「森」情小品文 ...

323愛的鼓勵 505訂閱站台

呢單窘lift事件，都已經係好幾個月前…所以生活總有些意想不到的事情，隨時都有可能發生…

諗諗嗰日都幾黑仔，黑仔森呢個朵真係冇叫錯…哈哈哈！當日返工已經遲出門，上到車又因車的問題又已經推遲了，返到公司就二話不說上lift啦！部lift初時都好地地，上到工作嗰一層，正準備開門之際，啱啱開到八吋左右門就停了（只要再開多十吋左右，fit過籠的森伯都有機會側身竄出去…）結果撳極都開唔晒…連部lift都唔郁，當時同lift都有兩位大廈工作人員，佢哋就用力掰開lift門，不過掰唔開…始終機件的事唔熟就唔應該亂搞，於是大家都冷靜地等救援！大廈有閉路電視，而控制台已經知道升降機發生咩事，已經call了維修人員到場…
森伯又好在冇咩密室恐懼症，唔係當時應該會發作…XD～亦好彩唔係突然斷電，若果燈都冇仲驚喎！！通常窘lift都有種「內憂外患」的感覺，外患就係驚部lift突然急墮，已經捉實機內的扶手，幸好工作層數唔太高，大吉講句：萬一急墮都應該仲有全C嘅…….><！當時實在驚唔到太多！！而內憂就係──人有三急！因為當時唔知要等到幾時，唔通好似狗仔咁隨lift解決?!!...好在當時仲忍得，你哋知老人家架啦…未必忍到…哈哈哈～

結果都要等成四個字左右維修人員先趕到，他們幾吓手勢就掰開lift門，原來有些膠袋碎攝住lift門，先搞到部lift唔行…所以隨時都有些事情係意料唔到，不過人平安無事就已經萬幸！

相：不是以上事件的升降機，而是附近商場的升降機正等待維修…原來升降機的內籠很有礦洞的感覺…