一个走揣路草的女子---台語講演
欲講晉前，我請問各位，有啥人台語聽無？我想南部的台灣人大部份攏會曉講台語才對，但是咧溝通的時，尤其阿公阿媽参阿孫仔講話，攏講華語較濟，雖然in所講是台灣國語，in嘛誠拼命佮阿孫仔講華語，親像按呢卡有水準、卡有教育的感覺。
我的姪仔，三兄的囝，美國的博士，大學的副教授，伊是一个誠有台灣意識的知識份子，m過伊参伊的囝兒咧講話攏講華語。莫講別人，提家己的例來講，會記住十幾冬前，我領吳濁流文學獎嘛誠自然543講起華語來，予巫永福當場大聲講「台灣人袂曉講台語，是眞奇怪的代誌」，予我感覺誠委曲。了後開始思考台語這个問題，我想這是整个台灣教育体制所產生的結果。事實上，我這个正港的台灣人，嘛是這世人除了5月初1新冊發表會以外、第一擺用我的母語來講演，甚至會講甲離離落落，其中台語講袂輪轉，嘛需要華語來幫助，我想這是現此時佇台灣講台語的一般的現象。
另外來思考一个問題，台語是毋是台灣的母語？這是舊年轉來台灣佇文學館演講時，有人向我提出質疑，講台語是福建語、是閩南語、是中國的一種方言，我想這是大中國思想的想法。事實上，即馬的台語是經過吸收平埔語、外來語、閩南語，幾百年來的擠壓、溶合才變成目前的台語，這是語言的現狀。日據時期日本警察欲考「台語會話」，為何毋是講考「高砂話」？當然汝會當講較早的台語是山地話、平埔語，但是in無文字化，所以誠早就將近消逝，時間愈久愈容易被人消滅，閣再講佇台灣講台語的人佔70%以上，當然台語是台灣的母語，這是現實的狀況，無法度改變的，而且台語閣需要面對被北京語消滅的危險，這才是重要的事實。像我被邀請去國校教小朋友唸我的台語、英語 的兒童詩「一欉小花蕊」，但是佇報紙刊登出來變成 閩南語、英語 的兒童詩。
其實這毋是上嚴重的，相信會曉講台語的台灣人，差不多80%以上是看無台文，甚至毋知有台文這種文体。有一擺，佇温哥華遇着一个台灣來的音樂家，彼當時伊是温哥華交響樂團請來的指揮，伊表示伊袂曉講華語，單那會曉講英語佮台語，引起我足大的好奇，但是當等我問伊有關台文的時，伊竟然毋知影。一个對台語遮呢重視的家庭，對台文是無一點仔印象，可見台文的處境比台語閣較嚴重。
以家己做比例，我嘛無好到叨位，寫作將近半世紀，猶原無感覺需要用台文創作，雖然十幾冬前寫「井月澎湖」的對白是用台語寫，因為我的父母所講是台語，小說欲反應的就是眞實生活，所以對話部份我使用台語。這本冊的對白是台語，致使欲領高雄文藝獎有袂少的爭議，當然最後正獎也是予我。但是我猶原無使用台文的習慣，莫講寫台文連看台文對我來講是誠困難的代誌。2009年「台文戰線」網路成立，才逗逗仔進入台文世界。彼當時感覺使用英文比台文較簡單，至少英文位初中到大學甚至出社會，到2002年移民去加拿大攏有正式教育過、上過英文課；相對的，台語就無赫呢好運，甚至講台語閣愛面對罰錢的處境。但是當等我講出「寫台文比寫英文較困難」時，我的良知、我的潛意識，雄雄感覺無介四序。寫作半世紀，抑無想著寫作有使命感，但是位2002年以作家身份移民加拿大，才發現愛有使命感才對。
我是一个永遠咧走揣路草的女子，位細漢到大漢攏相像。細漢看着田嬰，就想欲變做一隻田嬰，會當飛佇草枝風騷予人掠袂著；看着湖中水鴨，就想欲變成一隻水鴨，泅佇竹林水萍中自由自在。生命流水無時無刻咧走徙，到2001年心內普普仔走揣退休了後生命的方向，2002年搬去温哥華，一路行來攏是咧走揣路草。佇寫作的路上，行到想欲用英文、台文來書寫的路口。即馬簡單來報告是按怎使用英文、台文佮翻譯來走揣我的路草，了後我會用台語唸一首新詩、一首兒童詩佮一篇散文，背景音樂由音樂系副教授洪千富演奏小提琴。
佇2002年春天, 位台灣移民加拿大，這段期間，所有的精神攏囥佇英文世界。其實早期佇台灣，就誠拍拼讀英文。彼陣佇中華電信上班，工作之餘，申請去中大、師大、文藻進修英文，予人講我有學校讀到無學校，另外我的大學教育半工半讀八年才完成，佇遮深深感謝「中華電信」提供我所有的學費。然後提早退休去溫哥華讀冊，發見同學的母親大部份攏比我較少年，我親像一世人攏咧作學生。想著讀這間BC省上嚴格的學校Vancouver Community College彼段日子，親像佇魔鬼訓練營，嘛予人講我讀英文讀到六親不認，我想毋干單按呢，連破病也毋敢哀。
但是對一个使用華語、講台語超過半世紀的人，欲用英文創作，眞正是一項大代誌。續落來，閣想欲用台文寫作，對一个完全受華語教育，雖然會曉講台語，但習慣使用幾若十冬華文書寫的作者，這敢毋是閣一項大挑戰！欲用英文参台文寫作，我親像一欉釘根佇地球的樹仔，拼勢躡跤尾跟，好玄探測天頂懸懸的奇妙。這款工課是無界快活，但是寫作到這个坎站，加減有使命感：一來，用英文書寫，想講予世界較濟族群的人了解我的故鄉台灣；二來，蹛佇海外，用我的母語「台語」創作，我親像會當位心肝窟仔，揣著故鄉的親切。
頭起身，我是先共我的兒童詩、散文、長篇小說「井月澎湖」，以及台灣詩人作品，位華文翻作英文。講到翻譯，這幾年的經驗，予我誠深的感覺，若欲作字参字、詞参詞、句参句的「對等」翻譯，是根本無可能的代誌，因為英、漢兩種語法、習慣、文化背景、民族傳統，有誠大的差別。比如英語是動詞的語言（Verb language），漢語是名詞的語言（Noun language）。佇英語世界，動詞有現在式、過去式、末來式，佇進行式閣有現在進行式、過去進行式、末來進行式…等等，伊扮演足重要的角色，無仝的動詞就有無仝的意思。像今年溫哥華慶祝 125週年紀念，政府當局是用「push」作為慶祝的sign，in標榜的是just do it, push and pull, go, go…之類的動詞，in足愛用「動詞」來表現行動力。另外文化的無仝閣有「低的背景Low-context」佮「高的背景High-context」的分別。西方或者較新的國家，像加拿大、美國、紐西蘭、澳大利亞，就屬於「低的背景」，in的民族性講究的是個人、改變、少年、靠俗、效率；東方或者較古老的國家，像埃及、印度、中國，台灣，就屬於「高的背景」，in講求的是集體、傳統、長老、拘束、唯心。
一个位「高的背景」的台灣，來到「低的背景」的加拿大，我家己做一个比較，按呢對自身的位置較有淡薄仔了解，才予我這个蹛佇加拿大的外國人(台灣人) 減少一寡文化的衝擊(culture shock)。佇溫哥華學院讀英文的時，教授就講欲予英語是第二語言(ESL)的學生，慢慢仔位High-context導向Low-context，按呢學英文才有寡基本功夫。頭起先，我會照字面翻譯，但是發見in煞毋知影眞正的意思。所以即馬有一个習慣，翻了後愛予英文是母語的作家朋友看一下才發表，畢竟英文毋是我的母語，我是按呢認真佮謹慎來面對我的作品。
我是無愛永遠關佇水族館，是一个欲泅向大海的人。向望不止會當用華語，嘛會當用英文、台文來寫作。無管天有偌懸、海有偌深、困難有偌重、我猶原會顧著鍊金術者(The Alchemist) 所講的 “When you want something, the entire universe conspires to help you to achieve it當汝想欲愛的物件，所有的宇宙能量攏會來幫助汝完成” 的精神勇敢向前，做一个眞正的實行者！
我是得獎的台灣作者，以作家身份移民加拿大，誠自然，就愛以創作來做我生活的工課。目前(2010)出版十本冊，大部份用華語創作，包括散文、小說、童詩、新詩佮英文翻譯，2009年才認真開始台文的書寫。第一份成績單是台、英雙語童詩集「一欉小花蕊」(今年5月初1佇文學館舉行新冊發表會)；第二份成績單就是這本台、英雙語散文集「一个走揣路草的女子」。遮有關親情方面的散文，其中台語詩人王立信用伊的澎湖腔唸出來，使人感動。用母語寫作，感覺親像一尾魚仔予人掠去陸地誠久，雄雄共伊放落水中走揣伊的故鄉，彼種快樂親像華語所講的「如魚得水」。用台語寫作，是這世人寫作過程中，上美好的激動。
台文方面，2010年得著府城文學獎、2011年得著高雄市文學創作獎，遮的作品，毋是欲教人按怎精進出脫，伊是一个普通女子，位高雄到澎湖，位台灣到溫哥華，透過日常生活的風景，寫出伊的想法反映。親像一欉佇塵土中的小花蕊，咧走揣蝴蝶的路草，向望將伊移徒的旅途佮經驗分享予逐家。此後，對台灣的感情，對澎湖的數念，我會繼續用我的筆來表達。(2011.5.20)
