「森」情小品文 ...

323愛的鼓勵 505訂閱站台

月光下的月光…

講到中秋，相信話題都離唔開月光光，應該到八月十五個月亮就係最大最靚，今年聽聞我哋都幾好彩，會欣賞到一個又大又圓的月亮，又係唔知幾多年先有一次嗰類啦…哈哈，唔知自己有冇機緣巧合見到呢顆大明月…不過前日又睇到PChome新聞講，過了中秋後又會見到「血月」！紅色的月亮未好靚？！真係要講句拭目以待…見到就一定要影相添啦！

 

月光下的新look…

近排森伯個look真係要幾頹有幾頹，若然連鬚都唔剃，就甚有丐幫幫主feel～或者趁過節都要執執佢，唔知臨近中秋剪髮要唔要雙計咁呢？！哈哈哈～其實只係咁啱啫，過中秋又唔一定要剪個靚仔頭去過節！不過昨晚真係好多人去剪髮，唔知係咪節日效應森老伯都等好耐！

 

月光下的月餅…

過中秋，食月餅就當然唔少得！大家都本住一年一次就唔計較食幾多…今年自己就買咗一個月餅咁大把，其他就多數人哋送！人的心態有時都會變，細個時唔吼的五仁月餅，到人大了就會覺得唔錯！食得蓮蓉多食下五仁又另一種口味，而且健康啲啦！餅商都好識做生意，時下的五仁月都貴過蓮蓉月！所以幾時都話健康食品有商機…今年同事畀咗一款特別的月餅我哋，唔知係邊度嘅特產，國內月餅林林總總，粽子都一樣唔同家鄉就有唔同特色！算是今年收到的特別月餅！

 

月光下的中秋…

中秋節係個古代傳統節日，各地華人都有唔同的慶祝方法…若果講到港式慶祝，都不外乎玩燈籠食月餅，仲有一家大細坐埋一齊食餐團圓飯…可能人老咗，漸漸發覺無論咩節日，總之一家大細圍埋食飯，都可以叫團圓飯，不論過年或中秋，可能以前的人要大家聚埋一齊食飯好難得，所以都好重視呢一餐！其實最重要都係有個機會讓大家可以見見面，開心食餐飯啫！

本來應該有啲相襯托吓內容先好睇，但可惜仍然是上傳問題，就唯有畫幅萬家燈火的中秋畫點綴吓！

在此！祝各位友好中秋節愉快，同摯親摯愛享受呢個人月倆圓的日子！！