外都起碼有多個選擇！講到中醫，細個時睇得比較多，到人大了，唔係冇病冇痛咁好喎！一係就唔駛睇醫生，一係就大大鑊迫住入廠見醫生…唉～～其實對我來講，注重健康好重要，若果有小毛病或者簡單調理，我會信中醫，好似早前有親人患咗大感冒，靠買一家老字號的中藥沖劑當茶飲，不到一兩日就好返！冇副作用之餘都幾駛得～

據講將來呢間中醫院都係為配合西醫院來診療，目的都係中西合璧可以有更好的療效～～

若果將來呢間公營的中醫院開得成都幾好，公營的話實有醫生紙出，中醫著重講調理，慢慢調理才會好，分分鐘簡單的傷風感冒都要抖足一頭半個月，唔知到時啲僱主公司又認唔認可咁呢?!!

我要檢舉
#博物館#參觀展覽#故宮#中醫
台長： 森源

您可能對以下文章有興趣

人氣(1,477) | 回應(7)| 推薦 (0)| 收藏 (0)
全站分類: 心情日記(隨筆、日記、心情手札)

我要回應
stella luk
我一向冇睇中醫習慣，但去年開始做天灸、針灸，我相信有幫助。
2017-02-23 22:28:47
版主回應
天灸我未聽過，我曾經想去試下針灸，不過怕唔係好專的醫師，針到腫上加腫就弊～有機會在你Blog分享吓…
2017-02-24 09:45:43
搞一爺
香港人培育成揾錢第一，讀書、文化活動都係為咗入名校，一掉低個奶樽就要報讀學前教育班，策劃前1/3生，為子女鋪條康莊大路，有錢有人生，文化只係配角，咁一定係文化沙漠啦！有乜社會就有乜人類，物競天擇、適者生存， 除非你係含住銀匙羹出世啦！

不過，講開人生又講，未來，人工智能、機械人、大數據嘅結合會太利害，幾拾年後 （2047年）,世界會有翻天覆地嘅大變化，機械人將會搶走大多數職位包括工廠生產（熄燈工廠）、律師、財務師、會計師、建築業、司機（冇人駕駛）、醫生、護士、家庭傭工、記者（舊年奧運新聞係用電腦3秒鐘就寫出到一篇報道）、酒店，倉務、銷售、保險、銀行……等等，電腦打敗人類圍棋頂尖高手，依家出生嘅嬰孩，父母就要好好諗吓選擇讀邊科，入乜行先至唔會被淘汰，真係要思考下，最近我都喺網上多多關注呢啲文章。

依家老人係請個印尼工人姐姐照顧，到我退休而身體又老化至行動唔方便將會買/租個機械人黎照顧自己，如冇意外，森伯都會有呢一日。

中醫都有佢優勝嘅地方，中西合璧 、取長補短，混合出最好嘅治病方法。

（唔好長氣過森伯，就寫住咁多先。）
2017-02-24 07:27:20
版主回應
@@...@@...@@...你呢篇係論文定回應?!!!......

或者講咩時代就產生咩人類，港人的性格樣樣都驚執書，而且好多人都係羊群心理，人有我又要有，人哋咁做我又要咁做……樣樣以金錢物質虛榮為主，你叻唔係因為你踢波叻，唔係因為你踩單車，畫畫，唱歌叻，而係搵錢叻，吸金力強，買到幾多樓先至係最叻，呢個社會就係咁…文化藝術只係閒時睇睇～其實又好難怪人的，現今社會有錢就有生活，就算你唔出街齋訓張床過日，都要交租，交管理費喇！除非訓山隆，訓天橋底啫…而且香港仲係一個消費型社會呢，處處都係商場，我哋細個時都唔係太多公司商場，要行公司就要走到尖沙咀，彌敦道等…但係而家區區都有大型商場～或者生活多點博物館，又會起到平衡作用，唔需要吓吓出街都要買嘢～

你仲勁過蘇師傅2047有個翻天覆地的轉變?!!~~其實都有可能嘅，自有電腦系統出現，好多人手已經逐步減省，而家好多工都要配合電腦一齊做，但係你話完全取代都仲要好長時間…

如冇意外，森伯都會有呢一日……唔駛講有呢一日，而家森伯伯就已經係啦XXXXD！所以要慳慳地儲定錢，到時要請個工人姐姐照顧，當湊BB仔咁湊森伯伯～><…><…><…（到時真係眼淚在森裡流）

以前睇西醫就唔可以飲涼茶，反而現在講中西合璧，好似潮咗～～

唔長氣過森伯，我篇Blog都某咁長…不如借畀我出下篇blog，可以懶番幾日…XXD
2017-02-24 10:11:41
基爾
我都覺香港實在太多重複了主題的博物館,可以重新整合,不一定要起一間全新的故宮館,太浪費公帑.....
上圖中那間館最近也有個皇帝大婚展,森兄有冇去睇下?
我有時都會選擇看中醫,覺得藥性係比較溫和注重固本培原,不過如要速效殺菌就始終係西藥效力快,所以通常係先看西醫再看中醫就藥到病除^^
2017-02-24 12:00:50
版主回應
係呀！有時在不同的博物館裡，都會看到有些展品熟口熟面，所以博物館應該間中更新多點主題～畀參觀者多點新鮮感，唔駛來來去去都差唔多…

皇帝大婚好似有故宮展品睇，不過現在唔睇留待日後故博再睇…到時才有新鮮感~~

到現在我不敢亂吃草藥，所以有很多藥方都唔會亂試！所以冇乜機會試到中西同醫的效果～總之平時就打好底子，只係希望冇咁易病～～
2017-02-28 16:11:15
amour
逛博物館，是一個消閒的好方法。
我比較喜歡看中醫，喜歡中藥的味道！
2017-02-26 12:30:20
版主回應
除非有想睇的主題，才會到博物館逛逛，
就好似除非有東西買，才會去商場公司逛逛…

你又幾特別，通常啲人怕聞涼茶草藥的味道！
不過都有些草藥例外，都幾清香…
2017-02-27 17:54:11
基爾
森兄最懂養生^^
2017-02-28 12:55:01
版主回應
反而羡慕gael兄乜都可以食喎！^^
2017-02-28 16:13:10
Ka Ka
記憶中…我無睇過中醫，最多都是飲過凉茶舖啲廿四味凉茶或者菊花茶，記得媽媽曾煲過當歸比我保身，但，我飲咗反而會頭暈，我諗我唔受得中藥！
我個人比较相信西醫治療法，可能由於以前見過一個女孩的手指就是被中醫“庸医”醫壞了，弄到要做矯形手術。
期望中西醫合璧能讓病人得到更好的治疗，
那么病人便受少啲苦。
2017-02-28 21:32:41
版主回應
記憶中你未睇過中醫，證明你健康唔駛飲苦茶！其實中醫的理論主要講個人體質，所以好專業或者好有經驗的中醫才清楚你屬於邊類型體質，唔配合可能有反效果都唔定，所以搵啱中醫好緊要～

西醫療法大都一致，唔係靠估估吓！不過就治標唔治本…講調理就一定中醫係首選，我都試過飲唔啱中藥而出事，或者未必關碗藥事，可能醫師斷錯證都唔定…自此都有啲怕怕～不過都好耐好耐先前咯…

假若呢間中醫院開得成的話，仲要睇吓有冇口碑先至可以話中西合璧可以幫到病人…
2017-03-01 08:53:34
基爾
喱排好似有金庸展
2017-03-02 11:28:01
版主回應
我只知有個皇帝大婚展…睇其他博友都有介紹過～
至於金庸展，我一本小說都冇睇過，只係侷限電視劇…響gael兄面前真失禮:P
2017-03-02 14:43:51
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文